Во собраниска процедура денеска влезе Законот за судската служба, со кој се регулира правото на судските службеници да добиваат додатоци на плата.

Од Министерството за правда велат дека ова е практично исходот од средбата одржана оваа недела меѓу претседателот на Владата на Република Македонија, Зоран Заев, претставниците на Здружението на судските службеници, претставниците на УПОЗ, министерката за правда, Рената Дескоска, и министерот за финансии, Драган Тевдовски.

„По завршувањето на собраниската процедура, судските службеници ќе добијат рамноправен статус и третман во однос на додатоците на платата, со што ќе се стави крај на повеќегодишната дискриминација врз судските службеници. Законот за судската служба покажа недостатоци во делот на системот на плати, додатоци и надоместоци на плати на судските службеници. Констатираните недостатоци во утврдувањето на правата на вработените во судската администрација во Законот за судската служба, во делот за плати, додатоци и надоместоци на плати на судските службеници, особено се однесуваат на делот на правото на додатоци на платата, кои се одразија на целосната примена на законот“, велат од Министерството за правда.

Оттаму додаваат дека постои неизедначеност во утврдените додатоци на платата кај вработените во судската служба со другите вработени во правосудниот систем.

„На овој начин вработените во судската администрација за извршување исти задачи со други вработени во правосудните органи не може да остварат исти права во делот на додатоците на платата. Во Законот како додатоци на платата воопшто не се предвидени додаток на платата за посебни услови за работа, додаток на платата за постоење висок ризик и додаток на платата за доверливост. Исто така, се утврдува и постапка за заштита од арбитрарност на претседателите на судовите при одредување на додатоците на судските службеници“, додаваат од Министерството.