Македонија
Си замина Жиле – планинското куче кое од Шапка стигна до Америка

Семејството Хамон од Америка вчера се збогуваше од Жиле, планинското куче од Попова Шапка, кое во 2013 година беше застрелано и парализирано на задните нозе, а потоа беше посвоено во Пенсилванија. По 6 години живот во Америка, Џон и Ким, кои го зедоа Жиле од Македонија за да биде куче чувар за нивната ќеркичка Морган, мораа да му кажат збогум на својот миленик, кој во последно време имаше сериозни здравствени проблеми, и поради староста и поради парализата.
Од Жиле денеска се збогуваат многумина на социјалните мрежи бидејќи тој беше првото куче од Македонија што одеше со специјално направена инвалидска количка, за него беше изработен и краток документарен филм, а луѓе од разни држави од светот собираа пари и донираа за тој да може да замине во Америка, во новиот дом.
„Ни беше чест што Жиле беше дел од нашите животи. Неговиот дух беше најпрекрасното нешто кај него. Тој денеска ќе биде кремиран за да можеме да ја пратиме пепелта во Македонија и да биде расфрлена на Попова Шапка, планината на која Жиле ѝ припаѓаше. Тоа беше неговиот вистински дом“, напиша Ким Хамон, сопственичката на Жиле на неговата фејсбук-страница.
Новинарката и активистка за заштита на животните, Мери Јордановска, која го зеде Жиле во свои раце кога тој беше застрелан и парализиран и го донесе во Скопје, а потоа го испрати за Пенсилванија, исто така се збогуваше од кучето кое сплоти стотици луѓе.
„Чудно е како еден настан може да промени толку многу животи и да ги зближи луѓето. Претходно имав толку голем револт кон човекот што пукаше во Жиле. Шест години подоцна знам дека Жиле му помогна на едно девојче, Жиле ме натера никогаш да не се откажувам, Жиле зближи две семејства од разни континенти, Жиле нè научи дека попреченоста кај кучињата не е причина за евтаназија, тој ја смени свеста кај толку многу луѓе во земјата и странство. Ова го пишувам со многу солзи затоа што не бев подготвена да се збогувам. Но, длабоко внатре, знам дека неговата 10-годишна мисија е завршена. Тој страдаше, но никогаш не се откажа. Тој нè научи дека ништо не е невозможно ако имаш волја. Тој ја извади човечноста од многу луѓе на планетава. Обедини луѓе од многу држави. Ни покажа дека кучињата може да им помогнат на луѓето. Зближи две семејства кои не зборуваат ист јазик. Жиле умре онака како што живееше – гордо и достоинствено“, напиша таа.
Жиле беше алфа-мажјакот на Попова Шапка. Во 2013 година непознато лице пукаше во повеќе кучиња на планината, а од нив настрада само Жиле. Тој беше погоден со куршум во ‘рбетот и оставен парализиран. Јордановска го зеде кучето и го донесе во Скопје, каде што со месеци се грижеше за него со помош на други активисти и ветеринарот Марин Величковски. Жиле стана популарен на социјалните мрежи бидејќи со него замре практиката што се спроведуваше во Македонија дека секое парализирано куче треба да биде успиено. За него почнаа да стигнуваат донации од целиот свет, се собираа пари и му се купи количка специјализирана за парализирани кучиња. По извесно време, Џон и Ким од Америка се понудија да го посвојат Жиле да биде куче чувар за нивната ќеркичка Морган, која има здравствени проблеми.
„Сакавме куче што не е совршено, а сепак има голема волја за живот. Тоа ќе ѝ покаже на Морган дека ништо не е невозможно и дека волјата за живот е најважна“, изјави тогаш Џон.
Во септември 2013 година Жиле отпатува за Америка. Таму живееше прекрасен живот, целата куќа беше оспособена за тој да може слободно да се движи, често го оставаа на задниот дел од џипот со отворена врата да гледа од високо и да се чувствува како да е на планина, го носеа со нив на многу патувања, а во меѓувреме семејството посвои уште едно кученце за Жиле да има друштво.
Во 2017 година Јордановска отиде во Америка и го посети својот миленик, а нивната срцепарателна средба ја пренесоа и странските медиуми бидејќи тој ја позна и ѝ се фрли во прегратки иако ја немаше видено повеќе од три години.
Жиле замина, но неговата приказна и натаму останува за да докаже колку еден момент, еден настан и едно суштество може да ги направи луѓето подобри, побогати, похумани и посплотени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Костовски: Ќе изградиме Дом на култура во Бутел

