Основното јавно обвинителство Струга поднесе обвинителен акт против две лица кои се товарат дека како соизвршители се обиделе да извршат разбојништво и да ја силуваат вработената во обложувалницата што сакале да ја ограбат.

Настанот се случил на 31 декември 2018 година кога обвинетите, од кои едниот е државјанин на Албанија, влегле во обложувалница во Струга. Тие најпрвин чекале да заминат другите гости од објектот, по што физички нападнале вработена во обложувалницата, обидувајќи се да извршат силување и да ѝ го одземат клучот од касата. Жената силно се спротивставила и успеала да се оттргне од двајцата напаѓачи. Поради силното викање на вработената, тие побегнале од местото на настанот и не успеале во обидот.

„Против обвинетиот 46-годишен македонски државјанин се води постапка и од Основното јавно обвинителство Гостивар, кое го гони за кривично дело убиство од член 123 став 1 од Кривичниот законик. Осомничениот тоа делото го извршил на 29 декември 2018 година, кога со умисла од живот го лишил оштетениот – сопственик на угостителски објект во Кичево, нанесувајќи му убодни рани во пределот на градниот кош”, соопшти обвинителството.