Премиерот Христијан Мицкоски не планира реконструкција на Владата пред локалните избори.

Прашан од новинарите за оваа можност, а за која деновиве се зборува поради несогласувањата во коалицијата „Вреди“, Мицкоски кусо одговори: „Не“.

Дополнително за тоа какви се односите со „Вреди“, Мицкоски одговори: „Коалициски, одлични“.

Претходно денес, и вицепремиерот Изет Меџити беше прашан дали се планира реконструкција на Владата пред локалните избори. Тој рече: „Ќе видиме тоа, ќе процениме кои се аргументите“.

Темата за можна реконструкција се отвори откога стана извесно дека постојат несогласувања помеѓу лидерите на политичките партии во „Вреди“ во врска со настапот на претстојните локални избори. Тројца од четворицата лидери, меѓу кои и Меџити, се согласни дека треба да настапат заедно на локалните избори, но Арбен Таравари од Алијансата за Албанците, кој е актуелен министер за здравство, размислува поинаку. Дополнителено, лидерите не се согласуваат ниту за комуникацијата со ДУИ, што за Таравари не е спорна. Меџити денес изјави дека Таравари треба да расчисти со дилемите бидејќи неприродно е и „Влен“ и соработка со ДУИ.

Првиот вицепреммиер и министер за животна средина и просторно планирање, Изет Меџити, денеска беше домаќин на советодавната мисија „Рамсар“, предводена од Флоре Лафаје, која престојува во нашата земја за да даде стручни совети и препораки како да се третира и да се стопанисува со Преспанското Езеро.

Езерото од 1996 година е ставено на листата на заштитени подрачја, а намалувањето на водостојот на Преспанското Езеро претставува сериозен проблем.

Министерот Меџити на средбата истакна дека Преспанското Езеро во последните неколку години се соочува со значително намалување на нивото на водата, што претставува сериозна закана за неговиот еколошки систем.

„Климатските промени, користењето на водата за наводнување и подземните истекувања се едни од најголемите закани со кои треба да се соочиме и да се обидеме да ги решиме. Овие проблеми не може да чекаат и затоа се потребни итни и координирани акции“, рече Меџити додавајќи дека државата прави значителни напори да ги исполни барањата на ЕУ и зелениот договор за заштита на природата и климатските промени, како и за заштита на водите.

Меџити се заблагодари за одличната соработка со мисијата, која позитивно одговори на барањето на Министерството за животна средина и просторно планирање, и посака успех во работата. Мисијата ќе посети делови од Преспанското Езеро во Северна Македонија, Албанија и во Грција за да анализира зошто се случува овој феномен.

Претставникот на Рамсарската конвенција, Флоре Лафаје, рече дека е задоволна што има можност да престојува во Северна Македонија и изрази задоволство што Министерството за животна средина покажува зголемената загриженост и што спроведува многубројни активности за заштита на животната средина.

„Сакам да изразам задоволство што владите на Северна Македонија, Албанија и на Грција остваруваат исклучително добра соработка за Преспанското Езеро, кое со својата биолошка разновидност важи за бисер на природата, и би сакала да продолжи овој тренд, и со зголемен придонес на ЕУ, УНДП и ГЕФ, во соработка со трите влади, да го решиме овој проблем“, изјави Лафаје.

Министерството за животна средина на Северна Македонија од Секретаријатот на Рамсарската конвенција побара посета на Советодавната мисија, а кон ова барање подоцна се приклучија и Албанија и Грција, претставени на средбата од претставничката од Албанија, Јула Селмани, раководител на секторот за испорака на проекти од Националната агенција на заштитени подрачја, и од Грција – Лито Падопуло и Виви Румелиту.

Рамсарската конвенција е меѓународен договор воспоставен во 1971 година, прва заштитена област во Северна Македонија беше Преспанското Езеро со природниот парк „Езерани“ во 1996 година, потоа Дојранското Езеро во 2008 година, а во 2021 година на листата беа додадени Охридското Езеро и Студенчишкото Блато.

Вицепремиерот задолжен за политики на добро владеење, Арбен Фетаи, денеска учествуваше на првата седница на новиот состав на Советот за соработка меѓу Владата и граѓанското општество. Со ова формално заврши повеќегодишниот бојкот на Советот од страна на граѓанските организации почнат како реакција на непринципиелното распределување на јавните средства од страна на претходната влада.

Во своето обраќање пред членовите на Советот заменик-претседателот Фетаи го потенцира клучното место на граѓанскиот сектор како чувар на демократијата и како конструктивен партнер во креирањето подобри јавни политики.

„Граѓанското општество не е декор на демократијата, туку нејзин активен супервизор – гласот што предупредува кога се јавуваат појави, како што се корупцијата и неправдата“, истакна Фетаи.

Тој додаде дека Владата има обврска не само да слуша туку и да дејствува.

„Демократијата е континуиран процес на самокорекција. Вашата улога е суштинска во тој процес, а нашата должност е да го поддржиме тоа учество“, рече тој.

Осврнувајќи се на предизвиците со кои се соочува граѓанскиот сектор, Фетаи ги наведе ограничениот пристап до фондовите, отсуството на системска поддршка и недоволно функционалната правна рамка.

„Знам што значи да се бараат фондови, да се известува детаљно за проектите и да се комуницира со институции што често не нè разбираат“, рече Фетаи додавајќи дека добро организирано и поддржано граѓанско општество има моќ да придонесе за суштински општествени промени.

Во таа насока тој ја нагласи искрената намера на Владата да воспостави суштинска соработка со невладиниот сектор посочувајќи ја неодамнешната одлука за вклучување претставник од граѓанскиот сектор со право на глас во меѓуресорското тело за координација на борбата против корупцијата.