Македонија
Јапонската амбасадорка на прошетка по Широк сокак

Амбасадорката на Јапонија во земјава, Кеико Ханеда, престојуваше во Битола, при што оствари средба со градоначалничката Наташа Петровска во нејзиниот кабинет. На средбата гостинката изрази голем интерес за градот Битола, неговата местоположба, актуелната состојба во образованието и културата, како и за економските услови во однос на напредокот на процесот на гасификација и топлификација. Градоначалничката Петровска ѝ се заблагодари на амбасадорката за покажаниот интерес за подобрување на условите во образованието и донацијата од страна на амбасадата наменета за училиштето „Св. Климент Охридски“.
Со кратка пригодна програма на јапонски танци и македонски ора беше дочекана амбасадорката Кеико Ханеда во ОУ „Св. Климент Охридски“, во присуство на градоначалничката, советници од Општина Битола, директорите на останатите училишта, наставници и голем број соработници. Потоа делегацијата ги разгледа постигнатите резултати од Проектот за подобрување на училишната средина во ОУ „Св. Климент Охридски“ во Битола преку рехабилитација на објектот кој е одобрен од GGP програмата на Амбасадата на Јапонија, преку кој се постави комплетна дограма во училиштето, во вредност од 50.000 евра.
„Особено ме радува и ми значи ваквиот вид поддршка во образовни институции затоа што сите знаеме зашто токму таму е ‘ркулецот на она што значи создавање нквалитет во општеството. Голема благодарност до јапонската амбасада за сериозната поддршка кон нас како општина, а ваквата подадена пријателска рака и во иднина ќе ја чувствуваме“, рече градоначалничката Наташа Петровска.
„Народот на Јапонија, како ваш пријател е среќен кога ги гледа насмевките на учениците во училиштата. Нашите две земји прославуваат 25-годишнина дипломатски односи и планирани се многу настани. Јапонската соработка со Битола има долга историја. Битола е првиот добитник на гранд-програмата ‘Џиџипи’ за мали проекти уште во 1998 година кога Болницата од Битола беше добитник на јапонската донаторска програма за медицинска опрема“, посочи амбасадорката Кеико Ханеда.
„Иако нашето училиште е едно од поновите во градот, сепак имаше потреба од промена на дограмата. Со новата дограма, не само што има подобри услови за нашите ученици, туку и самото училиште има поголема енергетска заштеда“, истакна директорката на ОУ „Св. Климент Охридски“, Гордана Анастасова.
Работната посета на Битола амбасадорката Ханеда ја искористи за прошетка по Широк сокак, која ја нарече „една од најубавите улици во Македонија“. Во агендата на амбасадорката се најде и посетата на Заводот и музеј во Битола, при што, заедно со градоначалничката Петровска, ги посетија музејските поставки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
УЈП со повик за исполнување на ДДВ обврските: евидентирана е загрижувачка состојба

Управата за јавни приходи информира дека заклучно со 25 јули 2025 година евидентирана е загрижувачка состојба во однос на исполнувањето на обврските поврзани со данокот на додадена вредност (ДДВ).
„Според последните податоци: не се поднесени ДДВ-пријави од 142 месечни и 2.134 тримесечни обврзници. Пријавен, но неплатен ДДВ-долг е евидентиран кај 1.326 месечни и 7.748 тримесечни обврзници.
Директорката на Управата за јавни приходи, Елена Петрова, со порака: „Непочитувањето на законскиот рок е сериозен прекршок. Сите обврзници кои не поднеле ДДВ-пријава или не го платиле ДДВ-долгот се повикуваат итно да постапат согласно законските прописи. Даночната дисциплина не е избор, туку законска обврска и одговорност на секој граѓанин и компанија, темел за функционална држава.“
Управата за јавни приходи, како што додаваат во информацијата, веќе доставила персонализирани известувања до сите ДДВ-обврзници кои имаат пријавен, а ненаплатен долг за соодветниот даночен период.
„Преку координирано постапување и интензивна комуникација со даночните обврзници и со сметководителите, се спроведува целосен сет активности и мерки — со цел да се избегнат блокади на сметки и дополнителни трошоци за присилна наплата. За секој ден на задоцнување, се пресметува камата во износ од 0,03% од преостанатиот долг. По доставата на опомените, управата ќе пристапи кон присилна наплата кај сите обврзници кои нема да го подмират долгот доброволно. Со цел навремено информирање и исполнување на обврските, како и обезбедување солидна даночна историја, УЈП останува во постојана комуникација со сите релевантни страни“.
Македонија
Владата донесе одлука за промена на таблиците на службените возила и отворање на конзулат во Корча

Владата на денешната 97 седница донесе одлука сите државни институции да ги променат регистарските таблици на службените возила со новите таблици со боја најдоцна до 15 септември 2025 година. Оваа одлука е во насока на уште едно реализирано ветување пред граѓаните со цел поголема отчетност, транспарентност и ставање крај на злоупотребите кои со биле пракса во минатото, соопшти владината служба.
Дополнително, Владата на предлог на Министерството за надворешни работи и надворешна трговија донесе одлука за отворање на генерален конзулат во Корча со јурисдикција во целиот регион. „Граѓаните мора да имаат брз и ефикасен сервис и услуги, поддршка за културни, образовни и економски врски.
Владата продолжува со конкретни мерки и политики кои имаат за цел да ја потврдат вистинската грижа за подобрување на стандардот и враќање на довербата на граѓаните во институциите“.
Македонија
Со запален факел се обидел да подметне пожар во Струмица: под истрага едно лице за загрозување на општата сигурност

Јавен обвинител од Основното јавно обвинителство Струмица донесе Наредба за спроведување истражна постапка против едно лице за обид да изврши – Тешки дела против општата сигурност од член 292 став 1 во врска со член 288 став 1 од Кривичниот законик.
Осомничениот вчера попладне, преку една социјална мрежа, се заканил на лице од Струмица дека ќе му ја запали викендицата, а потоа се обидел заканите да ги реализира.
На локацијата брана Водоча се обидел да подметне пожар и да предизвика поголема имотна штета. Со запален факел од хартија и текстил ги запалил гредите на натстрешницата, кои започнале да чадат и да горат. Со тоа предизвикал ризик од пожар не само на објектот, туку и на повеќе други викенд-куќи и на нискостеблеста и високостеблеста вегетација во непосредна близина.
Поради опасност од бегство и можност да го повтори односно да го доврши делото, јавниот обвинител до судијата на претходна постапка достави предлог за определување мерка притвор.