Македонија
Донација од речиси милион евра од Чешка за МВР

„Денешниот настан не е само важен во однос на натамошното унапредување на техничко-организациските капацитети на Министерството за внатрешни работи, туку уште повеќе тој е значаен како силен показател на едно веќе етаблирано, искрено и конкретно партнерство и поддршка што во годините претходно ја имаме од нашите колеги од чешкото Министерство за внатрешни работи и од владата на пријателска Република Чешка“, рече министерот Оливер Спасовски по потпишувањето на договорот за донација од Чешка за МВР од речиси еден милион евра.
„Преку договорот што пред малку го парафиравме со министерот за внатрешни работи на Република Чешка, Хамачек, за користење на финансиската донација од речиси еден милион евра, ние продолжуваме во насока на реализирање на заедничките цели, а тоа се високите и квалитетни безбедносни стандарди во интерес на граѓаните. Финансиските средства се наменети за активности поврзани со зајакнување на капацитетите на одделите за гранични работи и миграции за сузбивање организиран и сериозен криминал, како и за воздухопловните единици при МВР“, рече Спасовски.
Со оваа донација се проширува опсегот на меѓусебна соработка во повеќе безбедносни сегменти од заемен интерес за техничко осовременување и доопремување на неколку организациски единици при МВР со посебен акцент на миграциската проблематика.
„Колегите од чешката полиција во континуитет се присутни на нашата јужна граница од 2016 година до денес, каде што заедно со припадниците на нашето Министерство заеднички остваруваат задачи на обезбедување на граничниот појас. Сакам на крајот во оваа пригода во свое и во име на Министерството уште еднаш да им се заблагодарам на нашите пријатели за помошта и поддршката што ја добиваме убеден дека таа наша соработка не само што ќе продолжи во иднина туку и ќе биде значително интензивирана во интерес на националната, регионалната и глобалната безбедност“, рече Спасовски.
Министерот Хамачек потенцира дека Република Чешка и во иднина ќе продолжи да ѝ помага на земјава на патот кон евро-атлантските интеграции, а денешната посета е еден од конкретните примери за одличната соработка меѓу двете држави.
„Република Чешка е пријател на Република Северна Македонија, кој ќе ѝ помага на нејзиниот пат“, рече министерот Хамачек.
Покрај финансиската помош, веќе неколку години полициски службеници од Република Чешка ѝ помагаат на нашата полиција на јужната граница. Веднаш по завршувањето на денешната средба, министрите Спасовски и Хамачек ги посетија овие полициски службеници,изразувајќи им благодарност за нивниот придонес за гарантирање на безбедноста на јужната граница.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Истрагата за трагедијата во Кочани е политички воден процес, тоа е фарса на добро организирана одбрана на вистинските виновници, велат од ДУИ

