Македонија
Анѓушев во посета на општина Градско: Се решаваат реални проблеми на граѓаните

Вицепремиерот задолжен за економски прашања, Кочо Анѓушев, заедно со министерот за земјоделство, шумарство и водостопанство Трајан Димковски и директорот на Агенцијата за финансиска поддршка на земјоделството и руралниот развој Николче Бабовски, ја посетија општина Градско, каде од градоначалникот Роберт Бешовски беа информирани за тековните проекти со кои се надминуваат реалните проблеми на граѓаните во општината.
Вицепремиерот Анѓушев, потенцираше дека извршната и локалната власт активно работат на надминување на проблемите со кои се соочуваат граѓаните на оваа, но и на сите други општини, во насока на рамномерен регионален развој и подобрување на животот на граѓаните во сите делови на државата.
„Тука сме за да видиме како се решаваат комуналните проблеми на граѓаните и задоволен од ова што го гледам. Општина Градско урбано го уреди со сопствени средства паркот во износ од околу 4,5 милиони денари. Тука е и градинката чиишто капацитети се проширени со средства од Министерството за труд и социјална политика во износ од 2 милиони денари, за зголемување на капацитетот за уште 20 нови дечиња. Градинката веќе може да згрижува 50-ина дечиња, што е реално потребата на Градско. Се надевам во иднина ќе има потреба и за повеќе, а Владата ќе намени средства. Решен е и 30 годишен проблем со водоснабдување на општина Градско. Го посетивме бунарот направен над земја, каде нема што многу да се види, но подземните инсталации се обемни и овој 30 годишен проблем е веќе решен. Обезбедени се 20 милиони денари за реконструкција на патот од Агенцијата за поддршка на земјоделството и руралниот развој, во рамките на Програмата за рурален развој и подобрување на инфраструктурните услови помеѓу Градско и Чичево, во должина од 1,8 км. Исто така, обезбедени се средства за две улици во село Водоврати во рамките на Програмата за рамномерен регионален развој, како и средства за комунална опрема, канти за отпадоци и поцинкувани контејнери во Градско. Исто така, обезбедени се средства за канализација во населеното место Стопанство, како и уште една дополнителна канализација во уште едно населено место што е дел од општината. Со ова јасно покажуваме дека Владата е определена да направи колку што е можно подобри услови во целата држава, да имаме колку што е можно порамномерен развој во државата и за разлика од тоа што во минатото најголем дел од средствата се трошеа во Скопје, мислам дека е важно сите населени места во државата да ги направиме убави. Мислам дека ќе најдеме начин да ги решиме и проблемите на земјоделците во Градско, односно сточарите, коишто имаат потреба од обработливо земјоделско земјиште за да произведат храна за своите стада. Најавувам дека тоа ќе го решиме до крајот на годината и ќе најдеме начин тие да ги задоволат своите потреби и да ги задржат своите стада“, потенцира вицепремиерот Анѓушев по посетата на Градско.
Градоначалникот Роберт Бешовски дополни дека со општински и средства од буџетот на државата ќе се реализираат дополнителни проекти, со кои ќе се подигне квалитетот на живот на граѓшаните во општината.
„Општина Градско обезбеди средства за изградба на откупен центар на отворен простор преку Центарот за вардарски плански регион преку Бирото за рамномерен регионален развој во износ од 5 мил денари. Веќе е избрана фирмата и ќе се започне со изградба. Исто така, во село Горно Чичево ќе се гради канализација за која средства се обезбедени преку Министерството за животна средина, веќе е завршена постапката за јавна набавка и ќе се започне со изградба. Тие се двата најблиски проекти за кои очекуваме реализација“, нагласи градоначалникот Бешовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Целосно реновирани управните служби во зградата на МРТВ: „Веќе нема да има хаос“

Министерот за внатрешни работи Панче Тошковски денеска заедно со раководството на Министерството го пушти во употреба реконструираното Одделение за управни работи – Скопје кое се наоѓа во зградата на МРТВ.
Тошковски образложи дека реконструкцијата почна кон крајот на месец октомври минатата година, и според него, била една од стратешките планови на ова раководството на МВР со цел граѓаните да добиваат брзи и ефикасни услуги кои ги плаќаат и ги заслужуваат.
„Веќе нема да има хаос, неред и граѓани со нарушено достоинство кога е потребно да се извади личен документ или било која услуга која ја дава овој Оддел. Целта на реконструкцијата е граѓаните да имаат можност за брзи и ефикасни услуги, да го штедат своето време и сето тоа да биде на достоинствен начин како што заслужува секој македонски граѓанин. Со реконструкцијата и реновирањето засега опфатени се 20 т.н. кабини за сликање кои ќе извршуваат повеќе работни функции и ќе даваат повеќе услуги на граѓаните, реконструирана е големата шалтер сала која во наредниот период ќе ги опслужува граѓаните во делот на издавањето на пасошите по итна и редовна постапка, личните карти по итна постапка, возачките дозволи, уверенија за државјанства заедно со сите останати постапки во врска со барањата за прием и отпуст од државјанства, промена на лично име и други, како и услуги од областа на возилата“, потенцираше министерот Тошковски.
Министерот за внатрешни работи Тошковски истакна дека заедничкиот простор кој е наменет и за граѓаните и за вработените е опремен на начин кој ќе овозможи секој граѓанин да се чувствува пријатно за времетраењето на давањето или чекањето на конкретната услуга.
Во реконструкцијата во оваа фаза се реконструирани и 15-на канцеларии за вработените, санитарните чворови, инсталиран е целосно нов централен систем за ладење и греење и извршено е целосно сервирање на надворешните окови, во насока објектот да биде што повеќе енергетски ефикасен.
Тошковски на крајот подвлече дека паралелно со процесот на дигитализација во кој многу од услугите кои ги дава МВР ќе бидат достапни и дигитално, ќе се продолжи со отворање на нови канцеларии на управни служби онаму каде што тие не се достапни за граѓаните, а веќе се отворени шест нови, како и реконструкција и модернизација на други каде што е потребно.
Македонија
ГРОМ бара обештетување на настраданите во Кочани и оставка од Мицкоски

