Министерката за труд и социјална политика, Мила Царовска, присуствува на регионална конференција во Љубљана, на која говореше на панел-дискусија посветена на структурните реформи за конкурентни пазарни економии.

Таа во своето обраќање ја истакна важноста на социјалната реформа, која е во собраниска процедура и со која се извлекуваат семејствата од долгорочна сиромаштија. Со оваа реформа се предвидени инвестиции во предучишното образование, во капиталната инфраструктура и во подобрување на квалитетот на услугата. Се подобруваат и мерките на пазарот на труд преку поактивен концепт за вработливост, посебно на младите лица.

„Во последната една и пол година работевме напорно да ја направиме социјалната реформа. Од една страна, оваа реформа целосно го менува начинот на кој се грижиме за ранливите групи граѓани и значително ја зголемува финансиската помош што ја добиваат. Од друга, новиот систем овозможува поддршка, обуки и советување за да може секој човек да почне да работи. Овој пристап ќе им помогне на луѓето трајно да излезат од сиромаштија, но истовремено ќе ја зголеми работната сила во земјата“, рече Царовска.

Министерката потенцира дека на овој начин реформата не само што ќе има позитивен ефект врз ранливите групи граѓани туку и врз економијата и пазарот на труд. Заедно со другите мерки, како што се програмите за младинско вработување, зголемувањето на минималната плата и многуте позитивни реформи наменети за маргинализираните групи граѓани, се создава праведно општество, кое вистински се грижи за сите.

„Ова е многу важно за мене како министерка и за нас како Влада. Цврсто сме решени да помогнеме за секое дете да има еднаква шанса да успее во животот и секој човек да излезе од сиромаштија. Ова е моја цел и мотивација во работата“, рече Царовска.

Настанот „Кон подобрување на структурните реформи и фискалните рамки“ е во орагнизација на ЦЕФ, Љубљана, и е дел од промоцијата на претстојниот регионален проект „Зајакнување на капацитетите на министерствата за процена на фискалните импликации на структурните реформи“.