Македонија
Почна најголемата воена вежба во историјата на државата, учествуваат 2.700 војници
![](https://makfax.com.mk/wp-content/uploads/2019/06/DSC_0546_resize.jpg)
Над 2.700 припадници од армиите на шест држави, домаќинот Северна Македонија, потоа Соединетите Американски Држави, Албанија, Бугарија, Црна Гора и Литванија, од денеска до 9 јули како дел од досега најголемата вежба организирана во нашата држава, „Одлучен удар“, ќе ги развиваат подготвеноста и меѓусебната интероперабилност, клучни способности за сите армии во алијансата.
На отворањето на вежбата на полигонот „Криволак“ заменик-министерот за одбрана, Беким Максути, порача дека оваа досега најголема вежба што ја организира нашата Армија се случува во вистинско време во кое нашата држава е исклучително горда на постигнатото и дека алијансата добива искрен и посветен сојузник.
„Ние сме сојузник што цврсто верува во вредностите на алијансата и кој знае да се бори за демократијата, слободата, еднаквоста, владеењето на правото. Сојузник што знае дека живеењето и практицирањето на тие вредности е основата за развој на едно современо, демократско, европско општество“, рече Максути.
В.д. амбасадорката на САД, Микаела Швајцер Блум, се заблагодари и ѝ честита на Армијата за организацијата на вежбата.
„Вежбите како ’Одлучен удар’ играат важна улога во зајакнувањето на нашата заедничка безбедност. Тие овозможуваат нашите армии да може да комуницираат и да изведуваат заеднички операции. Тие ги поврзуваат нашите војници градејќи меѓусебно разбирање и лични врски што траат и нè прават посилни“, истакна Швајцер Блум.
Командантот на Здружената оперативна команда, генералот Павле Арсоски, им оддаде признание на сите офицери вклучени во подготовката и организацијата на вежбата. За „Одлучен удар“ истакна дека ќе претставува најдобар доказ за подготвеноста и интероперабилснота на нашата Армија со сојузниците.
Директорот на вежбата, потполковникот Игор Манасовски, информира дека планираниот процес за развој на вежбата траел 16 месеци, а вклучени биле 80 офицери и подофицери од шесте земји учеснички.
Вежбата „Одлучен удар“, која почна денеска, ќе се реализира на полигонот „Криволак“ до 9 јули.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Воз на релација Скопје – Гевгелија удрил во возило на излезот од Драчево
![](https://makfax.com.mk/wp-content/uploads/2022/07/zeleznichka-stanica-voz-6.jpg)
Регионалниот ЦУК Скопје, информира дека од Македонски железници известиле дека вчера во 17.15 часот, патничкиот воз што сообраќа на релација Скопје – Гевгелија, на излезот од станицата „Драчево“ на патничкиот премин, што е обележан со светлосна и звучна сигнализација, удрил во патничко моторно возило.
Според информациите до ЦУК, во возилото бил само возачот и нема настрадани.
На местото на несреќата, покрај Итната медицинска помош, биле од полицијата, а и Комисија од МЖ.
ЦУК информира и за состојбата со пожарите во земјава.
Во последното деноноќие, имало вкупно 18 пожари на отворено – сите се изгаснати и утрово нема активни, соопшти ЦУК.
Од центарот со алел до граѓаните да не се палат отпадоци и ѓубре на ова топло време и сува вегетација во природата.
РЦУК Скопје, известува дека вчера попладне била добиена пријава дека при рушење на објект во с.Грушино, во близина на основното училиште, било пронајдено неексплодирано експлозивно убојно средство. Од РЦУК Скопје, известени се ДЗС Скопје, од каде известиле дека за подигање на опасниот предмет ќе интервенираат во текот на утринските часови денеска. Инаку, превентивната препорака до тие што ќе најдат неексплодирани убојни средства (НУС) да не ги фаќаат и да не ги поместуваат туку едноставно да ги пријават на 112 во ЦУК.
Регионалниот ЦУК Скопје, известува дека денеска од 10:00 до 15:00 часот, се планира да се врши минирање на каменоломот „Зелениковец“ (Општина Сопиште) и околу местото ќе се слушаат детонациите од минирањето.
Регионалниот ЦУК Битола, информира, според најавата на ЦЈЗ „Прилеп“, дека од денеска, 08 јули до 10 десети јули, во периодот од 22.00 до 05.05 часот на територијата на Општина Прилеп ќе се спроведува прва фаза од дезинсекција со цел уништување на комарци. Со дезинсекцијата, освен градот Прилеп, ќе бидат опфатени населените места: Ореовец, Лениште, Селце, Лагово, Беровци, Кадино Село, Галичани, Тополчани, Ерековци, Канатларци, Чепигово, Тројкрсти, Мажучиште и Мало и Големо Коњари.
