Македонија
Димитров: Мојата земја денес е успешна приказна, која треба да биде охрабрена и поддржана

Работната посета на Берлин, министерот за надворешни работи, Никола Димитров, ја продолжи со учество на настан коорганизиран од страна на парламентарните групи на зелените и на германската секција на Унијата на европските федералисти, во која членуваат пратеници од четири политички партии – ЦДУ/ЦСУ, социјалдемократите, зелените и либералите.
Зборувајќи како главен говорник на темата „Западен Балкан по решавањето на прашањето за името: постигнувања, предизвици и перспективи“, Димитров пред присутните пратеници, претставници на владата, дипломатскиот кор, медиумите, НВО-секторот и другите гости се осврнал на искуствата од решавањето на спорот со Грција и предизвиците за натамошната имплементација на преспанскиот договор притоа потенцирајќи ги значењето и придобивките од договорот за земјата и регионот.
„Во таа смисла министерот Димитров потенцира дека договорот претставува добра вест за целиот регион и ЕУ и е пример за тоа дека преку визионерско лидерство и јасна европска перспектива на Балканот се можни решенија, дури и на најделикатните отворени прашања. Препознавање и зацврстување на придобивките од договорот, заедно со резултатите во делот на домашните реформи, ќе претставува валоризација на системот на заслуги и условеност и јасен сигнал за европската иднина на целиот регион“, соопшти МНР.
Во тој контекст Димитров истакна: „И покрај тешката политичка ситуација во Европа денес, претстојните европски избори, сите прашања поврзани со тоа, едноставно го немаме луксузот да не успееме во создавањето успешни приказни. Мојата земја денес, Северна Македонија, е успешна приказна, која треба да биде охрабрена и поддржана ако сакаме да направиме разлика. Најголемата научена лекција од сето ова е дека ние можеме да направиме разлика. Ништо од ова, ниту помирувањето ниту преспанскиот договор, не беше неизбежно. Напротив, се случи бидејќи ние тоа го направивме заедно со лидерството во Атина“.
Навраќајќи се на потребата од одржување дофатлива европска перспектива и активен европски ангажман во регионот, Димитров потенцира: „Јас искрено верувам дека ангажираниот однос со нашиот регион, признавањето на напредокот и неговото наградување е не само правилниот пристап туку и помалку скапиот пристап. Неангажираноста би била далеку поскапа. Ова го видовме и преку мигрантската криза во 2015/2016 и важноста на Западен Балкан за безбедноста на самата Европска Унија. Мислам дека иднината на регионот е европска, нема алтернативна стратегија. Иако поголемиот дел од работата е наша дома, сите мораме искрено и отворено да размислиме што ќе правиме со овој регион. Доколку сакаме државите во регионот да ги направиме европски, каде што владее правото, постојат функционални спреги и кочници и подобри економии, тогаш единствениот пат е пристапниот процес“.
Работниот ден во Берлин опфатил и средби на Димитров и со пратеникот од СПД и член на Комисијата за надворешна политика во Бундестагот, Јосип Јуратовиќ, главниот советник на канцеларката Меркел за европски прашања, Уве Корсепиус и со специјалниот пратеник за Југоисточна Европа, Турција и за ЕФТА-земјите во германското МНР, д-р Кристијан Хелбах. Во разговорите со германските соговорници Димитров го презентирал напредокот на Република Северна Македонија реафирмирајќи ги аргументите и подготвеноста на земјата за почеток на пристапните преговори со ЕУ до крајот на годинава и потенцирајќи ја важноста на германската поддршка во тој процес.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без вода денеска корисниците од улицата Црвена Скопска Општина

Од ЈП Водовод и Канализација добиено е известување дека денеска, поради дефект во шахта (промена на шибер во шахта ф 50 мм) на улицата Кеј Димитар Влахов бр.4, прекинато водоснабдување ќе имаат корисниците од улицата Црвена Скопска Општина (сите објекти кои се наоѓаат на истоимената улица).
Водоснабдувањето ќе биде прекинато од 09:00 часот до завршување на работата.
Македонија
На Богородица се чека околу 30 минути

Поради пожар во националниот Парк Јасен, регионалниот пат Р1106 Македонски Брод – Скопје затворен е за секаков вид на возила, извести АМСМ.
Сообраќајот на државните патишта се одвива непречено, по претежно влажни коловози.
Интензитетот на сообраќајот на патиштата надвор од градските средини е зголемен. Поради летните одмори, се бележи зголемена фреквенција на возила, на ГП Богородица времето на чекање е околу 30 минути, додека на останатите гранични премини од македонска страна нема подолги задржувања при влез или излез од државата.
Македонија
Променливо облачно со сончеви периоди, наместа нестабилна облачност со пороен дожд и грмежи

Времето денеска ќе биде променливо облачно со сончеви периоди. Наместа ќе има појава на нестабилна облачност со пороен дожд и грмежи. Ќе дува слаб до умерен ветер од северен правец. Минималната температура ќе биде во интервал од 12 до 19, а максималната ќе достигне од 26 до 32 степена.
Во Скопје, променливо облачно со сончеви периоди, ќе дува слаб до умерен северен ветер. Минималната температура ќе се спушти до 18, а максималната ќе достигне до 32 степени.
Времето во наредните денови
Од среда до петок ќе преовладува претежно стабилно време со пораст на дневните температури. Во деновите од викендот повторно ќе има услови за повремени локални врнежи од дожд и ретки грмежи, а дневните температури ќе бидат во опаѓање.