Македонија
Нова распределба на квотите за лекови во аптеките од 1 јануари

Фондот за здравствено осигурување утврди нова распределба на квотите за лекови за аптеките со кои Фондот има склучен договор. Новата распределба стапува на сила од 01 јануари следната година.
Со тоа, најголемиот број од аптеките, односно околу 500 аптеки од вкупно 778 аптеки со кои Фондот има склучен договор, од 01.01. ќе добијат рамномерно зголемување на квотите за околу 20.000 денари месечно по аптека.
„Сакаме да нагласиме дека сега со новата распределба сите аптеки добиваат фер услови за обезбедување на лекови на целата територијата на Република Македонија, што не беше случај претходно, бидејќи заради начинот на распределба на квотите во претходните години настанале и големи разлики во висината на износите на квотите на аптеките, а едно правно лице добивало и за 40 насто поголема месечна квота од просечната квота на сите останати аптеки во Република Македонија“, велат од ФЗОМ.
Со ова се очекува осигурениците да имаат подобра достапност до лековите во текот на целиот месец во аптеките во близина на нивното место на живеење.
Од ФЗОМ појаснуваат дека новите квоти се донесени после исцрпни анализи на дистрибуцијата на квотите на аптеките и во консултации на Фондот со Фармацевтската комора на Македонија, Сојузот на стопански комори и Здружението на приватни аптеки.
Предвиден е минимален износ по глава на жител, односно по осигуреник, по подрачна едниница на Фондот, насекаде во државава. За аптеките се утврдува максимален износ на квота од 650 000 денари по аптека.
Со новата распределба едно правно лице со две или повеќе аптеки не може да има вкупна квота која е поголема од 10 проценти од вкупниот месечен буџет на Фондот наменет за лекови на рецепт на ниво на цела држава. Досега само едно правно лице располагаше дури со приближно 20 проценти од буџетот за лекови на товар на Фондот. Со овој потег се намалува можноста за стекнување и одржување доминантна позиција на пазарот и се подобрува конкуренцијата, а на средните и малите аптеки им се овозможува порамноправни правила на игра.
Во интерес на граѓаните кои живеат во тешко достапни и поодалечени села, Фондот воведува и можност за субвенција на аптеките кои што обезбедуваат лекови за тамошните жители, како директна поддршка за опстојување на аптеките и во такви места.
Дополнително, во почетокот на 2019 година, Фондот ќе распредели дополнителни, најмалку околу 120 милиони денари за лекови на товар на Фондот, со што ќе го зголеми вкупниот буџет за лекови од 2 милијарди и 900 милиони денари за 2018 на најмалку три милијарди и дваесет милиони денари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: Апасиев да остане доследен на себе и да побара Мециновиќ да си поднесе оставка

ВМРО-ДПМНЕ го прашува Апасиев од Левица дали ќе побара оставка од Мециновиќ сега кога се кандндира за градоначалник?
„Дали Апасиев ќе побара од Мециновиќ да си поднесе оставка од пратеник сега кога се кандидираше за градоначалник, како што бараше претходно? Очекуваме Апасиев да остане доследен до себе и да побара Мециновиќ да си поднесе оставка“, велат од ВМРО-ДПМНЕ.
Од партијата пренесуваат изјава на Апасиев во која вели дека пратениците кои се кандидирале за градоначалници треба да поднесат оставка.
Партијата Левица денеска соопшти дека нејзин кандидат за градоначалник на Скопје ќе биде пратеникот Амар Мециновиќ.
Македонија
Поместени границите во ортопедската трансплантација – извршена најсложената трансплантација на коска на Клиниката за ортопедија

На Универзитетската клиника за ортопедија успешно е изведена најсложената трансплантација досега, со што се поместени границите на современата ортопедска хирургија кај нас, соопшти Министерството за здравство.
Пациент, маж на 64-годишна возраст, со втор рецидив на миксоиден липосарком на левата натколеница, беше подложен на ресекција на средишниот дел од бутната коска, реконструкција со графт од кадавер и фиксација со клин.
Операцијата беше во два акта – во вториот имаше пластична реконструкција, која ја изведе тим предводен од д-р Томислав Јовановски. Првиот хируршки тим го предводеше проф. д-р Милан Самарџиски, со учество на спец. д-р Бојан Будиќ, д-р Теодора Тодорова и д-р Гоце Гулески. За анестезија беше одговорна проф. д-р Јасминка Нанчева, со анестетичарката с. Јована Илиева.
Во операционата сала активно придонесоа инструментарките Ерзен Муртезани и Татјана Дукадиновска, болничарот Дардан Синани и рендген-техничарот Силвана Станковска.
„Со овој зафат се поставува нова референтна точка во домашната ортопедија и се потврдува капацитетот на македонските хируршки тимови за изведба на интервенции од највисок степен на сложеност“, велат од Министерството за здравство.
Македонија
Муцунски: Владата работи на европската интеграција, ред е и ЕУ да покаже посветеност

Во интервју за NewsMax Balkans, министерот за надворешни работи и надворешна трговија, Тимчо Муцунски, зборуваше за европската интеграција на државата, регионалните прашања, членството во НАТО, партнерството со ЕУ во сферата на безбедноста и одбраната, како и за странските инвестиции.
„Подготвени сме да ги завршиме тешките реформи – и веќе тоа го правиме. Со тоа јасно го демонстрираме стратешкиот правец во кој се движиме. Но време е и Европската Унија, нејзините институции и земји-членки, да покажат подеднаква посветеност на нашиот европски пат,“ изјави министерот Муцунски.
Тој нагласи дека Владата е посветена на европската интеграција преку спроведување на реформи и исполнување на мерливи критериуми што самата Унија ги поставила, но дека е потребна одлучност, фер пристап и предвидлива патека за напредокот на земјата и додаде дека државата црвсто стои на своите стратешки приоритети членството во НАТО, посветеноста на патот кон Европската Унија и стратешкото партнерство со САД.
Министерот се осврна и на членството во НАТО и придонесот на државата кон регионалната, европската и глобалната безбедност, вклучително и преку Партнерството за безбедност и одбрана меѓу Македонија и ЕУ, договорите за стратешко партнерство со Обединетото Кралство и Унгарија.
Во делот на економијата, министерот истакна дека според најновите статистики, Северна Македонија е лидер во регионот и во Европа по обем на странски инвестиции во однос на БДП.
„Граѓаните и бизнисите сакаат резултатите да ги почувствуваат и на терен. Најчесто бенефитите од големите инвестиции се видливи по шест месеци до една година, преку нови и подобро платени работни места, зголемена продуктивност и соработка со домашни компании,“ додаде Муцунски.
Тој посочи дека Министерството за надворешни работи и надворешна трговија, во координација со Дирекцијата за ТИРЗ, работи на обезбедување сигурност и поддршка за странските инвеститори, со крајна цел граѓаните да го почувствуваат ефектот на инвестициите во нивниот животен стандард.
„Ветувам дека ќе работиме уште посилно за да се позиционираме уште подобро во следното мерење наредната година,“ заклучи министерот Муцунски во интервјуто за NewsMax Balkans.