Се информираат пчеларите да ги заштитат нивните пчели во Прилепско каде што ќе се прска против комарци.
ЦУК предупредува и на состојбата со временската прогноза.
Следува период на многу топло време со дневна температура која насекаде ќе биде над 30, а наместа ќе достигнува 40 степени. Во попладневните часови претежно во планинските подрачја ќе има изолирана појава на нестабилност со краткотраен дожд и ретки грмежи.
Сите итни случаи се пријавуваат на Единствениот повикувачки број за итни случаи 112 во ЦУК, особено кога граѓаните имаат животозагрозувачки ситуации.
Македонија
СДСМ: Само Мицкоски и Чак Норис можат за два дена власт да донесат нова инвестиција, доста се китите со туѓи перја
![](https://makfax.com.mk/wp-content/uploads/2024/06/mickoski-1-2.jpg)
Тажно е да се гледа како Мицкоски и ВМРО-ДПМНЕ по секоја цена сакаат да покажат резултат и не бираат средства за да ги насамарат граѓаните. Но, потценување на интелигенцијата е дека само за два дена Мицкоски поканил, привлекол и договорил било кој нов инвеститор. Ова веројатно го можат само Мицкоски и Чак Норис, истакнуваат во соопштението од СДСМ.
Таков последен пример, како што велат, е инвестицијата на компанијата EPSOTECH, која Мицкоски ја објави како свое големо достигнување.
„Добро е што ВМРО-ДПМНЕ ќе овозможи инвестициите донесени од СДСМ да се реализираат, бидејќи тоа е добро за државата и граѓаните. Но, сметаме дека е политички простотилук да се тврди дека Владата на СДСМ ништо не работела, а во исто време Мицкоски да не признае дека се фали со наши проекти.
Јавноста треба да знае дека во моментов има шест нови инвестции кои се со завршени договори и спремни за работа. Единствена причина заради која не ги објави СДСМ е да не го наруши изборниот процес. За овие инвестиции се завршени сите процедури и го чекаат последниот филтер во Комисија за заштита на конкурентноста“, велат од опозициската партија.
Му порачуваат на ВМРО-ДПМНЕ наместо да продава магла и пропагнада, да се фати за работа и да реализира барем нешто свое.
„Срамно и смешно е два дена по преземањето на власта да промовира инвестиции како свои во услови кога уште немаат ни седнато на фотељите“, дополнуваат од СДСМ.
Македонија
Која земја ќе ја претставува Мицкоски во Вашингтон, Северна Македонија или никогаш Северна само Македонија, прашува Филипче
![](https://makfax.com.mk/wp-content/uploads/2024/06/sdsm-venko-filipce-1.jpeg)
Христијан Мицкоски, кој за Вашингтон отиде со пола од неговите министри, гордо преку видео ни порача дека е на самитот на НАТО.
Човекот кој жолчно работеше против членството во Алијансата и целата своја политичка стратегија ја базираше на блокада на тој процес, денес без грам срам се однесува како ништо да не било, реагира лидерот на СДСМ, Венко Филипче на најавата на премиерот Христијан Мицкоски од Вашингтон дека со дел од министрите ќе учествува на самитот на НАТО по повод 75-годишнината од формирањето на Алијансата.
„Лицемерието на политиката на ВМРО-ДПМНЕ и Мицкоски достигнува неверојатни граници. Тој заборави да каже во видеото која земја ќе ја претставуваат со Тошкоски, Мисајловски и Муцунски во Вашингтон, Северна Македонија или како што им ги подгреваа очекувањата на граѓаните – никогаш Северна само Македонија?
Мицкоски да не заборава дека тоа што денес е на најважниот политички настан во светот, а не во некој од месните штабови на ВМРО-ДПМНЕ е благодарение на храбрите и државнички одлуки на СДСМ, кој тој ги бојкотираше.
Не е далеку денот кога и целосно ќе се накити со перјата во надворешната политика, исто како што тоа го прави со инвестициите кои помпезно ги најавува, а се плод на работата на СДСМ.
Јавноста знае дека СДСМ беше и ќе остане мотор на развојот. СДСМ е партијата која ги реализира визијата и стратегијата на државата, додека ВМРО-ДПМНЕ ќе остане опортунистичка партија која ќе кочи се што е во интерес на граѓаните заради тесно политички интерес“, пишува Филипче на социјалните мрежи.