Кина најави ограничување на визите за дел од американскиот персонал кој, како што велат, лошо се однесувал во прашање на Тибет, соопшти кинеското Министерство за надворешни работи.

Соопштението беше објавено на редовна прес-конференција откако Вашингтон пред две недели воведе нови ограничувања за кинеските претставници вклучени во донесувањето одлуки за пристап на странски државјани до Тибет. САД ја обвинуваат кинеската Комунистичка партија дека го ограничува пристапот до регионот на американските дипломати, новинари и други меѓународни набљудувачи. Вашингтон сака неограничен пристап до тие области.

Портпаролот на кинеското министерство Лин Џијан рече дека прашањата на Тибет се внатрешни работи на Кина и дека злоупотребата на американското визно ограничување (наметнато) на кинеските службеници поради Тибет сериозно го прекршува меѓународното право и основните норми кои ги регулираат меѓународните односи.

На странските туристи им е дозволено да го посетат Тибет доколку патуваат во групи и однапред побараат дозвола. Дипломатите и странските новинари мора да добијат дозвола од локалните власти.

„Тибет е отворен. Кина ги поздравува пријателските луѓе од други земји да го посетат, патуваат или работат во Тибет“, изјави Лин за новинарите.

„Меѓутоа, Кина се противи на мешање на која било друга земја или личност во тибетските работи под изговор на таканаречените човекови права, религија или култура“, рече тој.

Кина го освои Тибет во 1950 година, опишувајќи го освојувањето како мирно ослободување од феудализмот, но критичарите предупредуваат дека неколку стотици илјади луѓе ги загубиле животите во тој процес.

Милијардерот Владимир Ковар, основач на чешката софтверска компанија „Уникорн“, е повреден кога неговиот хеликоптер се урнал во Чешка, во близина на селото Храдецко.

Несреќата се случила во саботата, а Владимир поминал со полесни повреди. Според прелиминарните наоди на истражителите, причина за несреќата е неконтролирано пилотирање за време на маневри за слетување, пренесува Novinky.cz.

Владимир Ковар, кој беше на листата на 100-те најбогати Чеси од страна на магазинот „Форбс“, има пилотска дозвола и основа школа за обука на пилоти за хеликоптери. Несреќата се случила непосредно пред слетувањето.

„Нему му недостигаше брзина на одредена височина. Во тој момент ништо не можеше да се направи и леталото падна на земјата. Тоа беше грешка што можеше да се случи. Тука секундите беа одлучувачки. Немаше прашање за каква било недисциплина“, изјави Јозеф Бејдак, заменик-директор на Канцеларијата за истражување на причините за авионски несреќи.

Портпаролката на полицијата, Барбара Шматерова, изјави дека 62-годишниот пилот бил негативен на алкотестот.

Брза помош го пренела Ковар во Универзитетската болница во Плзењ. Во неделата директорот на болницата, Милан Немец, за „Новинки“ потврди дека пациентот е хоспитализиран на ортопедскиот оддел.

Тој беше подложен на едноставна медицинска процедура и неговата состојба не е сериозна“, рече Немец.

Хеликоптерот се урнал во поле, на 20-ина метри од патот. Според портпаролката на регионалната служба за итни случаи, Мартина Штепан, пилотот цело време бил свесен.

„Имаше полесни повреди на долните екстремитети. Поради карактерот на механизмот на повреда, со хеликоптер е пренесен во здравствена установа“, прецизира Штепан.

Богатството на Владимир Ковар се проценува на повеќе од осум милијарди чешки круни.

Министрите за надворешни работи на земјите членки на ЕУ во Луксембург разговараат за ситуацијата на Западен Балкан, Украина и за Блискиот Исток.

За време на работниот ручек, министрите ќе разговараат за прашањата за регионалната стабилност и безбедност на Западен Балкан.

Високата претставничка за надворешна и безбедносна политика, Каја Калас, во неделата вечерта зборуваше за време на работната вечера со министрите за надворешни работи на земјите од Западен Балкан. Таа на денешната средба ќе извести за минатонеделната посета на Црна Гора, Албанија и Босна и на Херцеговина.

Во Сараево таа го осуди раководството на босанските Срби за обид за поткопување на територијалниот интегритет и уставниот поредок во земјата. Министрите ќе разговараат за тензичната политичка ситуација во Србија, каде што се одржуваат масовни протести по падот на натстрешникот на железничката станица во Нови Сад во ноември минатата година.

Што се однесува до Украина, неколку земји членки сакаат да ја забрзаат работата на 17-тиот пакет-санкции против Русија, кој би вклучувал ембарго за увоз на течен гас.

Состанокот се одржува еден ден откако Русија го погоди центарот на северниот украински град Суми со две балистички проектили, при што загинаа најмалку 34 лица.

На маргините на министерскиот состанок ќе се одржи меѓувладина конференција за пристапување со Албанија, на која земјата ќе ги отвори преговорите во кластерот 2, кој опфаќа повеќе поглавја поврзани со внатрешниот пазар.

Вечерва, во Луксембург, ќе се одржи првиот политички дијалог на високо ниво меѓу ЕУ и палестинската управа. Двете страни ќе разговараат за ситуацијата во Газа и во Западниот Брег, билатералните односи и можниот напредок кон решение со две држави. ЕУ подготвува голем пакет економска помош за палестинските власти.

Со состанокот ќе претседаваат високата претставничка на ЕУ за надворешна и безбедносна политика, Каја Калас, и палестинскиот премиер и министер за надворешни работи, Мохамад Мустафа. Комисијата ќе ја претставуваат комесарката за Медитеранот, Дубравка Шуица, и комесарата за подготвеност и управување со кризи, Хаџа Лахбиб.

Комесарката за Медитеранот, Дубравка Шуица, најави дека ЕУ ќе ја зголеми финансиската поддршка за палестинската управа во износ од 1,6 милијарда евра.