Македонскиот амбасадор во Албанија, Данчо Марковски е повикан на консултации во Министерството за надворешни работи по објавените резултати од пописот на населението каде македонското малцинство е преполовено во споредба со претходниот попис.

МНР најави дека со него планира да ги прецизира недостатоците и недоследностите во пописниот процес.

„Поради итноста на материјата очекуваме консултациите да се случат во текот на оваа недела и за сите дополнителни детали јавноста ќе биде навремено информирана“, велат од МНР.

Македонските здруженија не ги прифаќаат резултатите од пописот. Велат дека македонското малцинство било под притисок на бугарски здруженија кои се заканувале со одземање на бугарските пасоши. Најавуваат неформален попис кој ќе ги покаже вистинскиот број на Македонци кои живеат во Албанија.

Стерјовски, во името на Македонската алијанса за европска интеграција – МАЕИ вели дека станува збор за фалсификувани податоци, наведувајќи дека не е можно да има само 2.281 Македонец иако на пописот во 2011 година биле регистрирани 5.512 Македонци. МАЕИ, единствената политичка партија на Македонците во Албанија, тврди дека на подрачјето на Преспа, Гора и Голо Брдо, каде што живее македонското малцинство, притисоци вршеле официјални претставници на Бугарија, откако низ годините беа делени бугарски пасоши на албански државјани чија цел била работа во земјите на ЕУ.

„Пред почетокот на пописот, но и за време на пописот на подрачјето на Преспа, Гора и Голо Брдо, каде што живее македонското малцинство, доаѓаа претставници на бугарските институции кои донираа разни средства, подароци и хуманитарна помош, но и правеа пропаганда за жителите да се изјаснат како Бугари во замена за бугарски пасош“, нагласуваат од МАЕИ.

Според тамошниот бугарски амбасадор, Ивајло Киров, владата во Тирана овозможила жителите со бугарско потекло, слободно да ја изразат својата етничка припадност.  7057 лица се изјасниле на пописот дека имаат бугарска националност во краевите кадешто живее македонското малцинство.

„Искрено сме многу изненадени од резултатите. Албанија е најпријателската и најгостопримлива земја за Бугарија и за Балканот“, изјавил Киров.

Викторија Аврамовска Мадиќ, претседателка на  Централната изборна комисија, денеска на прес конференција посочи дека по завршување изборниот процес и гласањето за избор на претседател на СДСМ, пристигнат е само еден приговор.

„Примерите коишто се наведени се веќе јавно соопштени од Комисијата, тие се незначителни и немаат речиси никакво влијание на целиот процес. Прв пример којшто е наведен е број на членови кои побарале да им биде овозможено гласање иако не биле на избирачкиот список. Уште вчера, во текот на денот Комисијата соопшти дека е мал бројот на членови, вкупно 51 кои побараа да им биде овозможено да гласаат иако не биле на избирачкиот список. На 7 им е прифатено барањето а 44 се одбиени. Затоа што по проверка во системот се констатираше 7 се акредитирале а 44 дека не се акредитирани преку активна регистрација и не е доставен образец за активна регистрација“, посочи Мадиќ.

Како што вели, оттука, целосно е несоодветно да се тврди дека станува збор за голем број на членови ниту пак да се тврди дека ова има влијание на процесот.

„Секој кандидат имаше свои контролори на сите 77 избирачки места и во Централната изборна комисија, на денот на гласањето. За дополнителна транспарентност и можност којашто им беше оставена да гласаат сите контролори еден ден пред изборите, односно на 29.06.2024 година. Како Централна изборна комисија констатиравме дека имаме кредибилен и демократски процес за избор на претседател на СДСМ. Гласањето и целиот процес се одвиваа непречено и мирно, во фер и демократска атмосфера. Ги соопштивме веќе првичните резултати од преброени 95% од гласовите, по пристигнување на сите записници и увид во избирачкиот материјал ќе ги соопштиме и конечните резултати. Одзивот и излезноста на членовите, претседател на партијата е избран и нема потреба од втор круг затоа што согласно Правилникот и Статутот на СДСМ оној кандидат којшто освоил над 50% од гласовите на излезените членови. Волјата на членовите на СДСМ е јасно и недвосмислено изразена“, вели Мадиќ.

Министерот за здравство Арбен Таравари се уште не открива кој ќе биде назначен за директор на Градската општа болница „8 Септември“. Одговарајќи на новинарско прашање тој денес најави дека до крајот на неделава ќе го направи изборот.

„Немаме дефинитивно решение кој ќе биде нов директор на ‘8 Септември’, до петок ќе кажеме“, рече министерот Таравари.

Тој потврди дека ендокринологот Танер Хасан е можно да стане директор, но не на „8 Септември“ каде што работи сега туку на Клиниката за ендокринологија, но и тоа решение се уште не е дефинитивно.

Медицинските директори кои досега се покажале како професионалци Таравари рече дека може да ги задржи, но ревизии ќе се направат во сите клиники и во сите болници.

Актуелниот директор на „8 Септември“, Христијан Костов, беше назначен во 2017 година.