Македонија
Арсовски: Заев да одговори дали фирмите во Бугарија се отворени за учество во рудникот „Иловица“

Зоран Заев се крие по скандалот со трите фирми што кланот Заеви ги отворил во еден стан во Петрич во соседна Република Бугарија, изјави портпаролот на ВМРО-ДПМНЕ, Димче Арсовски.
Арсовски изрази сомнеж дека овие фирми, или барем две од нив, се отворени со намена да учествуваат во работењето на рудникот „Иловица“ во Струмичко.
„Рудник за кој претходно Зоран Заев беше против да се гради, но сега полека ја менува реториката. Прашуваме, дали Заеви ги отворија овие фирми, чија дејност е транспорт и логистика на две од три фирми, за да добијат бизнис што се проценува дека е вреден најмалку 10 милиони евра годишно за транспорт на целата руда од Иловица до Република Бугарија, каде што таа руда ќе се топи? Одговорот треба да го даде Зоран Заев. Знаејќи дека Зоран Заев е главниот на кланот Заеви, кој уште од периодот кога беше градоначалник овозможуваше тендери за семејните и пајташките фирми, ваквиот сомнеж со право се поставува како прашање. Дополнително, јавноста се сеќава дека една од семејните фирми на Заеви кога тој стана премиер на Република Македонија доби концесија од Владата на Заев, односно од сам себе, за ископување минерални суровини“, рече Арсовски.
Тој додаде дека граѓаните веќе слушнале и за скандалот кога камиони со струмички таблички во сопственост на фирма на Заеви транспортирала јаглен во РЕК „Битола“. Според Арсовски, тоа значи дека постојат сериозни индиции дека и досега семејните фирми на Заев со негова помош и знаење добивале бизниси за ископ на суровини и за транспорт на руда.
„Затоа, со право се поставува прашањето дали фирмите на Заеви во Бугарија треба да добијат бизнис во рудникот ‘Иловица’, притоа да се преставуваат како странски фирми и на тој начин да го зголемат своето богатство за стотици милиони евра во наредните години?
Одговори за ова мора да има. Секој молк од страна на Заев се толкува како потврда дека ова што го говориме е точно. Тој молчи со денови и со денови се крие. Очекуваме дека кога ќе заврши фазата криење, ќе почне да се заканува до медиумите, до партијата, но она што вистински треба да го направи е да одговори за која цел се отворени фирмите на Заеви во Петрич и зошто безобразно ја лажеше јавноста дека нема фирми во странство“, рече Арсовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муцунски во Париз ја реафирмира стратешката ориентација на државата кон членството во ЕУ

Во рамки на работната посета на Париз, министерот за надворешни работи и надворешна трговија, Тимчо Муцунски, оствари одделни средби со претседателката на Интерпарламентарната група за пријателство Франција – Западен Балкан, сенаторката Марта де Сидрак, и со советникот на францускиот претседател Емануел Макрон за Континентална Европа и Турција, Бертран Бишвалтер.
На средбата во францускиот Сенат беше истакнато значењето на парламентарната дипломатија во градењето на стабилни и севкупни односи меѓу двете земји. Се разговараше за европската перспектива на Северна Македонија и регионот, како и за можностите за унапредување на парламентарната соработка и продлабочување на политичките и економските врски. Посебен акцент беше ставен на доследната поддршка од француска страна за македонските евроинтеграции.
На средбата со советникот Бишвалтер беа отворени прашања од заеднички интерес, вклучително и актуелните геополитички предизвици во Европа, важноста на регионалната соработка, партнерството и придонесот на Република Северна Македонија во рамките на НАТО Алијансата, како и понатамошното јакнење на соработка во контекст на европската и регионалната стабилност.
Министерот Муцунски ја реафирмираше стратешката ориентација на државата кон членството во Европската Унија, како и континуираната посветеност на реформските процеси и на добрососедските односи. Воедно, беше потврдена значајната улога на Франција како силен поддржувач на европската перспектива на Северна Македонија и на регионот, со цврста определба оваа поддршка да продолжи со несмален интензитет и во наредниот период.
Македонија
ВМРО-ДПМНЕ: По трагедијата во Кочани целосно се забрани употреба на пиротехника во затворен простор

СДС брутално и очигледно ја злоупотребува трагедијата во Кочани, со очајнички обиди да фрлат песок во очите на јавноста и со нивните лаги да ја засенат вистината, реагираат од ВМРО-ДПМНЕ, на обвинувањата од потпретседателот на СДСМ, Методија Илиевски.
„За разлика од претходната власт сега има сеопфатна, темелна истрага за трагедијата во Кочани во која беа опфатени поранешни и сегашни функционери, од кои некои се во притвор, а тоа е доказ дека сега има одговорност и неселективност. Владата на ВМРО-ДПМНЕ за разлика од претходната власт, донесе серија законски, измени со кои тотално се забранува употреба на пиротехнички средства во затворен простор, со цел да нема импровизации кои во иднина би резултирале со несреќи“, велат од партијата.
Од ВМРО-ДПМНЕ додаваат дека санкциите за прекршување на оваа забрана драстично се зголемени, но исто така утврдена е и строга одговорност за нелегално присуство на малолетници по полноќ во угостителски објекти, со цел заштита на младата популација.
„Ова се ефикасни законски мерки со кои се воведува одговорност и ефективен надзор, мерки кои гарантираат заштита на јавноста во затворени простории. Оваа Влада демонстрира одговорност со максимална сериозност и законски механизми ја брани јавната безбедност, води транспарентна и структурирана одговорност кон сите виновници без исклучок“, велат од партијата.
Македонија
АХВ: Засилени мерки по појавата на ново жариште на чума кај малите преживари во Албанија

Агенцијата за храна и ветеринарство (АХВ) воведе мерки на засилен надзор на болеста чума кај малите преживари, особено во регионот на Западна Македонија, со цел спречување на внесување и ширење на болеста од соседна Албанија во земјава.
Засилена е контролата на движењето и транспортот на животни од видовите овци и кози по добиеното известување вчера вечер преку европскиот систем за пријава на болести (ADIS) на Светската организација за здравствена заштита на животните – WOAH, дека во Република Албанија во областа Дебар, во место Кастриот, на фарма со 200 кози има појава на ново жариште на болеста, по пријавата на првиот случај неодамна во областа Скадар.
АХВ донесе Решение за забрана за увоз и транзит на живи домашни и диви мали преживари, семе, јајце клетки и емброни од домашни и диви мали преживари, месо од домашни и диви мали праживари, производи и преработки од месо од домашни и диви мали преживари, млеко и производи од млеко од домашни и диви мали преживари, како и нуспроизводи од домашни и диви мали преживари во Република Северна Македонија од РепубликаАлбанија, со цел спречување на можноста за ширење на болеста.
Со оглед на новонастаната состојба, а заради намалување на ризикот од појава и проширување на болеста, АХВ ги извести ветеринарните друштва и официјалните ветеринари за спроведување на засилен надзор на одгледувалиштата со овци и кози и пријавување на секој сомнителен случај на болеста. На сила останува Решението за безбедносни мерки во однос на болеста чума кај мали преживари кое Агенцијата за храна и ветеринарство го донесе на 09.08.2024 година.
Агенцијата за храна и ветеринарство го извести Министерството за внатрешни работи за новонастанатата ситуација со појава на болеста во пограничниот регион со Македонија за преземање на засилени мерки за надзор и спречување на евентуален шверц со живи животни од видовите овци и кози од Албанија во нашата земја.