Преговорите меѓу европските министри за надворешни работи и иранската делегација во Женева, одржани со цел смирување на ескалацијата на конфликтот меѓу Иран и Израел, завршија. Средбата траеше цел ден, а по завршувањето, учесниците дадоа кратки изјави за медиумите.

Потпретседателката на Европската комисија и естонска премиерка, Каја Калас, нагласи дека регионалната ескалација „не е од корист за никого“ и дека „затоа мора да ги држиме отворени каналите за комуникација“.

Таа додаде дека двете страни се согласиле да продолжат со разговорите за нуклеарните прашања, но и за пошироките прашања.

Британскиот министер за надворешни работи, Дејвид Лами, беше директен:

„Јасно ставивме до знаење: Иран не смее да има нуклеарно оружје“.

Тој додаде дека тој и неговите европски колеги се „решени да продолжат со преговорите со Иран“ и ја нагласи важноста од продолжување на разговорите меѓу Иран и САД.

„Ова е опасен момент и е исклучително важно да нема регионална ескалација“, предупреди Лами.

Иранскиот министер за надворешни работи, Абас Арагчи, ги опиша денешните разговори во Женева со претставници на Обединетото Кралство, Германија, Франција и Европската Унија како „сериозни и достоинствени“.

Во изјава по состанокот, тој рече дека Иран е подготвен да го преиспита дипломатскиот пристап и го поддржува продолжувањето на разговорите.

„Подготвени сме за нови состаноци со земјите од Е3 и Европската Унија во блиска иднина“, рече Арагчи.

Така, Иран ја отвори вратата за понатамошна дипломатија откако сите учесници на денешните разговори во Женева, одржани со цел да се спречи ескалацијата на конфликтот меѓу Иран и Израел, ја нагласија важноста од продолжување на дијалогот и спречување на регионалното ширење на конфликтот

Претседателот на Русија, Владимир Путин, изјави дека Русија не бара капитулација на Украина, туку признавање на реалноста „утврдена на терен“. Тој ова го кажа на пленарната сесија на Меѓународниот економски форум во Санкт Петербург.

Путин ја повтори својата теза дека ги смета Русите и Украинците за еден народ и изнесе територијална претензија:

„Верувам дека рускиот и украинскиот народ се еден. Во оваа смисла, цела Украина е наша. Каде и да стапне руски војник, таа е наша“.

Рускиот претседател рече дека Русија никогаш не се сомневала во правото на Украина на суверенитет, но, исто така, дека Украина била неутрална држава за време на прогласувањето на независноста во 1991 година.

Тој тврди дека Русија е принудена да воспостави безбедносна зона по должината на границата со Украина, пренесува „Ројтерс“.

Путин рече дека не го исклучува заземањето на украинскиот регион Суми. Во својот говор, тој, исто така, рече дека украинските сили извршиле злосторства против цивилното население за време на заземањето на рускиот Курски регион.

Тој ги оправда руските воени дејствија со постојаните напади на украинската армија врз граничните области на Русија: „Зошто го правиме ова? Затоа што тие претставуваат закана за нас. Тие постојано ги гранатираат граничните области. Ова е резултат на нивните, според мене, апсолутно неписмени и целосно неоправдани потези“.

Тој, исто така, предупреди за можна употреба на нуклеарно оружје против Русија, велејќи дека тоа би бил крај за оние што ќе го пробаат тоа.

„Употребата на нуклеарно оружје против Русија би била последната грешка на Киев“, рече тој, без да прецизира врз основа на што проценил дека таква можност постои.

За потсетување, Путин започна целосна инвазија на Украина кон крајот на февруари 2022 година, започнувајќи ја најголемата војна во Европа од Втората светска војна. Инвазијата следеше по години дестабилизација и хибридно војување во источна Украина и нелегалната анексија на Крим во 2014 година, но целосната агресија – со копнени сили, ракетни напади и воздушни напади на повеќе фронтови – означи драматична ескалација на конфликтот.

Оттогаш, десетици украински градови и села се срамнети со земја, вклучувајќи ги Мариупол, Бахмут, Северодонецк, Авдиевка и многу населби во регионите Харков, Херсон и Запорожје. Илјадници цивили се убиени, а милиони се принудени да бегаат.

Руските сили континуирано гранатираат цивилна инфраструктура, вклучувајќи болници, станбени згради, училишта, електроенергетскиот систем и засолништата, и покрај конвенциите на меѓународното хуманитарно право. Обединетите нации и бројни меѓународни организации документираат бројни воени злосторства, вклучувајќи напади врз цивили, тортура, силување и присилно преместување на деца од окупирани територии.