Свет
Путин под силно обезбедување доаѓа во Србија
Рускиот претседател Владимир Путин денеска треба во пристигне во долгонајавуваната посета на Белград. На белградскиот аеродромот ,,Никола Тесла” ќе го пречека спрскиот претседател Александар Вучиќ.
По пречекот и официјалните разговори Путин и неговиот домаќин, српскиот претседател Александар Вучиќ вечер ќе ја посетат црквата „Свети Сава“ каде што е најавен собир по повод престојот на рускиот претседател. Путин последен пат ја посетил Србија во 2014 година. Ова е нивна 14-та средба.
Претседателот на Русија, Владимир Путин ќе го чуваат повеќе илјади полицајци, а се шпекулира за бројка од 7.000. Припадниците на Министерството за внатрешни работи ќе преземат максимални мерки за безбедност, а ќе биде изменет и режимот на сообраќај во одредени делови на Белград. Исто така, се шпекулира дека во Белград веќе стигнале околу 250 најелитни руски специјалци, како и личното обезбедување на рускиот претседател.
Тие наводно ги проверуваат рутата по која ќе се движи Путин, местото на состаноците со српските државници, храната, интернетот и слично. Снајперисти, пак, ќе бидат распоредени по највисоките покриви во Белград. Руските специјалци наводно доаѓаат со развиена технологија за спречување напади со дрон, каква што нема во Србија.
Во обезбедувањето на Путин ќе учествува и српската војска. Три српски „мигови“ би требало да го следат авионот на Путин од моментот кога ќе влезе во воздушниот простор на Србија.
Путин на Вучиќ, како што претходно беше најавено, за време на посетата на Белград треба да му врачи орден на Александар Невски, високо признание кое руската држава им го доделува на истакнати личности за развој на меѓудржавната соработка.
Српскиот претседател, Александар Вучиќ, пак ќе му подари на рускиот претседател, Владимир Путин, оригинален подарок – кутре од расата шарпланинец, пишува „Блиц“. Станува збор за тримесечен мажјак од оваа раса по потекло од Шар Планина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Бројот на бегалци во Германија годинава достигна нов врв
Бројот на бегалци кои живеат во Германија годинава достигна нов врв, покажуваат денешните владини податоци, пренесува Дојче веле.
Околу 3,48 милиони бегалци со различни видови дозволи за престој живееле во Германија на крајот на јуни 2024 година, што е за приближно 60.000 повеќе отколку на крајот на 2023 година.
Една третина од овие бегалци дошле од Украина.
Бројката вклучува и некои поединци кои се обврзани да ја напуштат Германија, но остануваат во земјата под политика на толеранција која опфаќа низа ситуации, како што се болест, недостаток на документи за идентификација или луѓе чии деца имаат дозвола за престој.
Статистиката беше дадена како одговор на барањето на партијата Социјалистичка левица во парламентот и првпат беше објавена од Ној Оснабрикер Цајтунг.
Свет
Лавров: Русија не сака ескалација, но западните политичари се однесуваат како деца
Рускиот министер за надворешни работи Сергеј Лавров денеска изјави дека Русија не сака да ги ескалира тензиите со западните земји, но дека, како што наведе, „политичарите на овие земји се однесуваат како деца“.
„Не сакаме ескалација. Се чини дека западните политичари навистина имаат менталитет на дете, иако како возрасни заземаат одговорни позиции: министри, премиери, канцелари, претседатели“, рече Лавров.
Лавров нагласи дека неколку месеци во светот се разговара за тоа како Русија наводно само се заканува и зборува за „црвени линии“.
Свет
Израелска армија: Убиени околу десет високи команданти на Хезболах
Портпаролот на израелската армија, контраадмирал Даниел Хагари, изјави дека заедно со Ибрахим Акил, во денешниот израелски воздушен напад врз јужен Бејрут биле убиени околу десет високи команданти на либански Хезболах.
Хагари на прес-конференција рече дека Акил и другите членови на елитната единица Радван на Хезболах се собрале во подрумот на една зграда кога биле мета и убиени.
Весникот „Тајмс оф Израел“ наведува дека Хагари рекол дека тоа биле „командантите кои го подготвиле и го воделе планот на терористичката организација Хезболах за напад на северната територија на државата Израел.
Портпаролот на израелската војска тврди дека како дел од таа инвазија, Хезболах планирал упад на израелска територија сличен на нападот на Хамас од Газа на јужна израелска територија на 7 октомври минатата година. Тогаш започна војната меѓу Израел и таа палестинска исламистичка организација.
Во меѓувреме, израелскиот министер за одбрана Јоав Галант на платформата X објави дека ќе продолжи „секвенцата на акции во новата фаза“ од конфликтот со Хезболах додека не се постигне целта за безбедно враќање на Израелците раселени поради прекуграничниот конфликт во нивните домови.