Свет
Британската полиција и Хоум офисот потврдија: Асанж е уапсен по барањето за екстрадиција од САД
Скотланд јард потврди дека Асанж бил уапсен по добивањето барање за негова екстрадиција од САД, пренесува „Гардијан“ . Во соопштението од полицијата се вели:
„Џулијан Асанж, денеска, четврток, 11 април, беше уапсен по барање на властите на САД по неговото доаѓање во централната лондонска полициска станица. Ова е барање за екстрадиција според Дел 73 од Законот за екстрадицијата. Тој ќе биде изведен пред судот во Вестминстер што е можно побргу“.
Британскиот Хоум офис го потврди барањето на екстрадиција на Асанж во САД поради наводен компјутерски криминал. Портпарол на Хоум офисот рече:
„Можеме да потврдиме дека Џулијан Асанж е уапсен во врска со барањето за екстрадиција од САД. Тој е обвинет за компјутерски криминал во САД“.
САД побараа екстрадиција на Асанж веднаш кога тој беше уапсен во Амбасадата на Еквадор во Лондон.
Од друга страна, во однос на можната екстрадиција на Асанж во САД, британскиот министер за Европа и за Америка, Алан Данкан, посочи дека Велика Британија не ги екстрадира луѓето во земји каде што би можеле да се соочат со смртна казна.
„Тоа е нашата широка политика во сите околности, така што еднакво важи и за Џулијан Асанж. Тој нема да биде екстрадиран ако се соочува со смртна казна“, изјави Данкан за „Скај њуз“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Претседателот на Колумбија: Ги раскинуваме дипломатските односи со Израел
Колумбискиот претседател Густаво Петро изјави дека ќе ги прекине дипломатските односи со Израел поради војната во Газа.
Петро претходно силно го критикуваше израелскиот премиер Бенјамин Нетанјаху и повика Колумбија да се приклучи на тужбата за геноцид на Јужна Африка против Израел пред Меѓународниот суд на правдата.
„Овде пред вас, владата на промени, претседателот на републиката, најавува дека утре ќе ги прекине дипломатските односи со државата Израел, затоа што има влада, затоа што има претседател геноциден“, рече Петро на собир по повод Меѓународниот ден на трудот.
Светот не може да биде слеп пред настаните во Газа, додаде тој.
Во шестмесечната воена операција на Тел Авив загинаа 34.488 Палестинци, а ранети се 77.643, според здравствените власти во Газа. Војната ги расели повеќето од 2,3 милиони жители на Појасот Газа и го уништи најголемиот дел од крајбрежната енклава.
Најавата на Петро за прекин на дипломатските односи со Израел доаѓа во екот на се почестите шпекулации дека Израел наскоро ќе го нападне градот Рафах во јужниот дел на Газа, каде што се засолниле повеќе од милион Палестинци раселени од своите домови.
Регион
Tлото на Балканот се тресе: По Хрватска, земјотреси и во Албанија и Грција
Два земјотреси, во растојание од една минута – во 19.19 и 19.20 часот – вечерва се регистрирани на територијата на Албанија.
Земјотресите се со интензитет од 2,1 степен според Рихеровата скала.
Епицентарот на првиот земјотрес бил на седум километри од Елбасан, додека вториот на 62 километри од Тирана.
Според информациите на ЕМСЦ, неколку минути претходно, земјотрес од 2,5 степени имало и во јужниот дел од Грција, а уште два од 2 и 2,3 степени се регистрирани предмалку на Крит.
Претходно денес, Хрватска ја погоди силен земјотрес од 4,7 степени, а беше почувствуван и во Босна и Херцеговина. По овој потрес, следеа неколку помали.
Свет
Хамас: Одговор за предлогот за примирје и ослободување на заложниците веројатно утре
Водачите на Хамас вечерва рекоа дека го проучуваат предлогот за примирје и ослободување на заложниците што им го претставија египетските посредници и велат дека се надеваат оти ќе го испратат својот одговор до утре, се вели во соопштението на палестинската милитантна група испратена до „Асошиејтед прес“.
Тековната рунда разговори за примирје меѓу Израел и Хамас изгледаат сериозни, но страните се во несогласување за едно клучно прашање – дали војната треба да заврши како дел од договорот, објави „Тајмс оф Израел“.
„Многу веројатно утре, односно четврток, ако даде Господ, посредниците ќе добијат одговор“, соопшти Хамас.
Преговорите меѓу Хамас и Израел, преку посредници како САД, Катар и Египет, траат со недели, а по Париз се водат нови рунди разговори во Каиро.