Сведоци сме дека состојбата во Кочани полека но сигурно ескалира. Оправданиот револт на потесните и пошироките семејства на починатите и повредените е повеќе од оправдан. Големата болка на родителите се искажува преку тешки зборови упатени до претставниците на власта и уште потешки квалификации на апологетите на актуелната владејачка гарнитура, велат од ГРОМ.
Според партијата, Владата не се снашла најсоодветно со трагедијата и не е спремна да понесе политичка одговорност, да направи обид да ги смири тензиите и да најде начин да ја ублажи болката на семејствата.
„Затоа ГРОМ смета дека е потребно друга влада која ќе има повеќе разбирање за болката на овие наши граѓани. Предлагаме актуелните владетели да се обидат да придонесат кон деескалација на состојбите, и тоа Владата на Република Македонија предводена од Христијан Мицкоски веднаш да си поднесе неотповиклива оставка и ВМРО-ДПМНЕ да даде нов мандатар за состав на Влад. Новата Влада на Р. Македонија да донесе одлука со која на секое семејство од загинатите ќе им исплати 500.000 евра како мал надомест за големата болка и затоа што дел од родителите не се ни способни веќе за работен ангажман“, велат од ГРОМ.
Партијата предлага повредените лица од пожарот од дискотеката Пулс да се поделат во три категории согласно лекарските наоди и лицата со тешки и трајни оштетувања да добијат исто така по 500.000 евра и секоја година до крајот на животот, министерството за труд и социјална политика да им исплаќа по 30.000 евра, заради трајните животни последици и нивната неспособност за функционирање.
Во втората група да влезат лица со умерени оштетувања за кои ќе има потреба од подолгорочна рехабилитација и хируршки интервенции, да им се исплатат по 300.000 евра еднократно и до крај на животот да примаат по 15.000 евра годишно.
Лицата со лесни оштетувања кои биле болнички хоспитализирани, да им се исплати по 100.000 евра и наредните 3 години по 10.000 илјади евра како надомест за потребни рехабилитации.
Во исто време сите овие граѓани да имаат право да отворат судска постапка пред граѓанскиот суд доколку се незадоволни од обесштетувањето од страна на државата.
ГРОМ бара и Обвинителството и надлежните судски институции да продолжат со гонење и да дадат ефективна завршница на директно одговорните за овој страшен настан.
„За жал одговорноста за овој проблем, владата до сега се обидува само да го персонализира, без да преземе одговорност, но ако владата е неодговорна, државата мора да биде на ниво кон секој граѓанин кој го изгубил животот или има трајни последици како резултат на неодговорното функционирање токму на институциите кои ја претставуваат државата“, велат од ГРОМ.
Македонија
Ѓорѓиевски: Кисела Вода секој ден се менува, да ги чуваме новите реквизити, вандалското однесување да се пријави веднаш

Градоначалникот на општина Кисела Вода Орце Ѓорѓиевски, информираше дека во изминатиот период работеле на промена на старите и поставување на нови детски катчиња, реквизити и урбана опрема. Тој истакна дека се работи за нови нови подови кои се користат за летните Олимписки игри, нови клупи, фонтана и реквизити.
-Кисела Вода секој ден сѐ поубава, модерна и зелена. Изминатиов период работевме на обнова на старите, како и поставување на нови детски катчиња низ нашата општина. Се работи за нови детски катчиња, нова урбана опрема, клупи, фонтани, нови подлоги на игралиштата со полипропиленски под кој официјално се користи за летните Олимписки игри. За најмладите наши жители, за нивната детска игра непречено да тече добиваат модерни и безбедни простори, а повозрасните генерации ќе можат да уживаат во зеленилото и урбаната опрема кои ги нудат овие места. Сето ова, хортикултурно уредено за да естетски изгледа уште поубаво.
Апелирам до родителите и дечињата да ги чуваме овие нови реквизити, а доколку забележат вандалско однесување веднаш да пријават до надлежните полициски служби“.
Нашата Кисела Вода се менува секој ден и тие промени се насекаде околу нас“, рече Ѓорѓиевски.