Секој ден излегуваат нови докази, кои потврдуваат дека истрагата за трагедијата во Кочани е политички воден процес, а не професионален или уште помалку независен процес.
Она што јавно ни се демонстрира воопшто не е истрага, туку фарса во насока на добро организирана одбрана на вистинските виновници, истакнува Арта Билали-Зендели од ДУИ.
Како што вели, 59 млади животи згаснаа во ужасна трагедија, а наместо одговорност од оние под чија заштита работел овој објект, оние што ги игнорирале и пријавите, и укажувањата, и неправилностите – системот од петни жили се труди да најде некој друг кому ќе ја префрли вината.
„Фактите што секојдневно излегуваат се сè појасни: Одредени професионалци во рамките на полицијата од Кочани не можеле да премолчат пред очигледните злоупотреби и подготвувале и испраќале таканаречени проблемски информации за состојбите во објектот ‘Пулс’.
Овие документи се најголемиот проблем на власта и нејзините полициски структури затоа што овие дописи не може да се игнорираат.
Токму затоа полициските структури, помогнати од власта, деноноќно работат на исполнување на нивниот монструозен план за префрлање на вината каде било, само не во сопствените редови.
Она што е јасно е дека преку овие архивирани дописи сите во полициската команда знаеле за малолетници што се забавувале по полноќ, за постојаните тепачки, за редовната дистрибуција на дрога, за безбедносните прекршоци, за очајните услови во кои работел објектот, па дури и за хаосот со паркирањето. Знаеле командирите во Кочани, началниците во Штип, раководителите во Бирото за јавна безбедност“.
Сето тоа, како што наведува, било документирано, било архивирано и сето тоа било и официјално пренесувано во целата полициска команда.
Според Зендели, наместо да преземат мерки, полицијата во март 2023 издала документи што му помогнале на газдата на „Пулс“ да добие лиценца.
„Наместо да го затворат објектот, тие му дале легален штит.
Повеќе од тоа, објектот работел цела година без никаква лиценца, а сите институции знаеле за тоа.
И не само што не реагирале, туку дозволиле реновирање, организирање на забави, а Управата за јавни приходи (УЈП) побарала била спречена да го затвори објектот.
И сега, после трагедијата, истите тие лица кои ги водат истите институции ја водат и истрагата, во која имаат основна задача да се заштитат самите себе.
Полициските структури, секако политички помогнати од власта, создаваат нова приказна во која ниту еден полициски раководител, ниту еден началник, ниту еден раководител на полицијата не е виновен.
Напротив, обвинет е поранешен министер за економија, човек кој никогаш не стапнал во Кочани, човек што нема апсолутно никаква надлежност за безбедносни проверки на објекти или контрола на локали“.
Оценува дека тука настапува монструозноста на овој план.
Како што додава, цинизмот со кој на јавна сцена не само што се прави обид да се скрие вистината и да се заштитат оние што се вистински одговорни, туку за тоа неправедно да се обвинат било кои поранешни функционери и претставници на опозицијата, претставува суштински монструозен план.
„Јасно е дека на власта не ѝ е потребна правда, туку алиби.
Тоа не смее да се премолчи и затоа јавно бараме:
Итна суспензија на целата командна структура по вертикала во МВР и Бирото за јавна безбедност, кои знаеле за проблемите со ПУЛС, а не реагирале.
Независна истрага, надвор од рацете на оние што ја овозможиле оваа трагедија, со цел да се утврди под чија заштита му е обезбедено на објектот ПУЛС да работи.
Отворање нов процес против сите оние кои активно работат на прикривање на вистината и креирање монструозни случаи како алиби за вистинските виновници“.
Нема да замолчиме, нагласува, и постојано ќе инсистираме на одговори затоа што не смееме да дозволиме оваа трагедија да биде покриена со лаги и монструозни манипулации.
Правда, според Зендели, мора да има.
Македонија
(Видео) Манасиевски: Дали Иван Пешевски е гласен синдикалец затоа што зема 80.000 денари плата, синдикалците на батерии се прочитани

Дали Иван Пешевски е гласен синдикалец затоа што зема 80.000 денари плати? – Синдикалците на батерии се прочитани, истакнува Валентин Манасиевски, член на ЦК на ВМРО-ДПМНЕ.
Како што додава, според информациите, кои до нив ги доставиле свиркачи од ССМ, на кои, како што вели, им е преку глава од злоупотребите на Трендафилов и Пешевски, овие двајца дебело профитираат.
„Имено, според информациите кои ги добивме, платата на Пешевски, кој деновиве глуми загрижен синдикалец е 3 пати поголема од минималната. Додека ги лаже работниците со минималец, Иван Пешевски, за 4 месеци заработува што тие за цела година. Но тука не застанува лицемерието на Иван Пешевски, тој во 2024 и првите два месеци од 2025 година остварил и приходи по други основи со договори на дело и заедно со плата инкасирал 1.3 милиони денари.
Преведено во минимални плати, Иване Пешевски кој ги лаже работниците за минималец лани земал пари колку еден работник од неговиот синдикат не може нити за 4 години“, подвлекува Манасиевски.
Оценува дека се демаскирани синдикалците на батерии Слободан Трендафилов и Иван Пешевски.
Нивните игри, според Манасиевски, се прочитани и никој не им верува.
Македонија
Општина Аеродром објави јавен повик за доделување признанија за особени постигнувања во разни области

Општина Аеродром објави јавен повик за доделување признанија за 2025 година на физички лица, односно поединци или група творци, кои се со живеалиште во Аеродром.
Признанијата се доделуваат како знак на општествено признание за особени постигнувања во стопанството, науката, уметноста, културата, спортот, воспитувањето и образованието, заштитата и унапредување на животната средина и природата, како и во други области на трудот и творештвото од значење за развојот на Општината и нејзина афирмација во државата и во светот, а тие можат да се доделат и постхумно на истакнати аеродромци.
Рокот за пријавување трае заклучно со 7 април 2025 година (понеделник).
Кандидатите можат да се пријават лично, како и да бидат предложени од правни и физички лица.