„Борбата против корупцијата и криминалот, се меѓу првите приоритети на Владата предводена од ВМРО-ДПМНЕ. Граѓаните долги години јавно говореа дека еден од најголемите проблеми со кои се соочуваа, се криминалот и корупцијата. За разлика од порано, Владата и институциите се борат против корупцијата и криминалот со сите средства, а со една цел, Македонија да биде држава во која владее правдата“, велат од ВМРО-ДПМНЕ.

„Еден од низата примери, во борбата против корупцијата и криминалот е Царинската управа.

Споредбено 2024 година со 2023 година, приходите во 2024 година се поголеми од 2023 година за над 7,5 милијарди денари. Почетокот на оваа година, односно во првиот квартал повторно е забележано зголемување на наплатата од скоро 30 милијарди денари. Овие пари директно влегуваат во Буџетот на државата.

Приходите од Царина се повисоки за 15,6 %, од акциза за 5,7 %, а од данок на моторни возила за 16,2 %.

Во однос на борбата против корупцијата, откриени се криминални мрежи кои се разобличени. Во периодот од декември до април оваа година, се поднесени 102 кривични пријави, додека пак минатото раководство за период од 2020 година до 2023 година има поднесено вкупно 85 кривични пријави.

Во однос на работата на царинските тимови, само во првото тромесечје се остварени над 100 заплени, за разлика од минатите 7 години, каде што просекот за една година бил од 52 до 110 заплени. Сега овој просек е надминат во првите три месеци.

Се работи и на модернизирање на граничните премини, за воведување на паметни граници преку грант од Европската Унија, се работи на реконструкција на граничен премин Делчево, на Маркова нога и се работи на нов граничен премин со Бугарија.

Борбата против криминалот и корупцијата продолжува. Зголемените приходи од Царините ќе се слеат во Буџетот, за нови градинки, училишта, болници, патишта и други економски проекти“, соопшти ВМРО-ДПМНЕ.

Претседателката Гордана Сиљановска-Давкова ги прими Огнен Караѓозовски, претседател, Филип Филиповски, потпретседател на месна заедница Галичник и Дејан Петровски, директор на „Галичка Свадба“.

Прифаќајќи го предлогот и годинава да биде покровителка на традиционалната манифестација „Галичка свадба“, таа ја истакна важноста на негувањето на уникатните македонски обичаи, како неразделен дел од македонскиот национален идентитет.

Галичник, со својата ретка природна убавина, оригинална архитектура, богата историја и автентична култура може да биде туристички магнет и посакувана туристичка дестинација не само за време на Галичката свадба, туку и во текот на целата година, се вели во соопштението од кабинетот на претседателката.

Претставниците на месната заедница ја информираа претседателката за амбициозните планови и проекти за заживување на Галичник, укажувајќи на неопходните чекори и активности за таа цел. Реконструкцијата на патот од селото Јанче до Галичник и реновирањето на некогаш прочуената пекара, стара повеќе од еден век се неопходни претпоставки за нормален селски живот. Обновата на куќата на Ѓорѓија Пулевски и нејзината трансформација во музеј ќе ја оживее меморијата за славното село на кое жителите биле горди, а другите му завидувале. Оживувањето на умешноста на готвење, подготвување сирење, ткаење, везење, плетење, копаничарство може да го привлече интересот на многу добронамерници кои бегаат од буката и хаосот на современиот градски живот.

Обезбедувањето проодност на патот од Маврово до Галичник од доцна есен до рана пролет и покрај големите наноси од снег ќе им овозможи на Галичани, но и на сите вљубеници во снежната идила и мир бегство во бескрајната белина и неповторливо уживање во планинските предели.

Допрена од инспиративните идеи за развој на Галичник како исклучителна туристичка дестинација, Сиљановска-Давкова изрази подготвеност за лобирање и учество во организирање настани за финансиска поддршка на проектите.

„Галичката свадба“ може да се издигне во настан над настаните, момент за помнење и раскажување, уметнички чин во којшто секој ќе сака да учествува. Се разбира, манифестацијата „Галичка свадба” и годинава традиционално ќе се одржи на празникот Петровден, од 11 до 13 јули, се додава во соопштението од кабинетот на претседателката.

„Морален пораз за Тошковски и ДПМНЕ е советничка во Советот на општина Кочани од оваа партија да поднесе оставка од морални причини а тој не. По најголемата трагедија во државата којашто се случи во Кочани требаше да има морална одговорност на оној кој бил на чело на институцијата којашто била задолжена за безбедноста, а тоа е Министерството за внатрешни работи“, велат од СДСМ.

„Кривичната одговорност е нешто што треба да го утврди истрагата, за сите инволвирани. Но, за вакви трагедии мора да има чувство и за морална одговорност.

Јавноста сведочи и на селективност во досегашниот тек на истргата. Се уште не се бара никаква одговорност од оние кои кобната вечер биле на функции и директно одговорни за превенцијата, безбедноста и соодветната реакција а се под надлежност на МВР.

Вечерта на трагедијата, постоеле одговорни раководители во ОВР Кочани, СВР Штип и БЈБ кои биле на позиција. Имало полицајци на лице место – виделе што се случува, имале увид во состојбата, знаеле дека има малолетници, пиротехника но не презеле ништо. И денес, никој од нив не е опфатен со истрагата.

Дури и дозволата за употреба на пиротехнички средства – директна причина за пожарот – паѓа под надлежност на МВР. А од МВР, ниту еден актуелен функционер не е осомничен.

Зошто нема одговорност за дежурните полициски службеници, раководители и функционери? Зошто се гонат лица кои воопшто не биле надлежни во моментот на трагедијата, а не оние што требале да реагираат и спасат животи? Дали ова не е понижување на правдата и селективна заштита на функционери блиски до Тошковски и ВМРО-ДПМНЕ?“, прашува СДСМ преку соопштение.