Собранието на Република Северна Македонија до Основниот суд Скопје 1 – Скопје во текот на вчерашниот ден достави известување дека не донел одлука за одземање на имунитетот на двајцата пратеници за кои ЈО достави предлози за определување мерка притвор поради пробиен рок за одлучување, информираат од кривичниот суд и додаваат дека известувањето од страна на надлежниот судија на претходна постапка во текот на денешниот ден ќе го достават до Обвинителството.

„Имајќи го предвид известувањето и одредбите од ЗКП, судот не може да постапува по предлогот за определување на мерката притвор, без претходно позитивно произнесување на Собранието во однос на имунитетот. Во врска со наводите на претседателот на Собранието дека судот ќе биде одговорен за евентуално бегство на осомничените и дека судот треба да обезбеди присуство на сите осомничени и обвинети во постапката, ѝ појаснуваме на јавноста дека во нашата држава се применува акузаторен систем на кривично гонење според кој Обвинителството е овластен предлагач на мерките за обезбедување присуство, а судот одлучува доколку за тоа се создадени услови, што за овој случај услов би бил одземен имунитет“, соопштија од судот.

Од судот потенцираа дека првпат Собранието, кое е надлежно да одлучува за имунитетот во законски утврден рок, не донесе одлуки и со тоа го оневозможиле судот да одлучува за мерката притвор на пратениците.

„Неприфатливи се изјавите дека судот ќе биде одговорен за одолжување на постапката дотолку повеќе што судот не може своеволно и спротивно на законот да определува какви било мерки за обезбедување доколку за тоа не се создадени услови. Доколку Обвинителството поднесе нов предлог поради нови или изменети околности, судот веднаш ќе се обрати до Собранието и доколку навреме се добие одлука од Собранието, веднаш ќе постапи“, известија од кривичниот суд.