Премиерот Заев во средата (3 април), имал телефонски разговор со германската канцеларка Ангела Меркел, информираат од владината прес-служба.

Како што стои во соопштението, во телефонскиот разговор било потврдено дека посетата што ја остварил грчкиот премиер Ципрас на земјава, како и заедничката владина седница се историски момент за регионот.

Заев ја информирал канцеларката дека владите потпишале неколку договори за зацврстување и развој на соработката. Тој зборувал и за другите политички настани во државата, како одржувањето на отворен дијалог со опозицијата во врска со реформите и нагласил дека дијалогот во врска со иднината на Специјалното јавно обвинителство е сѐ уште во тек.

Премиерот ѝ се заблагодарил на канцеларката за поддршката што Германија ја давала во сите процеси, вклучително и надминувањето на спорот за името со соседна Грција, внатрешните реформи, а особено за економскиот советник што Германија го обезбеди со цел да ѝ помага на Владата.

Заев воедно побарал и поддршка во врска со одлуката за почеток на преговорите која треба да ја донесе Советот на ЕУ во јуни.

„Со оглед на тоа дека државата има статус на земја кандидат за членство во ЕУ од 2005 година, го склучи Договорот од Преспа и постигна резултати во поглед на реформските процеси, време е Советот на ЕУ да донесе позитивна одлука за отворање на пристапните преговори. Оваа одлука ќе претставува дополнително охрабрување за да се продолжи со реформите во Северна Македонија“, истакнал тој во разговорот.

Канцеларката Меркел го поздравила позитивниот развој на спроведувањето на Договорот од Преспа, како и спроведувањето на домашните реформи преку отворен дијалог со опозицијата, што, според неа, ќе донесе конкретни и позитивни резултати.