НВО Инфоцентарот, во рамки на проектот „Граѓанско набљудување на Народниот правобранител“, поддржан од Амбасадата на Соединетите Американски Држави, спроведе анкетно истражување за тоа какви се перцепциите и ставовите на граѓаните за работата и перформансите на Народниот правобранител.

Резултатите покажуваат дека речиси половина од испитаниците не знаат каде и како можат да му се обратат на Народниот правобранител што, според спроведувачите на истражувањето, недвосмислено укажува на потребата од поголема промоција и видливост на оваа институција.

Повеќе од половината испитаници се изјасниле дека Народниот правобранител е професионален во своето работење, а 47 проценти од испитаниците сметаат дека оваа институција е транспарентна. Речиси 40 проценти од испитаниците сметаат дека Народниот правобранител е независен во своето работење. Нешто над 40 проценти од испитаниците мислат дека Народниот правобранител е поставен на таа позиција заради својата блискост со власта, додека 37 отсто сметаат дека тој се наоѓа на таа позиција благодарение на својата стручност.

Според истражувањето, 66,6 проценти, знаат за постоењето на институцијата Народен правобранител, а солиден број се запознаени со дел од нејзините основни надлежности. За Народниот правобранител најмногу слушнале испитаниците од Источниот регион – 85,2 проценти, а најмалку оние од Полошкиот – 43,8 отсто. Повозрасните граѓани се повеќе информирани за Народниот правобранител, додека младите од 18 до 29 години, се најмалку информирани за постоењето на оваа институција.

Голем дел од граѓаните, 76,3 проценти, се подготвени да му се обратат на Народниот правобранител доколку им е повредено некое право.

„Овој висок процент покажува дека граѓаните ја препознаваат оваа институција како заштитник на нивните права наспроти државните и јавните институции“, се наведува во извештајот од анкетата.

Резултатите од оваа анкета, како што се оценува, укажуваат на потребата од натамошно засилување на интегритетот, професионалноста, стручноста и транспарентноста на Народниот правобранител, што пак, неминовно ќе води кон независност и зголемена доверба на граѓаните спрема оваа институција.

Анкетата беше спроведена на повеќеслоен стратификуван примерок од 1.202 испитаници, постари од 18 години. Примерокот е национално репрезентативен според пол, возраст, етничка припадност, регион и место на живеење.