Во предградието на Атина, Егзархија, околу полноќ дошло до судири меѓу полицијата и група непознати лица во близина на полициската станица, при што е причинета голема материјална штета, јавуваат грчките медиуми.

Судирите траеле околу еден час, а започнале откако група непознати лица наводно ја нападнале полицијата со молотови коктели и камења, по што полицијата одговорила со фрлање шок бомби, јави ЕРТ.

Според информации, полицијата уапсила 72 лица.

Грчките медиуми јавуваат дека еден полицаец е повреден.

Пожарникарите интервенирале откако избувнале пожари на автомобили и канти за ѓубре, објави Катимерини.

Американскиот претседател Доналд Трамп изјави дека преговорите за решавање на конфликтот во Украина „можеби се одвиваат добро“.

Трамп ова го изјави синоќа пред новинарите во претседателскиот авион, пренесе Ројтерс.

„Мислам дека сè оди добро меѓу Украина и Русија. Ќе видиме што ќе се случи, но мислам дека работите се одвиваат добро“, изјави тој.

Американскиот лидер додаде дека вести за ова прашање се очекуваат „доста наскоро“.

Трамп синоќа ги продолжи санкциите против Русија за уште една година.

Американскиот државен секретар Марко Рубио на почетокот на април изјави дека американскиот Конгрес веќе почнал да работи на нацрт-законот за санкции против Русија што ќе бидат воведени доколку Москва одлучи да ја продолжи војната против Украина.

Рускиот претседател Владимир Путин и специјалниот пратеник на американскиот претседател Стивен Виткоф во петокот во Санкт Петербург разговараа за условите за постигнување мир во Украина, соопшти Кремљ.

Во соопштението се наведува дека средбата меѓу Путин и Виткоф во зградата на Претседателската библиотека во Санкт Петербург траела околу 4,5 часа, пренесе РИА Новости.

Белата куќа објави дека посетата на Виткоф на Русија е уште еден чекор кон прекин на огнот во Украина што треба да доведе до мировен договор.

Во исто време, Ројтерс објави, цитирајќи американски официјални претставници, дека Виткоф му рекол на американскиот претседател Доналд Трамп по состанокот со генералниот директор на рускиот фонд за директни инвестиции (РФИФ) Кирил Дмитриев минатата недела дека најбрзиот начин за прекин на огнот во Украина ќе биде признавање на руската контрола врз четири нови региони.

Официјалните претставници изјавија дека специјалниот пратеник на американскиот претседател Кит Келог на средбата се изјаснил против тезата на Виткоф.

Келог посочи дека Украина нема да се откаже од своите претензии за територии над кои Русија ја презеде контролата, рекоа американски официјални претставници, истакнувајќи дека состанокот заврши без Трамп да донесе одлука за промена на американската стратегија.

Помал авион со шест лица се урна во американската сојузна држава Њујорк, соопшти американската Федерална управа за авијација.

„Мицубиши МУ-2Б“ вчера околу 12:15 часот по локално време се урна во нива во близина на градот Копеиг. Авионот се упатил кон аеродромот Дистрикт Колумбија во Хадсон, Њујорк“, се вели во соопштението.

Најмалку едно лице загина во несреќата, објави „Ројтерс“, повикувајќи се на ФАА и локалната полиција.

Во текот на изминатата недела, имаше неколку фатални авионски несреќи во САД.