Македонија
Груби – Брегу: За пристапување во ЕУ неопходно е владеењето на правото
За пристапувањето на земјите од Западен Балкан во ЕУ првенствено е важно да се постигне владеењето на правото во земјите, на што во наредниот период треба поинтензивно да се работи. Ваков е заклучокот од средбата што ја остварија претседателот на Комисијата за европски прашања на Собранието, Артан Груби, и новиот генерален секретар на Регионалниот совет за соработка, Маљинда Брегу, која ја презема оваа функција на почетокот на оваа година.
На средбата Груби информира за најновите случувања во земјата, со посебен осврт на реализацијата на преспанскиот договор и усвојувањето на уставните измени во Собранието, со кој се надмина долгогодишниот спор со името со Република Грција, како и на минатогодишниот Договор за добрососедство и пријателство со Република Бугарија, со што, како што рече Груби, потврдени се заложбите за негување на добрососедски односи со сите наши соседи, како важен предуслов за просперитет и развој.
Во однос на реализацијата на Охридскиот рамковен договор, Груби,посочи дека со влегувањето во сила на Законот за употребата на јазиците, се закружи целосната имплементација на Договорот, и дека во тек е зајакнување на административните и техничките капацитети за негова практична примена. За работата на Комисијата за европски прашања, истакна за поздравување е што во Комисијата се постигнува консензус за ЕУ прашањата, помеѓу опозицијата и позицијата.
Брегу, говорејќи за планираните активности на Регионалниот освет за соработка, чија главна функција е подготовка и креирање на развојни проекти и создавање политичка клима за економски и социјален развој на земјите од ЈИЕ, истакна дека таа како генерален секретар и понатаму ќе се залага за активно помагање на земјите во регионот за нивно приближување кон евро-атлантските структури.
Во тој контекст, истакна дека особено внимание ќе посвети на зајакнување на соработката на Советот со парламентите во регионот, како и за нивна меѓусебна соработка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.