Македонија
Димитров во Грција: Нема да застанам додека не ги убедиме сите дека договорот беше вистински потег
На првиот ден од својата работна посета на Атина, министерот за надворешни работи, Никола Димитров, оствари средба со претседателот на парламентот, Николаос Вуцис.
На средбата соговорниците го изразија своето задоволство од завршувањето на внатрешните процедури во двете земји во контекст на ратификацијата на договорот од Преспа и неговото стапување во сила, како и заложбите од двете страни за негово успешно имплементирање.
Димитров истакна дека тоа е историски чекор и значајна демонстрација на заложбите за градење добрососедство, инклузивна соработка, конструктивни и позитивни односи.
„Мислам дека отворивме огромен потенцијал за односите меѓу двете земји и нема да застанам сè додека не го убедиме и последниот граѓанин – и во Грција и во Северна Македонија – дека ова беше вистинскиот потег и дека нашите две нации се природни сојузници. Ние сме соседи, а не може да се гради пријателство со соседот, без да се покаже почит и разбирање за другиот, и мислам дека ние сега почнуваме да го градиме нашето пријателство“, рече Димитров.
Димитров ја потенцира важноста и воедно се заблагодари што токму грчкиот парламент беше првиот што го ратификува пристапниот протокол за членство во НАТО и додаде дека Република Северна Македонија очекува процесот да биде финализиран до крајот на оваа година. Тој се осврна и на напорите што Владата ги прави за зајакнување на спроведувањето на тековните реформи за почеток на преговорите за пристапување во ЕУ во јуни оваа година.
Претседателот на грчкиот парламент, Николаос Вуцис, потенцира дека договорот од Преспа отвора пат за пријателство и партнерство меѓу двете земји. Изрази уверување дека грчката страна при неговото имплементирањето ќе вложи напори за видливи резултати во сите аспекти на соработка. Тој истакна дека во парламентот, каде што се дискутира и ратификува договорот од Преспа, треба да се формираат комисии на пријателство меѓу Грција и Република Северна Македонија и да му се даде поддршка на европскиот пат на нашата земја во контекст на почнување на преговорите за ЕУ-членство.
За време на посетата на Атина министерот Димитров ќе се сретне и со грчкиот колега, Катругалос, а во рамките на академската конференцијата „Грчката надворешна политика во 21 век“, организирана од поранешниот министер за надворешни работи на Грција, Никос Коѕијас, утре, Димитров ќе се обрати на панелот „Трансформацијата во југоисточниот Медитеран“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Силјановска: Како никој не се сети да им каже во ЕУ дека самите во член 4 гарантираат немешање во внатрешните работи и почитување на уставните структури
Како може некому да ветите дека ќе го смените Уставот, кога Уставот може да го сменат само пратениците во Уставот. Како знаете, дека вие можете однапред да ветите нешто што не е ваша надлежност?, му порача кандидатката за претседателка од ВМРО-ДПМНЕ, Гордана Силјановска-Давкова на нејзиниот опонент Стево Пендаровски во телевизиско соочување вечерва.
„Деновиве Макрон даде изјава дека ЕУ не е само територија, туку е концепција на човештвото и правото. Е, од тоа тргнувам и јас кога размилувам за ЕУ. За нејзините темелни вредности и принципи без кои таа не е политине заедница туку е само машинерија. Значи таа не е догма. Што ќе направам јас? Најпрво ќе направам регионални чекори. Штом ќе завршат изборите јас сакам да разговарам со моите соседи и заради регионалната политика и заради очекуваната поддршка од нив. Сакам да објаснам дека и кога има една преговарачка рамка не е логична заканата со вето. И дека може, дури и кога преговарачката рамка е ваква, низ интерпретација поинаква да се примени. Од типот, ако вие речете дека нема да употребувате вето за идентитески прашања, за историските дилеми и слично, протоколите, туку за Копенхагенските критериуми, јас ќе бидам сосема согласна. Значи, мислам дека е време кога ќе се смени власта, да чуе што мислиме и ние. Оти тоа е дијалогот што е нужен за добрососедски односи. Ако некој не го кажувал и ова досега, веројатно и тогаш било се во нивни раце“, рече Силјановска-Давкова.
Понатаму, како што додаде, како никој не се сетил да им каже на оние од Советот и од Европската комисија и сите останати со тоа се рушат темелните вредности на ЕУ? Бидејќи ЕУ гарантира во членот 4 почитување на уставните и политичките структури, немешање во внатрешните работи, почитување на дигнитет и интегритет, различности, неставање на билатерални спорови во рамката. Ако тоа не го кажете, вие ќе останете на прагматичните решенија.
Доаде и дека ниту еден од темелите на кои почивала програмата на Пендаровски во 2019 година не останале. Сите се урнале и ништо не е остварено.
Македонија
СДСМ за Димитриевски: Ароганција е кога човек-партија одработува против своите довчерашни сопартијци
Ароганција е кога човек-партија одработува против своите довчерашни сопартијци и во тоа нема ништо социјалдемократски ниту вредносно туку единствено и само личен интерес, реагира СДСМ по обвинувањата кои ги упати Максим Димитриевски од ЗНАМ, дека дозволиле отварање на бугарски клубови во Македонија и нивната ароганција е ненадминлива.
„За тоа кој ги отвораше клубовите со имиња како Ванчо Михајлов адресата е Белиот дворец на ДПМНЕ. Многу позната адреса каде ЗНАМ ги договара идните чекори за соработка заедно со поддршката на Гордана Силјановска Давкова.
Освен сликите на Ванчо Михајлов по штабовите на ДПМНЕ доволно говорат сликите на Мицкоски со основачите на тие клубови по манастирите низ државава за кои не слушнавме ниту збор од ЗНАМ.
Дали е тоа поради враќање на стари долгови за локалните избори 2021 година во Куманово или нови долгови јавноста ќе види многу скоро“, се вели во реакцијата на СДСМ.
Македонија
Утревечер и во петок нестабилно време со пороен дожд и грмежи
Времето утре ќе биде променливо облачно.
Од пладневните часови на повеќе места ќе биде нестабилно со пороен дожд и грмежи, локално во форма на краткотрајно невреме со засилен ветер и услови за изолирана појава на град. Услови за пороен дожд ќе има во текот на ноќта. Минималната температура ќе биде во интервал од 6 до 12, а максималната ќе достигне од 18 до 25 степени.
Во Скопје променливо облачно. Од пладневните часови во делови од котлината ќе биде нестабилно со пороен дожд, грмежи, засилен ветер и услови за изолирана појава на краткотрајно невреме. Минималната температура ќе се спушти до 12, а максималната ќе достигне до 23 степени, јавува УХМР.
Во наредните денови, следува период на променливо облачно време со повремени локални врнежи од дожд. Утре, во ноќта кон петок и во петок на повеќе места ќе има развој на нестабилна облачност проследена со пороен дожд и грмежи, локално во форма на краткотрајно невреме со засилен ветер и услови за изолирана појава на град.
Дневната температура од утре до сабота ќе биде во постепено опаѓање, а во недела ќе се покачи за 2 до 4 степени..