Македонија
Привремен сообраќаен режим на улицата Димитрија Чуповски

Град Скопје ги известува граѓаните дека денеска и утре на улицата Димитрија Чуповски, во центарот на градот, ќе се воведе привремен сообраќаен режим поради изведување градежни работи.
Поради асфалтирање на улицата Димитрија Чуповски, на потегот од раскрсницата со булеварот ВМРО до крстосницата со булеварот Свети Климент Охридски, денеска, почнувајќи од 7 часот наутро, па до 7 часот утре, ќе бидат затворени за сообраќај три коловозни ленти, и тоа: две ленти во правец Центар – студентски дом „Кузман Јосифовски-Питу“ и една лента во правец дом „Кузман Јосифовски-Питу“ кон Центар. Возилата што се движат од Центар кон „Кузман Јосифовски-Питу“ ќе мора да вртат десно на крстосницата на булеварот ВМРО со улицата Димитрија Чуповски и да возат кон булеварот Партизански одреди. Возилата што се движат од домот „Кузман Јосифовски-Питу“ кон Центар ќе се движат во една лента, крајната десно.
Исто така, возилата што се движат по улицата Васил Главинов кон крстосницата со улицата Димитрија Чуповски ќе може да одат право кон булеварот ВМРО и лево кон Центар. Вртењето во десно за нив ќе биде забрането.
В сабота (8.6.2019 година), пак, со почеток во 7 часот наутро до 7 часот на 9.6.2019 година ќе бидат затворени три коловозни ленти на улицата Димитрија Чуповски, и тоа: две ленти во правец студентски дом „Кузман Јосифовски-Питу“ – Центар и една лента во правец Центар – студентски дом „Кузман Јосифовски-Питу“. Возилата што се движат од Центар кон „Кузман Јосифовски-Питу“ ќе се движат по една коловозна лента, а возилата што се движат од „Кузман Јосифовски-Питу“ кон Центар ќе вртат лево или десно по булеварот Свети Климент Охридски. Исто така, вртењето во десно од булеварот Свети Климент Охридски кон улицата Димитрија Чуповски ќе биде забрането, односно возилата ќе продолжуваат да се движат право по булеварот.
Град Скопје апелира до сите учесници во сообраќајот да ја почитуваат поставената патна сигнализација и да ја приспособат брзината на движење на условите на патот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.