Свет
Турција не добила ултиматум од САД за откажување од договорот за С-400
Анкара не добила ултиматум од Вашингтон за договорот за С-400, рече турскиот министер за одбрана, Хулуси Акар, во интервју за турскиот канал „Хабертурк“.
Коментарите на Акар доаѓаат по извештаите дека САД и поставиле ултиматум на Турција, заканувајќи се дека ќе ја исфрлат Анкара од програмата за борбените авиони Ф-35 ако турската влада не се откаже од руските системи за противракетна одбрана.
Министерот истакна дека нема да коментира претпоставки кога беше прашан како ќе реагира Турција ако САД наметнат санкции против Анкара.
„Ние дејствуваме во целосна согласност со обврските што ги презедовме”, додаде Акар, нагласувајќи дека Турција целосно платила за испорака на Ф-35 од САД, а турски пилоти веќе се обучуваат за новите авиони.
Во меѓувреме, „Ројтерс“ цитираше два неименувани извори со познавање на ситуацијата, тврдејќи дека Вашингтон размислува да ја прекине обуката за турските пилоти бидејќи двете земји веќе со месеци се во вербален конфликт.
Пентагонот и Стејт департментот допрва треба да ги коментираат тврдењата. Турските пилоти во моментов се обучуваат во базата на воздухопловните сили во Аризона иако Пентагон веќе ги прекина испораките на опремата за Ф-35 во Турција.
Минатата недела портпаролот на американскиот Стејт департмент, Морган Ортагус, изјави дека купувањето на рускиот С-400 ќе има многу реални и многу негативни последици. САД во многу наврати тврдеа дека С-400 не се компатибилни со воената опрема на НАТО и дека руските системи за воздушна одбрана претставуваат закана за Ф-35.
Анкара, од своја страна, инсистираше на тоа дека купувањето на тоа оружје е нејзина суверена работа и ја исклучи можноста за напуштање на плановите за купувањето С-400. Турската страна, исто така, истакна дека С-400 не се поврзани со безбедноста на алијансата, САД или Ф-35 на кој било начин.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
(Видео) Нарачала фустани преку интернет, а во пакетот ѝ стигнала епрувета со крв
Ана Елиот од Тенеси неодамна нарачала фустани преку онлајн продавница, а кога пристигнал пакетот била преплашена.
Во кутијата, покрај облеката, пронашла епрувета со човечка крв и конзерва грав!
„Епруветата немаше име, име на лабораторија, ниту датум кога е земена крвта“, објаснува таа во видеото кое е прегледано повеќе од седум милиони пати.
Девојчето го контактирало Центарот за контрола и превенција на болести, кој го третира инцидентот како „биолошка опасност“, пренесува New York Post.
Ана ги предупреди клиентите на онлајн продавницата да бидат внимателни при отворањето на пакетите, а подоцна откри дека била во контакт со нивните претставници.
„Покренавме истрага и утврдивме дека пакетот поминал контрола на квалитетот и го оставил нашиот пакет без дополнителни артикли. Само со артикли кои се нарачани“, велат од компанијата.
Жителката на Тенеси објави серија видеа во кои ги информира своите следбеници за најновите случувања.
Претставник на транспортната компанија изјави:
„Искрено се извинуваме за ова искуство. Ние ги третираме пратките на нашите клиенти со најголема грижа и преземаме соодветни чекори за да го решиме овој проблем“.
Сè уште не се знае чија крв е во шишето, а конзервата со грав е уште поголема мистерија.
@anna_200.1 @SHEIN is denying that they have anything to do with it. And the @CDC.govOfficial ♬ Spooky, quiet, scary atmosphere piano songs – Skittlegirl Sound
Свет
(Мапа) Украина мора да се повлече 15 километри на Запад, Бердичи е опколен
Украина се подготвува да ги повлече војниците од Бердичи, јавуваат српските медиуми.
На вооружените сили на Украина во Бердичи им се заканува опкружување по неодамнешната загуба на Новобахмутовка и Соловјов, а според некои воени блогери се очекува повлекување до 15 километри на запад.
Ним им се заканува загуба и на Нетајлов, Карловка, Умански, Новокалинов, Керамик, Архангелски…
По падот на Авдијивка во февруари, Украина одржа линија на одбрана во близина на Бердичи. За време на безмилосните борби во претходните два и пол месеци на тој дел од линијата на фронтот, беа изгубени и неколку американски тенкови Абрамс, обидувајќи се да го запрат напредувањето на руските трупи.
Воениот блогер Рибар наведува дека руските војници напредуваат и кај Новокалинов.
– Напаѓачките групи ја пробија одбраната на украинските формации во центарот на селото во правец на Керамик. Моментално се консолидираат позициите во центарот на селото. Имајќи го предвид налетот од Очеретин во правец на Архангелск, не може да се исклучи дека во блиска иднина вооружените сили на Русија ќе можат целосно да го окупираат Керамик – вели Рибар.
Според него, Русите успеале да ги истуркаат противниците од Семјеновка.
– Остатоците од пешадијата на вооружените сили на Украина под оган на артилерија и беспилотни летала се повлекоа од северната периферија на селото на запад кон Новопокровски. Под контрола на вооружените сили на Русија делумно беа и шумските појаси кај Семјоновка. Борбите во моментов се водат на најзападната периферија на Бердици. Малку е веројатно дека непријателот ќе може долго да држи позиции поради неговото повлекување од Семјеновка. Следната линија на напад на Вооружените сили на Русија најверојатно ќе бидат шумските појаси на делницата Новопокровско – Новоселовка Перваја каде што сега украинските формации динамично градат одбрана – вели Рибар.
Украинскиот телеграмски канал DeepState потврди дека руските војници ги зазеле Семјоновка и Соловиев и дека се водат борби за Керамик.
Свет
Евакуација на аеродромот во Москва поради дојава за бомба
Еден од катовите на зградата на аеродромот Внуково во Москва е евакуиран поради закана за бомба, соопшти полицијата.
„Едниот кат е евакуиран. Во тек е проверка и контрола“, се наведува во соопштението и се додава дека евакуацијата не влијаела на функционирањето на аеродромот.
Евакуиран е седмиот кат од зградата на управата на аеродромот.
Неименуван извор изјавил за агенцијата ТАСС дека евакуацијата уследила по закана за бомба.
– Се проверуваат сите простории и канцеларии – изјавил овој извор.