Македонија
Непроодни повеќе патишта и отсечени неколку села поради снегот
Повеќе патишта во Македонија се непроодни, а неколку села останаа отсечени поради снежните врнежи. Според информациите од Центарот за управување со кризи, состојбата на патиштата до 17 часот е следна:
Скопски Регион
Сите локални патни правци во град Скопје и околината се проодни, освен патниот правец кон повисоките населени места на Скопска Црна Гора, односно селата Брест, Танушевци и Малино, кој не е прооден, а село Танушевци нема електрична енергија.
Во општина Кисела Вода не се проодни патните правци кон селата од планинскиот регион на општините Сопиште, Студеничани и Зелениково.
Битолски Регион
Регионалниот патен правец Крушево-Пуста Река не е исчистен, но е прооден за теренски возила со зимска опрема.
Охридски Регион
Во општините Дебар и Центар Жупа регионалниот пат Дебар-Жировница и Дебар-хидроелектрана ‘Глобочица’ се проодни во зимски услови. Патот за село Броштица е непрооден.
Патиштата кон селата Кладник, Белица, Малкоец и Ехлоец во моментов се проодни само со теренски возила.
Во општина Македонски Брод и Пласница локалните патни правци кон повисоките села – Дренов, Крапа, Битово, Растеш, Заград, Волче, Ботушје, Бенче, Лупште, Звечан, Инче, Требовље, Брест, Косово, Рамне, Брезница, Могилец, Калуѓерец, Томино Село и Сушица не се проодни.
Во општина Струга не прооден е патниот правец од с. Присовјани до хидроцентралата ‘Глобочица’. Забрана за тешки товарни возила има на патниот правец Подмоле-Ќафасан. Патниот правец за Загрчани, Вишни и Г. Белица не е прооден.
Велешки Регион
Патните правци накај Г. Јаболчиште и Богомила се проодни во зимски услови.
На подрачјето на општините Свети Николе и Лозово патниот правец кон селата Немањици, Ранченци, Мечкуевци и Патетино, како и патниот правец кон селата Трстеник, Сопот, Преот, Малино, Алакинци и Крушица се проодни само за теренски возила.
Штипски Регион
Патните правци во Плачковичкиот Регион се тешко проодни.
Кумановски Регион
Во општина Старо Нагоричане, единствено регионалниот патен правец кон Р. Србија-Пелинце е приспособен за движење, а патните правци што гравитираат кон селата во Козјачијата се тешко проодни.
Во општина Липково непроодни се патните правци што гравитираат кон повисоките села – Гошинце, Лукаре и Малино.
Во општина Крива Паланка регионален пат Ранковце-с. Герман е прооден до с. Пклиште, а од с. Пклиште до с. Герман е непрооден.
Регионалниот патен правец Крива Паланка-с. Огут е прооден за теренски возила.
Регионалниот патен правец Крива Паланка-село Луке е прооден во зимски услови.
Од „Македонијапат“ и АМСМ известуваат дека забрана за движење тешки товарни возила има на патните правци крак Маврово-Дебар, Ресен-Битола на планинскиот превој Буково Гостивар-Кичево преку планинскиот премин Стража, Кичево-Охрид преку планинскиот премин Пресека, патниот правец Прилеп-Македонски Брод на планинскиот премин Барбарос, патниот правец Струга-граничен премин Ќафасан, како и на патниот правец Тетово-Попова Шапка, каде што забраната важи и за автобуси, а за другите возила е задолжително користење зимска опрема (синџири).
На патниот правец Маврово-Дебар, во близина на манстирот „Св. Јован Бигорски“, поради свлечиште, сообраќајот е во целосен прекин.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Следува период на стабилно и суво време, а дневната температура ќе биде во пораст
Сончево со мала локална облачност. Ќе дува слаб ветер од променлив правец. Минималната температура ќе биде во интервал од -3 до 4, а максималната ќе достигне од 12 до 16 степени.
Во Скопје, сончево со мала локална облачност. Ќе дува слаб ветер од променлив правец. Минималната температура ќе се спушти до 0, а максималната ќе достигне до 15 степени.
Времето во наредниот период
Под влијание на поле на висок воздушен притисок, следува период на стабилно и суво време, а дневната температура ќе биде во пораст. До средината на следната седмица ќе дува слаб до умерен ветер од јужен правец, а по одредени котлини ќе има појава на магла.
Македонија
Потпишан Меморандум со највисоко рангираните универзитети во Македонија за соработка во рамки на проектот „Европска престолнина на културата – Скопје 2028“, објави Ѓорѓиевски
Градоначалникот на Град Скопје, заедно со највисоко рангираните универзитети во Македонија потпишаа Меморандум за соработка во рамки на проектот „Европска престолнина на културата – Скопје 2028“, со што академската заедница официјално се вклучува како активен и рамноправен партнер во овој значаен европски културен процес, информираат од Град Скопје.
Со Меморандумот се потврдува јасната европска ориентација на универзитетите и нивната улога како двигатели на знаење, креативност и иновации, како и нивната општествена одговорност во развојот на заедницата. Вклучувањето во „Скопје 2028“ отвора можности за интеграција на културата во наставните и истражувачките програми, поттикнување на студентската креативност и младинскиот ангажман, развој на интердисциплинарни и меѓународни партнерства и зголемување на академската видливост на европско ниво.
Академската заедница останува посветена на активна, професионална и визионерска улога во реализацијата на „Скопје 2028“, со цел зајакнување на европските вредности, продлабочување на интеркултурниот дијалог и создавање одржлива, солидарна и креативна иднина за Скопје и Македонија.
Македонија
Сиљановска-Давкова: „Извозот на мозоци“ остава длабоки лузни, најдобрите си заминуваат поради недостиг на правдата при вработувањето и напредувањето
Претседателката на државата, Гордана Сиљановска -Давкова денеска присуствуваше на презентацијата на проектот „Партнерства за вештини за одржливи и праведни модели на миграција“ (Skills4Justice), спроведен во рамките на програмата на ЕУ за истражување и иновации Хоризонт Европа (HORIZON Europe). Настанот се одржа на Економскиот факултет при УКИМ, како национален координатор на истиот.
Во своето воведно излагање, таа истакна дека одливот на младите високообразовани и компетитивни македонски кадри е една од најголемите закани за македонскиот општествен развој, со сериозни демографски, економски, политички, научни и културни последици.
Според неа, со сè помалубројна и послаба епистемолошка заедница (професори, истражувачи, новинари-аналитичари, културни дејци), тешко е да се креираат добри политики во различни области.
Најдобрите си заминуваат во потрага по подобар живот, но и заради недостиг на меритократија (потценето знаење, талент, вештина и креативност), како и отсуството на владеење на правото и правдата при вработувањето и напредувањето, смета таа.
За неа, напливот на високообразовни институции со сомнителен квалитет, како и партизацијата и непотизмот, продуцираат некритична и послушна ,,интелигенција”.
Таа истакна дека борбата со егзодусот на најдобрите треба да почне со реформи во основното и средно образование, преиспитување на високообразовната мрежа и заострени критериуми при избор и кариера.
На крајот, претседателката укажа на потребата од воведување дуално образование во сите степени, преиспитување на преоптоварената високообразовна мрежа, организирање заеднички студии и проекти со други универзитети, ангажирање на македонските умови од дијаспората со помош на вештачката интелигенција и дигитализација.

