Македонија
(Видео) Арсовски: Во услови кога економијата крахира, Анѓушев цвета

Во услови кога економијата во Република Македонија крахира, кога граѓаните осиромашуваат, бизнисот на фирмите на вицепремиерот на владата на СДСМ, Кочо Анѓушев, цвета и, како по обичај, и тоа цвета со народни пари, обвини Димче Арсовски, портпарол на ВМРО-ДПМНЕ.
„Анѓушев можеби не знае да најде решение кое би ја подобрило македонската економија, но затоа успеа да најде идеален начин како производите од неговите фирми да бидат набавувани на сите тендери во државата, а тој воопшто да не конкурира на јавните набавки распишани со народни пари. Последниот скандал во кој вицепремиерот Кочо Анѓушев е повторно замешан во случајот со набавки на возила за метење улици од типот ‘грин машинс’ произведени од неговата фирма ‘Брако’ Велес. Имено, вкупно 240 илјади евра народни пари за половина година се инкасирани во џебот на Анѓушев преку фирмата ‘Сандра-М Љупчо ДООЕЛ експорт-импорт Кавадарци’, која е дистрибутер на овие метларки, идеална шема за собирање на народните пари. Јавноста алармираше дека четири комунални претпријатија склучиле договори за набавка на метларките на Кочо Анѓушев, а тоа се ЈП ‘Исар’ од Штип, ‘Плавија’ Радовиш, Паркинзи на Општина Центар, ЈП ‘Водовод’ Кочани исто така преку дистрибутерот на метларките на Анѓушев од Кавадарци“, рече Арсовски.
Да потсетиме, додаде тој, дека Кочо Анѓушев за овие возила веќе еднаш од државата доби бенефиции, односно царински поволности за литиум-јонски батерии за електрични возила произведени од „Брако“, а сега и општините се подредени на список за набавка на овие возила токму од фирмата на вицепремиерот Кочо Анѓушев.
„За Анѓушев овде нормално нема ништо спорно, бидејќи набавката на овие возила била јавен интерес, а одлевањето на буџетските пари на граѓаните на негово конто било позитивно затоа што на тоа дополнително се наплаќало и трговската маржа. Ова е веќе трагично, набавката на возила вакви со народни пари кај вицепремиерот не е од јавен интерес туку е единствено од интерес на Кочо Анѓушев. Ни срам, ни перде, а богами ни одговорност не гледаме кај Кочо Анѓушев. Метларка треба да почне да се вози на ‘Илинденска’, конкретно од Владата и тоа што е можно поскоро. Да почне од Анѓушев, Заев и Тевдовски, луѓето што ја упропастија економијата и коишто единствено работат за нивно лично богатење“, рече Арсовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без вода дел од Кисела Вода

Регионалниот центар за управување со кризи на Град Скопје, по добиеното известување од ЈП Водовод и канализација, информира дека денеска поради изведување на водоводен приклучок на водоводна мрежа со пречник од Ф-150 мм на улицата Христо Татарчев бр. 47, прекинато водоснабдување ќе имаат корисниците од истата улица и кулите – Расдник, oпштина Кисела Вода.
Водоснабдувањето ќе биде прекинато од 09:00 часот до завршување на работните активности.
Македонија
Сончево и топло, максималната температура ќе достигне до 34 степени

Времето денеска ќе биде сончево и топло со мала локална облачност. Ќе дува слаб до умерен, а наместа долж Повардарието повремено засилен ветер од северен правец. Минималната температура ќе биде во интервал од 9 до 19, а максималната ќе достигне од 27 до 34 степени.
Во Скопје, сончево и топло. Ќе дува умерен, во делови од котлината повремено засилен ветер од северен правец. Минималната температура ќе се спушти до 17, а максималната ќе достигне до 34 степени.
Времето во наредните денови
Во следните денови времето ќе биде стабилно, претежно сончево и топло. Ќе дува умерен, во сабота наместа долж Повардарието повремено засилен северен ветер.
Македонија
„Уапсени се полицајци и полициски функционери кои биле на смена кобната вечер“: СДСМ ја поздрави акцијата на ОЈО ГОК за Кочани

„Ја поздравуваме вечерашната акција на Обвинителството за организиран криминал и корупција во која се лишени од слобода полицајци и полициски функционери кои биле на смена кобната вечер на 16 март во т.н. дискотека Пулс во Кочани“, соопшти СДСМ.
„Фактот што четири месеци ВМРО-ДПМНЕ се обидуваше да ја сокрие одговорноста на полицајците и полициските функционери, фактот што нивната вина беше негирана од страна на Панче Тошковски и Христијан Мицкоски укажува на тоа дека сите биле вмешани или на некој начин знаеле за нелегалното работење на Пулс и тоа го одобрувале.
Само поради обидите да се сокрие одговорноста од страна на Тошковски и Мицкоски на лицата кои тие ги поставија за полицајци, командири и началници би требало веднаш да си поднесат оставки.
Одговорност мора да има и за Александар Јанев, директорот на БЈБ. Тошковски и Јанев не смеат повеќе да ја попречуваат истрагата ниту да влијаат некој да не сноси одговорност.
Вистината за Кочани која цела недела ја објавуваше СДСМ е точна. Се покажа дека без силен притисок на јавноста, на дел од медиумите и на СДСМ нема да има правда за Кочани. Време е за одговорност, време е за оставки“, се додава во соопштението на СДСМ.