Македонија
Дескоска од Швајцарија: Интеграцијата во ЕУ е сериозен и долг процес – бараме да го почнеме
Министерката за правда, Рената Дескоска се обрати на јубилејното 30 издание на Кран Монтана Форумот кој деновиве се одржува во Женева, Швајцарија,.
Во своето обраќање во рамки на сесијата посветена на Глобалната безбедност во медитеранскиот регион, министерката Дескоска истакна дека Република Македонија важела за една од најнадежните поранешни југословенски републики во поглед на евроинтеграцискиот процес, но дека државата останала заглавена во чекалната на ЕУ, најмногу поради проблемот со името.
„Во 2009 мојата држава доби позитивен извештај од Европската Комисија со препорака за започнување на преговорите, но потребно беше да се реши проблемот со името. Чекањето се одрази доста негативно врз мојата држава – следеше тешка политичка криза и формирање на нова влада на која и беше јасно посочено дека влезот во ЕУ и НАТО е условен со решавање на споровите со соседите“, потенцираше Дескоска.
Спорот со името е решен, посочи министерката Дескоска, но преостанува Европската Унија да ги отвори преговорите со Република Северна Македонија, што всушност и беше мотивацијата за решавање на долгогодишниот спор со Република Грција.
„Придобивките од овој договор денес не ги чувствуваат само нашите две држави, туку регионот и цела Европа, но потребно е заокружување на овој процес. Промената на името беше направена за интеграција во Европската унија, не за повторно да останеме без перспектива. Промената на името пред граѓаните на мојата држава беше направена со ветување дека европерспективата на нашата држава е загарантирана – а не дека ќе следи повторна блокада. Северна Македонија не може да се смета за успешен пример ако не успее во исполнувањето на својата цел – евроинтеграција“, истакна Дескоска.
Ненаградувањето на напорите на Република Северна Македонија исто така, според министерката Дескоска, испраќа лоши пораки за спорот со Србија и Косово. Тому затоа министерка посочи дека одлуката за почеток на пристапни преговори е важна не само заради нас, туку и заради пораката којашто ќе се испрати до целиот регион – порака дека вистинското инвестирање во реформите и во добрососедските односи значат и сигурен влог во подобра иднина за граѓаните.
„Отворањето на датумот за преговорите за Северна Македонија не значи директен прием на државата во ЕУ – најмакотрпната работа за нашата држава започнува со исполнувањето на европските стандарди и за тоа сме многу свесни и токму таа можност ја посакуваме. Интеграцијата во ЕУ е сериозен, долг процес – бараме да го започнеме тој процес. Да потсетам само дека голем број држави кои ги започнаа преговорите со ЕУ – беа далеку помалку подготвени од Северна Македонија во моментот, држава која не бара брз влез во ЕУ – само шанса и поддршка во демократските реформи “, потенцираше Дескоска.
Што се однесува до усогласувањето на домашното законодавство со европските стандарди, министерката Дескоска истакна дека во процесот на менувањето на законите од областа на правосудството и борбата против корупцијата, земјата е во постојана комуникација со Венецијанската комисија и Европската Комисија, што ја држи земјата на вистинскиот пат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Меџити-Вал: заедничка цел зајакнување на правната држава, борбата против корупцијата
Првиот вицепремиер и министер за животна средина и просторно планирање Изет Меџити денеска беше домаќин на работна средба со амбасадорот на Мисијата на ОБСЕ во Република Северна Македонија, Килиан Вал.
Меџити и Вал разговараа за можностите за соработка во континуирано партнерство со цел унапредување на приоритетните реформи во согласност со заложбите на ОБСЕ.
Двајцата соговорници се согласија дека имаат за цел зајакнување на правната држава, борбата против корупцијата, родовата еднаквост и зајакнувањето на младите, додека промовирањето на транспарентноста, човековите права и одржливиот развој за доброто на сите граѓани остануваат заедничка цел.
Меџити повтори дека е максимално посветен на напредокот на интеграциската агенда на земјата кон зачленување во Европската унија, како единствено решение и со масовна поддршка од граѓаните.
Македонија
(Видео) Во Прилеп утре Ден на жалост, по трагичната несреќа во која загинаа три медицински лица
Во Прилеп, утрешниот ден се прогласува за Ден на жалост поради трагично загинатите медицински лица, кои утрово ги загубија животите во тешка сообраќајна несреќа на магистралниот пат Прилеп-Битола.
Одлуката беше донесена од страна на Советот на Општина Прилеп на вонредна седница.
Прилепскиот градоначалник Борче Јовчевски во своето обраќање рече: „Како градоначалник, како лекар, но пред се како човек утрово со тага ја примив веста за прераната смрт на нашите сограѓани, на еден прекрасен тим на специјалисти и медицински кадар. Еден тим кој животот го посвети во давање на помош и спасување на животи. Дури и на тој пат одеа да спасат животи. Прилеп и Македонија губат врвни луѓе, посветени на својата професија“, нагласи тој.
Несреќата се случила утрово при судир на автомобил во кое биле медицинските лица и товарен камион.
Македонија
Ковачки: Работите во судството се катастрофално лоши, потребни се оставки во судски совет, генерален ремонт и реизбор
„Работите во судството ни се лоши, катастрофално лоши и тоа е оценка на сите од надвор и од внатре“, истакна пратеникот од ВМРО-ДПМНЕ Драган Ковачки на денешната собраниска Комисија за политички систем и односи меѓу заедниците.
Тој посочи дека поради нула ажурност на судовите резултатите се катастрофални.
„Резултатите се катастрофални со ажурност нула на судовите. Од одредени судови се праќаат по други, од едни апелациони подрачја во други се праќаат на испомош затоа што нема судии“, вели Ковачки.
Правдата генерално во Република Македонија, според него ја нема, судство, обвинителство, како што вели, „таа спрега е скапана и тука ние не може да направиме исчекор без генерален ремонт. Мора да имаме генерален ремонт и реизбор“, потенцираше Ковачки.
Тој е дециден дека сите во судскиот совет треба да си дадат оставки.
„Судски совет како што сега е поставен треба да си дадат оставки затоа што доведоа до тие 2% доверба“, укажа Ковачки.