Иванов е против професионализација на безбедносните служби и општество што штити од дискриминација, изјави денеска пратеничка од СДСМ, Јагода Шахпаска, на прес-конференција во Собранието.

„Со непотпишувањето на указите за рефомските закони, меѓу кои законот за оперативно-техничка агенција и за електронски комуникации, Ѓорге Иванов се потврди како кочничар на реформите и противник на професионалнилизација на безбедносните служби. Освен овие закони, Иванов одбива да го потпише и указот на законот за заштита од дискриминација. Со тоа Иванов се потврдува како промотор на дискриминацијата и противник на професионална Државна комисија за заштита од дискриминација. Како што го почна, така и го завршува мандатот. Иванов е против реформскиот процес, Иванов е против концептот фер општество, кое штити од секаков облик на дискриминација“, рече Шахпаска.

И во последните денови од мандатот, вели Шахпаска, Иванов останува доследен во своето дејствување спротивно на интересите на граѓаните и државата.

„Од сето ова добро е што мандатот на Иванов истекува набргу. На Република Северна Македонија не ѝ се потребни политичари кои се дел од деструктивната матрица на Никола Груевски, како што е Иванов, политичари што сакаат државата да се враќа назад, во изолација и неизвесност“, рече пратеничката.

Додаде дека граѓаните на претстојните претседателски избори ќе изберат претседател кој достоинствено ќе ја претставува државата и ќе работи во интерес на граѓаните.