Македонија
Османи во Брисел: Институциите што денес ќе ги посетите, утре ќе бидат наши институции
Со брифинг од страна на вицепремирот задолжен за европски прашања, Бујар Османи, во Мисијата на Република Северна Македонија во ЕУ почна студиската посета на Брисел на студентите од државните универзитети, избрани како најдобри на конкурсот „Со европско знаење до европската престолнина“.
„Ви честитам уште еднаш на успехот и ви посакувам успешен студиски престој во Брисел. Вашите ментори сметаат дека сте вие најдоброто од Северна Македонија и се надевам дека таа доверба ќе ја оправдате, а впечатоците и искуството што ќе ги соберете од посетата ќе бидат поттик за вас да продолжите да се едуцирате и во иднина директно ќе се вклучите во процесот на европска трансформација на земјата“, истакна Османи посочувајќи ги накратко процесите и предизвиците со кои се соочува земјава во рамките на европските интеграции.
„Институциите на ЕУ што ќе ги посетите во рамките на посетата се исклучително важни точки во кои се создаваат политиките на Унијата, но што е уште поважно, тие еден ден ќе бидат и наши институции; наши претставници ќе седат во Европскиот парламент, ќе учествуваат во работата на Европската комисија, од директоратите, и којзнае, можеби токму некој од вас ќе ја претставува нашата земја токму во нив“, истакна Османи.
Делегацијата беше пречекана и од страна на амбасадорката Агнеза Руси, која им го претстави начинот на кој функционира Мисијата на Северна Македонија во ЕУ и одблиску ги запозна со процесите и активностите што Мисијата ги води во моментот.
На првиот ден од престојот во Брисел студентите ќе ги посетат Европскиот парламент, Советот на Европската Унија, како и Домот на европската историја. Според агендата, веќе од утре ќе ги посетат Советот на Европската Унија, Директоратот за соседство и преговори за проширување на Европската комисија (ДГ НЕАР), Европска служба за надворешно дејствување (ЕЕАС), Генералниот директорат за образование и култура (ГД ЕАК).
За време на посетата студентите ќе се сретнат со Дејвид Кулен – раководител на одделението за Република Северна Македонија и Косово при ДГ НЕАР, со Сесил Абадие од ЕЕАС задолжен за Република Северна Македонија, и координаторот на ЕК за земјава, Марк Јорна, и ќе се запознаат со можностите што ги нуди европската програма за едукација и обука „Еразмус плус“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
За неколку дена претседателката Сиљановска Давкова ќе ја има првата посета во странство
За неколку дена, односно на 23 мај претседателката Гордана Сиљановска Давкова ќе ја има првата посета во странство. Тој ден ќе биде примена од Папата Франциск во Ватикан, а следниот ден во Рим ќе присуствува на чевствувањето на светите браќа Кирил и Методиј.
Сиљановска Давкова ќе ја посети базиликата Свети Климент каде се наоѓа гробот на Св. Кирил, а потоа и базиликата Санта мариа Маџоре каде се наоѓа плочата испишана на македонски јазик. За време на престојот во Рим, претседателката ќе биде примена од претседателот на Италија, Серџо Матарела.
Македонија
Денес дожд и грмежи, можно е краткотрајно невреме со силен ветер и град
Времето денеска ќе биде променливо облачно и нестабилно со пороен дожд и грмежи. Локално ќе има услови за појава на невреме со интензивен пороен дожд, силен ветер и изолирана појава на град.
Минималната температура ќе се движи од 9 до 15, а максималната ќе достигне од 21 до 27 степени.
Во Скопје ќе биде променливо облачно и нестабилно со пороен дожд и грмежи. Во делови од котлината ќе има услови за појава на краткотрајно невреме со интензивен пороен дожд, силен ветер и изолирана појава на град. Минималната температура ќе се спушти до 14, а максималната ќе достигне до 25 степени.
Македонија
ДИК ги соопшти местата на кои ќе се прегласува на 22 мај
Државната изборна комисија (ДИК) денеска, на 105. седница, едногласно го усвои предлогот да се повтори гласањето во Изборната единица (ИЕ) 5 на избирачките места 1470/1 и 1470 во Општина Долнени, 1.194 и 1.202 во Општина Крушево, 1844 во Општина Струга и 1272 во Општина Охрид, како и во ИЕ 6 на избирачкото место 2101 во Општина Желино. Гласањето ќе се одржи идната среда, на 22 мај 2024 година.
ДИК на седницата ги разреши и претседателите на избирачките одбори, членовите и нивните заменици во избирачките места 1470/1 и 1470 во Општина Долнени, 1194 и 1202 во Општина Крушево, 1844 во Општина Струга, 1272 во Општина Охрид и 2101 во Општина Желино.
Со оглед дека се кратки роковите за избор на нови избирачки одбори, за да биде регуларно прегласувањето, општинските изборни комисии (ОИК) ќе треба да ангажираат некои од веќе постојните избирачки одбори, или од најблиските избирачки места или некои други, и за тоа ќе треба да достават известување до ДИК.
Кампањата за повторното гласање ќе трае до понеделник, 20 мај, 00.00 часот. Притоа, ќе важат истите листи за болни и немоќни лица, ќе нема можност да се пријавуваат нови.
Според ДИК, има можност за измени и предлози за овластени претставници на кандидати. Тоа важи и за членовите на избирачките одбори кои се предложени од политичките партии.