Македонија
Мицкоски: Граѓаните со право се разочарани, но овој пат се бориме за поразлична слика за македонскиот политичар

По дваесет и осум години остана многу малку од ентузијазмот со кој народот и државата влегоа во независноста, многу малку од луѓето денес се среќни и задоволни од она што го имаме, истакна во обраќање до јавноста лидерот на ВМРО-ДПМНЕ, Христијан Мицкоски.
Како што рече тој, од почетокот на кампањата минал преку 13 илјади километри и се сретнал со многу граѓани со кои разговарал за нивните проблеми.
„Слушав и за критиките кон оваа власт, но и за работата на претходните и јас како човек не се срамам да се извинам за грешките од минатото, за кои сум сигурен дека ги имало, но и да понудиме решенија заедно со граѓаните за иднината на нашата татковина. Ние се бориме за поразлична слика за македонскиот политичар“, вели претседателот на опозициската партија, кој своето обраќање особено го насочува кон оние што, како што кажа, се разочарани, потиштени и обесхрабрени.
Според Мицкоски, чувството на разочараност кај граѓаните е оправдано, но повикува со седење на страна да не се оправдуваат тие кои довеле до ваква ситуација.
„Вашиот глас е решението. Излезете и гласајте. Иако ситуацијата е сложена, изборот е едноставен. Или сте задоволни со вашето секојдневие, одобрувате и се согласувате како работи оваа власт, или ќе ја казните, ќе бидете на страна на правдата и новата надеж која доаѓа за Македонија. Добро знаете дека како што ништо не бива од животот што го ветуваа, нема ништо да биде ниту од метлата која сега ја најавуваат“, посочи тој.
На оние кои се заговорници на бојкот им порача дека ова не е само битка на ВМРО-ДПМНЕ, туку на секој човек, за неговото достоинство и чест.
„И можеби со нас имате многу причини да имаме различни погледи и ставови, но нас нè обединува борбата за Македонија, борбата за татковината. Затоа не му помагајте на Заев со бојкотот, не продолжувајте ги месеците на клинички живот на оваа власт. Ајде да ги собориме. Излезете и гласајте за нашата земја. Знам дека има притисоци и кон државната администрација. Заев се закани дека ќе бркал од работата. Но, секој од вас, секој од вас знае дека само слаб човек се заканува. Немојте да бидете вознемирени и не потклекнувајте на заканите“, повика Мицкоски.
Тој порача дека ќе има и одговорност на оние кои нанесуваат неправда и уште еднаш ги повика граѓаните да излезат и гласаат.
„Гордана Сиљановска-Давкова е изборот. Гласот за неа е глас за честит човек, жена со кредибилитет. Имаме шанса претседателка да биде жена која е чувар на интересите на Република Македонија и секој нејзин човек“, нагласи партискиот лидер додавајќи дека само гласот на граѓаните може да донесе подобри времиња.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без вода дел од Кисела Вода

Регионалниот центар за управување со кризи на Град Скопје, по добиеното известување од ЈП Водовод и канализација, информира дека денеска поради изведување на водоводен приклучок на водоводна мрежа со пречник од Ф-150 мм на улицата Христо Татарчев бр. 47, прекинато водоснабдување ќе имаат корисниците од истата улица и кулите – Расдник, oпштина Кисела Вода.
Водоснабдувањето ќе биде прекинато од 09:00 часот до завршување на работните активности.
Македонија
Сончево и топло, максималната температура ќе достигне до 34 степени

Времето денеска ќе биде сончево и топло со мала локална облачност. Ќе дува слаб до умерен, а наместа долж Повардарието повремено засилен ветер од северен правец. Минималната температура ќе биде во интервал од 9 до 19, а максималната ќе достигне од 27 до 34 степени.
Во Скопје, сончево и топло. Ќе дува умерен, во делови од котлината повремено засилен ветер од северен правец. Минималната температура ќе се спушти до 17, а максималната ќе достигне до 34 степени.
Времето во наредните денови
Во следните денови времето ќе биде стабилно, претежно сончево и топло. Ќе дува умерен, во сабота наместа долж Повардарието повремено засилен северен ветер.
Македонија
„Уапсени се полицајци и полициски функционери кои биле на смена кобната вечер“: СДСМ ја поздрави акцијата на ОЈО ГОК за Кочани

„Ја поздравуваме вечерашната акција на Обвинителството за организиран криминал и корупција во која се лишени од слобода полицајци и полициски функционери кои биле на смена кобната вечер на 16 март во т.н. дискотека Пулс во Кочани“, соопшти СДСМ.
„Фактот што четири месеци ВМРО-ДПМНЕ се обидуваше да ја сокрие одговорноста на полицајците и полициските функционери, фактот што нивната вина беше негирана од страна на Панче Тошковски и Христијан Мицкоски укажува на тоа дека сите биле вмешани или на некој начин знаеле за нелегалното работење на Пулс и тоа го одобрувале.
Само поради обидите да се сокрие одговорноста од страна на Тошковски и Мицкоски на лицата кои тие ги поставија за полицајци, командири и началници би требало веднаш да си поднесат оставки.
Одговорност мора да има и за Александар Јанев, директорот на БЈБ. Тошковски и Јанев не смеат повеќе да ја попречуваат истрагата ниту да влијаат некој да не сноси одговорност.
Вистината за Кочани која цела недела ја објавуваше СДСМ е точна. Се покажа дека без силен притисок на јавноста, на дел од медиумите и на СДСМ нема да има правда за Кочани. Време е за одговорност, време е за оставки“, се додава во соопштението на СДСМ.