Секојдневно сме сведоци како членови на кумановската група и нивни поддржувачи испраќаат пораки со кои бараат крв и одмазда кон сите политички неистомисленици на Зоран Заев, велат од ВМРО-ДПМНЕ преку соопштение.

„Заканите на кумановската група, на која Заев ѝ ветуваше амнестија и меѓународна истрага, не престануваат, а власта молчи. Зоран Заев и неговите соработници, кои се одговорни за безбедноста на државата, не преземаат ништо. Ова отвора сериозен сомнеж дека зачестените закани не се случајни и не се без поддршка од структури од власта. Очигледно е дека власта нема намера да преземе ништо против оние што се закануваат“, смета опозицијата.

ВМРО-ДПМНЕ прашува дали е тоа поради поддршката што им ја ветувал премиерот Зоран Заев во врска со настаните во Диво Насеље. Под закана се, велат од ВМРО-ДПМНЕ, животите на сите политички неистомисленици на аболираниот Зоран Заев и неговиот криминален картел на власт.

„Обидот за линч на поранешните министри Спиро Ристовски и Миле Јанакиески е само еден од низата скандалозни чинови што го потврдуваат тоа. Власта знае во раните утрински часови да провалува во домови и да приведува недолжни граѓани кои напишале статус во кој го критикуваат Зоран Заев, а сега нема ниту изјава за тоа кој ги испраќа заканите. Нема ниту истрага за мотивите, а ниту се презема нешто за да се спречат намерите на оваа т.н. кумановска група, која се заканува со одземање човечки животи“, се додава во соопштението.

ВМРО-ДПМНЕ бара судот да ги преиспита одлуките за притвор на Спиро Ристовски, Владимир Атанасовски, Христијан Делев и сите други политички неистомисленици, кои, како што велат, се жртва на прогонот на оваа власт.

Исто така, од ВМРО-ДПМНЕ бараат МВР веднаш да ги открие и санкционира лицата што се закануваат.