„Почитувани граѓани на општина Бутел, денеска се наоѓам во дворот на велелепниот храм Свети Јован. Доблесно е кога нешто нема да успеете да направите, да признаете, но бидете сигурни дека во потегот позади мене ќе изградиме нов модерен плоштад со културен дом“, рече Дарко Костовски, кандидат за градоначалник на општина Бутел од ВМРО-ДПМНЕ.
„На оваа тематика работевме во изминатиот период. Успеавме да ги надминеме сите имотно правни проблеми и успеавме да направиме еден убав модерен проект за којшто архитектите обезбедија и 3Д анимација којашто ќе можеме да ја погледнеме.
Плоштадот ќе се простира на 3000 метри квадратни. Домот на култура ќе се простира на 900 метри квадратни. За овој проект се потребни 100 милиони денари. Истите ќе бидат обезбедени од страна на буџетот на општина Бутел“, изјави Дарко Костовски, кандидат за градоначалник на општина Бутел од ВМРО-ДПМНЕ.
Македонија
Извештаи за примени донации доставиле 35 отсто од учесниците во изборната кампања

Согласно Изборниот законик, учесниците во изборната кампања за Локалните избори 2025 година, имаат обврска да поднесат извештаи за примени донации во текот на изборниот процес како извор на нивно финансирање. Обврската се однесува и на финансиски извештај со податоци за вкупните приходи и расходи на изборната кампања, во законски утврдени рокови, со што се овозможува следење на законитоста на финансирањето и трошењето на средствата од страна на надлежните институции, како и увид на јавноста во изворите на приходи и начинот на трошење на средствата во изборната кампања, со цел зајакнување на довербата во изборниот процес.
Согласно рокот за доставување на Извештај за примени донации на трансакциска сметка за изборна кампања, за период од отварање на сметката до 11-от ден од изборната кампања односно заклучно со 09.10.2025 година до 24,00 часот, до ДКСК доставени се вкупно 61 извештаи, што изнесува нешто над 35% од вкупниот број на учесници во изборниот процес. Сите 19 коалиции доставија извештаи за донации, примени се 18 извештаи од политичките партии и 24 извештаи од независни кандидати, поддржани од група избирачи.
По истекот на рокот, доставени се уште 2 извештаи од политички партии.
Извештаите за донации се објавени на веб страната на ДКСК, на следниот ЛИНК.
Македонија
Скопје е хаотично оти јавните претпријатија се заробени од партиски интереси, мој приоритет е нивна вистинска реформа, вели Шукова

За кандидатката за градоначалничка на Скопје од СДСМ, Каја Шукова, Скопје денес изгледа запуштено, нечисто и хаотично затоа што јавните претпријатија се заробени од партиски интереси, долгови и неспособни раководства. Таа констатира дека граѓаните плаќаат за услуги, а добиваат насобран смет, нефункционален јавен превоз и хаотична инфраструктура.
„Мој приоритет е вистинска реформа на јавните претпријатија, да им служат на граѓаните, а не на партиите. ЈСП се модернизира со нови еколошки автобуси, електронски систем за наплата и брз автобуски транзит за да се воспостави за да се воспостави јавен превоз што функционира. ‘Комунална хигиена’ се ревитализира со современ центар за селекција и рециклажа, редовно собирање отпад и конечно решавање на ‘Вардариште’. Во ‘Паркови и зеленило’ се отвора нова ера, десет илјади дрвја и петнаесет паркови за петнаесет месеци со редовно одржување и враќање на зелените површини во маалата. ‘Водовод’ се насочува кон стабилно снабдување, модерна опрема и намалени загуби на вода. Јавното претпријатие ‘Лајка’ се надградува во вистински хуман систем за згрижување и грижа за уличните животни“, рече денес Шукова.
Таа уверува дека со нејзината програма Скопје ќе добие функционални и транспарентни јавни служби и ќе прерасне во град што ќе работи и се грижи за жителите.
„Време е институциите да им служат на граѓаните, а не на партијата“, рече Шукова.
Политичките партии имаат уште четири дена за претставување на програмите пред да настапи изборниот молк за локалните избори.