Македонија
СДСМ обвинува дека фамилијата на Антонијо Милошоски е пример за непотизам
Портпаролот на СДСМ, Констадин Костадинов истакна дека тие ги повикале нивните членови на етика и морал, а веќе има и повлекувања од работните места, за разлика од ВМРО-ДПМНЕ кои не презеле одговорност пред граѓаните. СДСМ обвинува дека пратеникот Антонијо Милошоски е класичен пример за непотизам.
„Повикај ги Мицкоски пратениците на ВМРО-ДПМНЕ да побараат повлекувања од нивните роднини кои се пикнати по државни компании и во јавната администрација. Повикај ги роднините на пратеникот Антонио Милошоски да се повлечат“, рече Костадинов.
Тој обелодени дека снаата на пратеникот Антонијо Милошоски, жена на неговиот брат, Александра Милошоска била вработена во Управата за јавни приходи, вујкото на Милошоски, Владимир Коруновски е вработен во Агенцијата за катастар, братучедот на Милошоски пак, Станко Коруновски е вработен во Централен Регистар, а првата брачудетка на Милошоски, Елизабета Коруновска е директор на основно училиште, додека зетот Марјан, е раководител во државната компанија МЕПСО.
„Фамилијата на Милошоски е класичен пример за непотизам од сериозни размери. Роднински јазли поставени на работни позиции кои се финансираат од парите на граѓаните, од Буџетот на државата. Ајде ВМРО-ДПМНЕ, ајде Мицкоски, имаш ли образ? Повикај да се повлечат твоите роднини и роднините на Антонио Милошоски од морални и етички причини“, рече Костадинов.
Додаде дека СДСМ ја слуша јавноста и реагира, за разлика од ВМРО-ДПМНЕ кое се крие во
белиот дворец откако натрупа проблеми во државата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.