Македонија
(Видео) Инцидент во црногорскиот парламент, пратениците го нарекоа Џафери „терорист”

Членови на црногорската партија Демократски фронт во Собранието на Црна Гора го нарекоа македонскиот спикер Талат Џафери „терорист“, обвинувајќи го дека пукал во македонските полицајци. На седницата на Цетиње црногорскиот парламент денеска го разгледуваше предлог-законот за ратификација на протоколот за влез на земјава во НАТО. На седницата присуствуваше и претседателот на македонскиот парламент, Талат Џафери.
Како што јавуваат тамошните медиуми, во црногорскиот парламент се случил инцидент и конфликт меѓу пратеникот на Демократски фронт, Милан Кнежевиќ, и Миодраг Вуковиќ од ДПС.
Кнежевиќ почнал да дофрла за време на излагањето на Вуковиќ, кога пратеникот од ДПС изјавил дека „е факт дека денес од шесте поранешни југословенски републики четири се во НАТО, и тоа го поставува прашањето пред оние две што се одлучиле поинаку, без разлика дали нивниот избор е правилен“.
„Ние сме убедени дека вистинскиот избор е сите да бидеме во НАТО“, истакнал Вуковиќ, кој бил прекинуван од Кнежевиќ додека зборувал.
Вуковиќ му порачал на Кнежевиќ дека нема да полемизира со него.
,,Ќе ти го скршам носот, бедо една”, му рекол Кнежевиќ на Вуковиќ.
Претходно лидерот на Нова српска демократија, Андрија Мандиќ, истакнал дека ДФ нема да го поддржи протоколот за пристапување на Македонија во НАТО.Тој им приговарал на пратениците од ДПС, кои свечено го дочекале претседателот на Собранието, Талат Џафери.
„Тој е најпознат по носењето автомат и пукањето во македонски полицајци. Срам да ви е“, порачал Мандиќ. И пратениците од ДФ Јован Вучуровиќ и Милун Зоговиќ му порачале на Џафери дека бил член на терористичка организација.
Црногорскиот министер за надворешни работи, Срѓан Дармановиќ, истакнал дека пратениците носат историска одлука бидејќи Црна Гора првпат одобрува пристап на некоја друга држава во НАТО. Според него, пристапувањето на Македонија во НАТО е добра вест за целиот регион.
Пратеникот од ДПС, Обрад Станишиќ, смета дека членството на Македонија во НАТО ќе даде полн придонес во стабилноста на Западен Балкан.
Членките на НАТО на 6 февруари потпишаа протокол за пристапување на Македонија во алијансата. По ратификација на протоколот за пристапување во парламентите на сите 29 земји членки на НАТО, земјава официјално ќе стане полноправна членка на алијансата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.