Македонија
Денеска е Светскиот ден на бездомните животни, „Анима мунди“ посочи на неопходни законски измени
По повод Светскиот ден на бездомните животни, здружението „Анима мунди“ повтори дека заедно со 16 здруженија бараат измени и дополнувања на Законот за заштита и благосостојба на животните кој е во процедура и конечно, пред сè законска забрана за еутаназија на бездомните животни. Според нив, ова е единствен закон кој примарно мора да ги штити правата на животните, пред сè нивното право на живот.
„Не сме задоволни со досегашните измени, не прифаќаме игнорирање на она што е наше основно барање и фокус со години: Барање за јасна, децидна забрана за еутаназија како механизам за справување со бездомната популација кучиња затоа што усмртувањето се применува со децении и не донело резултат, го продлабочило проблемот, дало можност на надлежните наместо трајно решавање, само да симулираат привидно намалување фокусирајќи се на краткорочни ефекти, а потоа драстично продлабочување на проблемот што ги изложува граѓаните на опасност. Убивањето крај нема. Сега откако за првпат коректно се уредува одговорното сопствеништво во рамки на законот, што го поддржуваме, на којашто ургентност и важност укажувавме со години, затоа што неодговорните сопственици се причинител бр. 1 за прилив на нови и нови бездомни кучиња на улиците, итно е потребно со закон да се забрани убивањето на бездомните животни и спречи произволноста, неодговорноста, нехуманоста со која општинските власти манипулираат, животните се убиваат, се трошат општинските ресурси, а проблемот се продлабочува до недоглед“, велат од „Анима мунди“.
Освен забраната за еутаназија на здрави бездомни животни, животни кои се излечиво болни и животни за кои постои интерес да бидат вдомени, тие бараат дефинирање на дополнителни забрани кои ќе ја унапредат заштитата и благосостојбата на животните. Тука посочуваат на забрана за чување кучиња постојано врзани на синџир или во бокс, без да се овозможи слободно движење надвор од тој бокс; забрана за чување, одгледување и користење копитари во урбана средина; забрана за користење копитари за извлекување дрва; забрана за колење и усмртување животни во ритуални обреди, надвор од кланици; забрана за одгледување кокошки во основен кафезен систем.
Велат дека законско овластување на здруженијата за заштита на животни за спроведување одредени одредби на законот, вршење надзор, проверка на одговорното сопствеништво, т.е. измени од кои би произлегла можноста за наменски овластена служба за заштита на животните формирана од претставници на здруженијата за заштита на животни.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во тек е исплатата на правата од социјална и детска заштита
Министерството за социјална политика, демографија и млади информира дека денеска започна исплатата на правата од социјална, детска и цивилна заштита за месец септември 2024 година.
Корисниците на парични права коишто поседуваат дебитна картичка ќе можат да подигнат готовина на банкоматите на банките, да ги користат средствата за безготовински плаќања во продажната мрежа или преку електронско и мобилно банкарство од денеска, 04 октомври 2024 година.
Со цел да се избегне метеж пред и во банките при исплата на правата, за корисниците кои не користат картички, исплатата, како што соопшти министерството, ќе се спроведе во 2 групи во сите отворени филијали и експозитури на банките, согласно со утврдениот распоред по азбучен ред, според првата буква од презимето и тоа:
– 04.10.2024– А, Б, В, Г, Д, Ѓ, Е, Ж, З, Ѕ, И, Ј, К, Л, Љ
– 07.10.2024– М, Н, Њ, О, П, Р С, Т, Ќ, У, Ф, Х, Ц, Ч, Џ, Ш
Македонија
Има интерес од доктори што работат во приватните да се вратат во јавните здравствени установи, рече Таравари
Има интерес од доктори што работат во приватните клиники да се вратат во државните, истакна министерот за здравство, Арбен Таравари, на денешната прес-конференција по повод 100 дена нова Влада.
„Имаше забрана од тогашната влада од јули или авуст 2022 година да не може од приватните да преминат во јавните здравствени установи. Пред три недели помина на Влада да се тргне таа забрана и сега подготвуваме правилник во Министерството за здравство. Не може сите доктори, туку само оние што се специјалисти, како фармацевти, стоматолози, анестезиолози, радиолози, но само доколку директорот на клиниката ни каже дека има потреба од тие кадри, а тие се докажани и во одреден период заминале и сега гледаат надеж во јавното здравство и сакаат да се вратат. Само кај мене се јавиле 10-ина доктори колеги, кои се врвни стручњаци во нашата држава и полека почнуваме да ги враќаме“, посочи министертот Таравари.
Според него, ова е навистина добар чекор и се надева дека в година ќе се продолжи со враќање на докторите во државните здравствени установи.
Таравари додаде и дека унапредувањето на здравствената заштита на сите граѓани било главен приоритет во изминатите 100 дена.
„За таа цел, заедно со нашиот тим во континуитет сме посветени да им излеземе во пресрет на потребите на пациентите и на сите фактори во здравствениот систем во Македонија. Позитивната листа мислам е најглавната работа што ја реализиравме. Се работи за 9 нови генерички лека, односно вкупно 87 лека во разни пакувања. Реализиравме заштеда со укинување на економските директори. По нормална процедура ја поминавме во Владата претходно, потоа и во парламентот и сега на сите клиники и во сите болници што имаат над 1.000 вработени практично имаме по еден директор“, рече министерот Таравари.
Македонија
Денеска, во Прилеп, знамињата истакнати на половина копје и прогласен ден на жалост поради трагичната смрт на трите медицински лица
Денешниот ден, петок, 4 октомври, е ден на жалост во Прилеп поради трагичната смрт на трите медицински лица, кои вчера изутринава загинаа во тешка сообраќајна несреќа на патот Прилеп – Битола. Во несреќата загинаа: радиологот примариус д-р Александар Ристески, гинекологот Никола Василески и Фанче Јованоска, радиолошки технолог.
Советот на Општина Прилеп одлуката ја донесе синоќа на вонредна седница.
Денеска, знамињата во општината се истакнати на половина копје, а сите културни и спортски манифестации се одложуваат за следниот ден.
„Прилеп и Македонија загубија врвни лекари специјалисти, еминетни и почитувани луѓе, посветени и одговорни граѓани, кои спасувале илјадници човечки животи и им помагале на многу луѓе со својата специјалност, но ги загубија животите патувајќи токму на своите работни места во Битола за да им помогнат на други луѓе. Прилеп вечно ќе се сеќава на прим. д-р Александар Ристески, спец. радиолог, д-р Никола Василески, гинеколог и Фанче Јованоска, радиолошки технолог, кои ќе бидат вечна наша тага и непребол“, рече прилепскиот градоначалник Борче Јовчески по донесувањето на одлуката на Советот за денешниот ден, петок, 4 октомври, да биде ден на жалост во Прилеп.