Свет
Осум аеродроми во ЕУ меѓу десетте најлоши во светот
Во Европската Унија се наоѓаат осум од десет најлоши аеродроми во светот, покажа новото истражување на „Ер хелп“, групација за заштита на правата на патниците, пренесува Еурактив. Истовремено, од 10 најдобри аеродроми во светот, само три се во ЕУ.
Најлошите аеродроми во ЕУ се во Франција, на Малта, во Холандија, Португалија, Романија и во Велика Британија. Ранг-листата е направена врз основа на официјалните податоци за летовите, а истражувањето опфатило 40.000 патници.
„Ер хелп“ заклучила дека аеродромот во Лисабон, „Портела“, е најлош меѓу 132 аеродрома во светот што се опфатени со истражувањето.
Аеродромот во Ајдховен е на 130. место на листата најдобри аеродроми во светот, аеродромот во Букурешт на 129. место, аеродромот на Малта е на 128. место, во Манчестер на 127. место, парискиот аеродром „Орли“ е на 126. место, аеродромот во Порто е на 125. место, а лондонскиот „Гетвик“ на 123. место.
Како критериуми се оценувани доцнењето на летовите, хигиената, времето на чекање на шалтерите, работата на службата за корисници.
Истражувањето покажало дека најдобар аеродром во светот, како и лани, е катарскиот меѓународен аеродром „Хамад“, а следува аеродромот во Токио.
Меѓу десетте најдобри, само три се во ЕУ, и тоа во Атина, Гдањск и на Тенерифе.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Зеленски и Трамп разговараа пред новата рунда преговори со Русија
Украинскиот претседател Володимир Зеленски и неговиот американски колега Доналд Трамп разговараа телефонски во пресрет на новите преговори со Русија.
Во објава на мрежата „Икс“, Зеленски соопшти дека со Трамп разговарал за прашањата што ќе бидат тема на утрешните билатерални разговори во Швајцарија. На разговорот присуствувале и специјалниот пратеник Стив Виткоф и зетот на Трамп, Џаред Кушнер.
Зеленски наведе дека разговарале и за подготовките за следните трилатерални мировни преговори меѓу Москва, Киев и Вашингтон, планирани за почетокот на март.
„Очекуваме овој состанок да создаде можност разговорите да се подигнат на ниво на лидери. Претседателот Трамп го поддржува овој редослед на чекори. Тоа е единствениот начин да се решат сите сложени и чувствителни прашања и конечно да се стави крај на војната“, изјави Зеленски.
Тој нагласи дека украинскиот и американскиот тим интензивно работат и им се заблагодари на САД за активното учество во преговорите и напорите за завршување на војната.
Свет
Мексико ја скратува работната недела од 48 на 40 часа
Мексиканскиот парламент усвои уставна реформа со која работната недела постепено ќе се скрати од 48 на 40 часа, при што намалувањето целосно ќе стапи во сила во 2030 година.
Од 2027 година работната недела ќе се намали на 46 часа, а потоа ќе се кратат по два часа годишно сè додека не достигне 40 часа во 2030 година. Властите нагласија дека намалувањето на работното време нема да доведе до намалување на платите.
Реформата беше изгласана со 469 гласа „за“ и без ниту еден „против“. За да стапи во сила, потребно е одобрување и од 17 од 32 регионални парламенти.
Опозициски пратеници ја критикуваа реформата, оценувајќи дека не гарантира доволно денови за одмор. Тие побараа експлицитно да се предвиди два дена одмор по пет работни дена.
Според податоците, Мексико е меѓу земјите со највисоко ниво на стрес поврзан со работата, што беше наведено како аргумент за потребата од повеќе одмор.
Свет
Зеленски: „Дружба“ нема наскоро да биде поправена, Унгарија да се обрати до Русија
Поправката на нафтоводот „Дружба“, преку кој се транспортира руска нафта кон Источна Европа, нема да биде завршена наскоро, изјави украинскиот претседател Володимир Зеленски, и покрај барањата од Европската унија и негодувањето од Унгарија.
Испораките на руска нафта кон Унгарија и Словачка се прекинати од 27 јануари, откако, според Киев, во руски напад била оштетена опрема на нафтоводот во западна Украина. Будимпешта и Братислава, пак, ја обвинуваат Украина за прекинот.
Зеленски изјави дека Русија е целосно одговорна за прекинот поради нападите врз украинската критична инфраструктура и ги отфрли „ултиматумите и политичкиот притисок“.
Тој додаде дека Унгарците треба да се обратат до Русија доколку сакаат решавање на проблемот.
„Унгарците треба да апелираат до Русите за енергетско примирје“, изјави Зеленски.

