Илјадници луѓе во неделата излегоа на улиците на Москва и два други града во Русија за да протестираат против построгите интернет-ограничувања што владата ги најави минатиот месец.

Пратениците минатиот месец ја поддржаа легислативата со која се наложуваат построги интернет-контроли за кои тие велат дека се неопходни за да се спречи мешањето на други држави во руските политики. Но, некои руски медиуми ја споредија одлуката со онлајн-железна завеса, а критичарите велат дека тоа може да се искористи за да се задуши несогласувањето со владините политики.

Демонстрантите држеа говори и извикуваа слогани, како што се: „Оставете го интернетот“ и „’Не’ за изолација, престанете да го расипувате рускиот интернет“.

Според една невладина организација, на протестите се собраа околу 15.000 луѓе, а московската полиција рече дека оваа бројка изнесува околу 6.500.

„Ако не направиме ништо, ситуацијата ќе се влоши. Властите ќе продолжат да се движат по својот пат и ќе ја преминеме онаа точка од каде што нема враќање“, изјави еден од демонстрантите.

Активистите на опозицијата на „Твитер“ објавија дека полицијата уапсила 15 лица на протестот во Москва конфискувајќи им ги банерите и балоните. Полицијата не најави притвор за ниту еден од нив.

Во последните неколку години Русија прави напори да ја намали интернет-слободата на корисниците преку блокирање на пристапот до одредени веб-страници и сервиси за пораки, како што е „Телеграм“.

Со новата легислатива рускиот интернет-сообраќај и податоците би се пренасочувале кон мрежни точки контролирани од државата, а предлага и создавање национален доменски именски систем (ДНС) за да се овозможи функционирање на интернетот дури и ако земјата е отсечена од странска инфраструктура.

Легислативата е дел од напорите на властите да ја зголемат руската контрола врз својот интернет-сообраќај.