Министерот за надворешни работи и надворешна трговија, Тимчо Муцунски, престојува во работна посета на Австралија, што претставува прва посета на министер за надворешни работи на Македонија во Австралија по 15 години.

Оваа посета се совпаѓа со значајниот јубилеј – 30 години од воспоставувањето на дипломатските односи меѓу двете земји.

Во рамките на посетата министерот Муцунски денеска оствари билатерална средба со австралиската министерка за надворешни работи, Пени Вонг. На средбата министрите ги потврдија одличните билатерални односи помеѓу двете земји и разменија ставови за актуелните геополитички предизвици вклучувајќи прашања поврзани со регионалната стабилност и глобалната безбедност.

Министерот Муцунски изрази благодарност за поддршката што локалните и федералните власти во Австралија ја даваат за зачувување на македонскиот идентитет и изучување на македонскиот јазик, како и за напорите на македонската дијаспора во промоцијата и зачувувањето на македонската култура и традиција.

Министерката Вонг ја нагласи значајноста на оваа прва министерска посета по речиси две децении истакнувајќи ја нејзината симболика во контекст на 30-годишнината од воспоставувањето на дипломатските односи.

Двете страни се согласија за клучната улога на македонската дијаспора во билатералните односи и изразија подготвеност за интензивирање на политичкиот дијалог и зајакнување на билатералната соработка, со посебен фокус на економските односи помеѓу двете земји.

СДСМ наспроти владејачките партии ја поддржа иницијативата на партијата Левица во македонското Собрание, за намалување на патните трошоци на пратениците.

Од партијата преку соопштение велат дека додека граѓаните едвај врзуваат крај со крај, ВМРО-ДПМНЕ, ЗНАМ и ВЛЕН не се откажуваат од патните трошоци.

„Социјалдемократскиот сојуз на Македонија отсекогаш се залагал за рационално и одговорно трошење на парите на граѓаните. Уште во 2018 година, кога СДСМ беше власт, на иницијатива на нашата пратеничка група беа поднесени и донесени законски измени со кои патните трошоци се намалија за најмалку една третина. Нашиот пристап кон ова прашање отсекогаш бил принципиелен и одговорен а не популистички. Суштината на работата на секој пратеник е да им служи на граѓаните, и на секој можен начин да води грижа што повеќе пари да бидат насочени кон потребите на граѓаните кои живеат се потешко“, се вели во соопштението на СДСМ.

Опозициската партија смета дека се потребни дополнителни законски измени кои ќе предвидат: воведување механизам за поголеми казните за можни злоупотреби на патните трошоци, како и воведување на ограничување со кое пратеници кои имаат станови во Скопје нема да имаат основа за наплата на патни трошоци.

Предлогот на Левица за намалување на патните трошоци на пратениците денеска не ја доби поддршката од владејачкото мнозинство, и не беше ставен на дневен ред на седницата. За да биде ставен на дневен ред предлогот за измени на Законот за пратениците, „за“ гласаа само 22 пратеници од Левица и СДСМ и коалицијата. Предлогот се однесуваше на тоа патните трошоци да се пресметуваат 6,5 литри на секои изминати 100 километри.

Пратениците од партиите на власт не го поддржаа законот за ограничување на патните трошоци, што го предложи партијата Левица.

Пратеникот и портпарол на Левицата, Амар Мециновиќ, смета дека со тоа ќе продолжи праксата на злоупотреба и наплаќање енормни суми.

„Јавноста веќе долго го артикулира овој проблем и директно влијае врз достоинството на Собранието, пратениците и политичкиот систем. Како антиестаблишмент-партија, ние се обидуваме да го вратиме она што народот некогаш го имаше – политичка моќ. Овие што денес ја владеат државата, ВМРО-ДПМНЕ, токму нивниот министер или фридманист – Трајко Славески, ги укина патните трошоци за работниците“, истакна Амар Мециновиќ.

Предлогот на партијата е патните трошоци да се пресметуваат: 6,5 литри на секои изминати 100 километри бидејќи сегашната одредба погрешно се толкува и пратениците испумпуваат пари за армотизација и патарини.