Свет
Автомобил се заглавил во снег, возачот и неговото куче преживеале благодарение на тако сос

Мaж и неговото куче пет дена биле заробени во автомобил откако се заглавиле во снег во централниот дел на Орегон. Тие преживеале благодарение на тако-сос, соопштиле од полицијата.
Џереми Тејлор и неговото куче Али отишле на бензинска во саботата на 24 февруари. Бидејќи оттогаш не се вратиле, неколку дена подоцна била издадена објава дека се водат за исчезнати.
Биле пронајдени во петокот во автомобилот на Тејлор. Тејлор раскажал дека автомобилот се заглавил во снегот, објави Би-би-си.
Полицијата соопшти дека 36-годишниот маж и неговото куче биле во добра здравствена состојба, но многу гладни.
Исто така, од полицијата соопштиле дека Тејлор изјавил оти вечерта во саботата кон недела преспале во автомобил, но следниот ден имало уште повеќе снег. Џереми и Али се обиделе да се вратат пеш, но силниот снег им отежнувал во намерата, па се вратиле назад во автомобилот.
„Во текот на четири дена Џереми се загревал повремено стартувајќи го возилото. За јадење имал само неколку пакувања тако-сос“, се вели во полициското соопштение.
По спасувањето, Тејлор им се заблагодарил на сите преку „Фејсбук“ и напишал дека овој пат имал среќа, а во иднина нема да дозволи да се случи нешто такво. Што се однесува до сосот, изел три пакувања лут сос од синџирот за брза храна „Тако бел“ и изјавил дека овој сос спасува животи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Макрон повика на зголемен притисок врз Москва за да се стави крај на војната во Украина

Францускиот претседател Емануел Макрон денеска повика на зголемен притисок врз Москва за да се стави крај на војната во Украина, по самитот меѓу американскиот претседател Доналд Трамп и рускиот лидер Владимир Путин во Анкориџ, Алјаска.
Во објава на социјалната мрежа Х, Макрон истакна дека заедно со европските колеги смета оти е неопходно да се одржи притисок врз Русија сè додека нејзината инвазија врз Украина не заврши и не се постигне траен мир што ги почитува правата на Украина.
Тој нагласи дека цврстиот мир мора да биде проследен со непоколебливи безбедносни гаранции.
„Ja поздравувам подготвеноста на СAD да придонесат во овој процес“, напиша Макрон, додавајќи дека за конкретен напредок е потребна нова средба на „Коалицијата на podgotvenite“, алијанса од околу 30 земји предводена од Велика Британија и Франција, која ја поддржува Украина.
Макрон, исто така, повика на извлекување поуки од последните 30 години, особено од „ добро познатата тенденција на Русија да не ги почитува своите обврски“.
Разговорите во Анкориџ меѓу Трамп и Путин беа опишани како продуктивни, но не беа објавени конкретни резултати.
Свет
Орбан вели дека светот е побезбедно место по средбата меѓу Трамп и Путин

Светот е побезбедно место по средбата меѓу американскиот претседател Доналд Трамп и неговиот руски колега Владимир Путин во Алјаска, изјави денеска унгарскиот премиер Виктор Орбан.
„Со години гледавме како двете најголеми нуклеарни сили ја елиминираат рамката на нивната соработка и си испраќаат пораки едни на други“, напиша Орбан на Фејсбук.
Тој додаде дека сега таа практика е завршена.
„Светот денеска е побезбедно место отколку што беше вчера“, рече Орбан.
Светските лидери денес реагираа на самитот меѓу американскиот и рускиот претседател Доналд Трамп и Владимир Путин, а како што објавија медиумите, реакциите беа поделени – некои го критикуваа недостатокот на конкретни резултати, додека други ја нагласија важноста на самиот дијалог.
Свет
Русија во текот на ноќта лансираше 85 беспилотни летала кон Украина

Русија во текот на ноќта лансираше 85 беспилотни летала и една балистичка ракета кон територијата на Украина, објавија утринава украинските воздухопловни сили.
Нападите во текот на ноќта беа насочени кон области на линијата на фронтот во регионите Суми, Доњецк, Чернигов и Дњепропетровск, објавија воздухопловните сили на каналот Телеграм.
Оттаму, исто така, наведуваат дека нивните единици за противвоздушна одбрана уништиле 61 беспилотно летало.
Главниот штаб на украинските вооружени сили објави во својот дневен утрински извештај дека во текот на изминатите 24 часа на линијата на фронтот имало 139 судири со непријателот.
Од друга страна, руските системи за противвоздушна одбрана во текот на ноќта пресретнале и уништиле 29 украински дронови над различни руски региони, вклучувајќи 10 беспилотни летала над Ростовскиот регион, објавија утринава руските медиуми, повикувајќи се на руското Министерство за одбрана.
Американскиот претседател Доналд Трамп и неговиот руски колега Владимир Путин, по нивната вчерашна средба во Алјаска, не споменаа ништо за потенцијален прекин на огнот во војната во Украина.