Свет
Принцот Чарлс и неговата сопруга во историска посета на Куба
Принцот Чарлс и неговата сопруга Камила утре тргнуваат на својата карипска турнеја, со која ќе станат првите членови на британското кралско семејство кои ќе ја посетат комунистичка Куба и тоа во екот на зголеменото непријателство на најблискиот британски сојузник, САД, кон оваа држава.
Кралската двојка на 24 март ќе слета во Хавана, каде што ќе поминат три дена и ќе вечераат со кубанскиот претседател Мигел Дијаз, кој минатата година го замени Раул Кастро, објави агенцијата „Ројтерс“.
Принцот Чарлс, наследник на британскиот престол, веќе се сретна со кубанскиот претседател во ноември минатата година, на неговиот 70-ти роденден, кога Дијаз беше во посета на Лондон.
„Ова е признание не само за кубанскиот народ, туку и за владата и им покажува на САД дека сепак не сме толку изолирани“, истакнала жителката на Хавана, Кира Љерена.
Ова патување се одвива додека администрацијата на Трамп интензивно се обидува да стави крај на она што го нарекува „тиранска тројка“ во Латинска Америка – социјалистичките влади на Венецуела, Никарагва и Куба. Оттука, најавената посета предизвика некои контроверзии.
Американскиот сенатор Рик Скот од Флорида, каде што се наоѓа најголемата заедница на кубански емигранти, јавно го покани принцот Чарлс да го откаже патувањето и наместо тоа да ја посети Флорида и да оствари средба со кубанските дисиденти.
Иако комунизмот и благородништвото тешко може да се сметаат за пријатели, во Хавана има мала спомен-градина во чест на принцезата Дијана, првата сопруга на Чарлс.
„Таа беше многу сакана во Куба“, изјавила 73-годишната Маргарита Рего од канцеларијата за историја на градот и додала дека Кубанците слушнале за неа од странски магазини.
Меѓутоа, повеќето луѓе во Куба знаат многу малку за британското кралско семејство, па така повеќето се рамнодушни на оваа посета.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Трамп казнет со 9.000 долари
Помалку од седум месеци пред претседателските избори во ноември, на републиканскиот кандидат Доналд Трамп му се суди затоа што се обидел да го купи молкот на поранешната порно ѕвезда Сторми Даниелс неколку дена по изборите во 2016 година на кои ја победи демократската кандидатка Хилари Клинтон.
Судијата Хуан Мерчан рече дека Трамп е казнет со 9.000 долари поради кршење на забраната за коментирање на сведоци. Обвинителите го обвинија поранешниот претседател дека повеќе пати ја прекршил забраната за коментирање и побараа од судијата да го казни со 1.000 долари по прекршок, пишува Гардијан.
Според забраната, Трамп не смее да дава, или да наложува други да даваат јавни изјави за сведоците на судењето, обвинителите и членовите на судскиот персонал. Пред судењето, судијата Мерчан ја прошири оваа забрана за коментирање на членовите на семејството откако Трамп напиша објава за ќерката на Мерчан.
Трамп мора да отстрани седум навредливи објави од социјалната мрежа „Truth Social“ и две објави од неговата веб-страница на кампањата до 14:15 часот. „Го предупредуваме обвинетиот дека судот нема да толерира натамошно кршење на правните наредби и дека доколку е потребно и соодветно со оглед на околностите ќе биде осуден на затворска казна“, се вели во судската пресуда.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.
Европа
(Видео) Полицијата го бркаше убиецот со меч низ Лондон, објавена е снимка
Би-би-си објави снимка на која се гледа лондонската полиција која го брка напаѓачот со нож, кој денеска уби 13-годишно момче и повреди неколку други.
На снимката се слушаат полицајците како им викаат на граѓаните: „Заклучете ги вратите“.
Полицијата смета дека не се работи за терористички напад.
Полицајците уапсија маж вооружен со меч по извештаите за сериозен инцидент со прободување во североисточен Лондон.
Со електрошокер бил совладан 36-годишниот маж кој мавтал со меч.
„Со голема тага можам да потврдам дека 13-годишното момче кое беше избодено, почина во болница набргу откако му биле нанесени убодите“, изјави началникот на лондонската полиција Стјуарт Бел.
Уште две лица и двајца полицајци се во болница поради убодни рани и се надвор од животна опасност.
„Не мислиме дека постои закана за пошироката заедница, полицијата не бара други осомничени и се чини дека овој инцидент не е поврзан со тероризам“, рече Бел.