Свет
Данската влада го откажа планот за „Алкатраз за мигранти“
Новата централно-левичарска влада на социјалдемократите во Данска официјално ги укина плановите за сместување криминални мигранти планирани за депортација на ненаселениот остров Линдхолм, на крајбрежјето на Копенхаген, пренесува „Брејтбарт“.
Според министерот за имиграција и интеграција, Матијас Тесфаје, плановите на претходната влада предводена од либерално-конзервативната партија Венстре се трајно откажани, претежно од економски причини.
„Многу е скапо да се транспортираат странци меѓу Линдхолм и копното. Една вечер на островот чини колку една вечер во луксузен хотел“, објасни Тесфаје за Данското радио и вети дека ќе најде поевтино решение.
Покрај тоа, Тесфај заклучи дека се мали шансите испраќањето во изолиран објект да ги поттикне депортираните мигранти сами да ја напуштат земјата, но нагласи дека укинувањето на плановите не значи дека Данска го сменила ставот кон криминалот.
„Странците криминалци не се добредојдени во Данска. Тие мора да си одат дома“, истакна тој.
Со сега укинатиот план требаше да бидат сместени до 125 одбиени баратели на азил, мигранти со криминални досиеја и џихадисти, планирани за депортација. Тие не можеле да бидат депортирани досега поради немање државјанство или немање договор за репатријација меѓу Данска и матичната земја на депортираниот.
Годишните трошоци по жител на Линдхолм би биле еден милион дански круни (150.000 долари), во споредба со 30.000 круни(45.000 долари) во постојните објекти за депортација, велат од Министерството за миграција.
Поништувањето на плановите за „остров за депортација“ предизвика мешани реакции. Некои ја поздравија одлуката за отфрлање на т.н „Алкатраз за мигранти“ како симболична, пофалувајќи ги социјалдемократите за напуштањето на тврдокорната миграциска политика на нивните претходници.
За разлика од нив, портпаролката за надворешни работи и интеграции на Данската народна партија, Пиа Кјерсгард, го нарече развојот тажен, тврдејќи дека чувањето на криминалните мигранти во Данска е уште поскапо.
Портпаролот за интеграцијата на „Венстре“, Мадс Фугледе, потсети на опасноста што ја предизвикуваат криминалните мигранти.
„Не заборавајте дека во многу случаи ова се опасни луѓе и, според наше мислење, би било најдобро да ги сместитена Линдхолм“, рече тој.
Околу повеќе од 90 години, островот Линдхолм служи како лабораторија за заразни болести како што се шапот и лигавката, беснилото и африканска свинска треска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Министерот за национална безбедност на Израел: Прифаќањето на примирјето од Хамас е трик
Израелскиот министер за национална безбедност Итамар Бен-Гвир денеска го оцени прифаќањето на примирјето од страна на Хамас како трик, јавуваат израелските медиуми.
„Има само еден одговор на триковите и игрите на Хамас – итна наредба да се освои Рафах, да се зголеми воениот притисок и да се продолжи со рушење на Хамас додека не биде целосно поразен“, изјави Бен-Гвир, цитиран од „Тајмс оф Израел“.
Во исто време, „Канал 12“ ги пренесува ставовите на израелските власти кои велат дека израелскиот преговарачки тим штотуку го добил одговорот на Хамас од посредниците.
Во извештајот се вели дека Израел сега внимателно го проценува одговорот на Хамас и ќе даде официјални коментари подоцна оваа вечер.
Во него се вели дека израелските власти веќе велат дека ова не е истиот предлог за договорот што Израел и Египет го договорија пред 10 дена, што оттогаш служеше како основа за индиректни преговори“, се вели во ТВ прилогот.
„Скај њуз“ пишува дека Израел тврди оти Хамас прифатил „помека“ верзија на договорот за прекин на огнот предложен од Египет, што е неприфатливо за израелските власти. Странските медиуми јавуваат и дека израелските власти тврдат дека најавата на Хамас се чини дека е измама со цел Израел да се претстави како страна која не е подготвена да го прифати договорот.
Овие нови клаузули, меѓу другото, се однесуваат на кардиналните прашања дали, како и кога ќе заврши војната и какви гаранции се нудат во овој поглед.
Според извештајот, Хамас во последните денови ги заостри своите барања и бара војната да заврши во првата, 40-дневна фаза од договорот, наместо во втората или третата фаза.
Израел, од своја страна, постојано го отфрла завршувањето на војната како дел од договорот за заложници, инсистирајќи наместо тоа дека ќе ги продолжи борбите откако ќе се спроведе договорот, во согласност со неговите двојни воени цели: враќање на заложниците и уништување на Хамас.
Хамас, според претходните извештаи, објави дека го прифатил договорот за прекин на огнот предложен од Египет и Катар со цел да се стави крај на седуммесечната војна со Израел во Газа, а израелските медиуми цитираа официјални лица дека израелскиот преговарачки тим го добил одговорот од посредниците.
Регион
(Видео) „Мажот ја навредувал и изневерувал“ – Обвинителството во Албанија со детали за мајката што скокна во река со своите деца
Обвинителството на Основниот суд од општа надлежност во Скадар во комуникација до медиумите изнесе повеќе детали за трагедијата во семејството Арази во албанскиот град Скадар, каде досега се пронајдени телата на две деца, додека потрагата по телото на мајката и третото дете продолжува.
„До оваа фаза се утврдени сомнежи врз основа на докази дека државјанин Е.А., како последица на континуирано психичко насилство врз неговата сопруга, манифестирано во форма на континуирани навреди и прељуба, тешко нарушувајќи го нејзиното достоинство, го предизвикал самоубиството на А.А., за која се сомнева дека во тешка психичка состојба, се фрлила во реката заедно со трите малолетни деца“, се вели во соопштението на Обвинителството.
Алма Арази (39) со трите деца скокна во студената река.
Телото на најстарото девојче било пронајдено вчера во реката, додека телото на второто денеска.
Во потрагата учествува и рибарот кој вчера пронашол едно од девојчињата и кој рекол дека потрагата е многу комплицирана.
По страшната трагедија, нејзиниот сопруг е уапсен и обвинет за семејно насилство и предизвикување самоубиство.
Новинарот на „Еуроњуз Албанија“ рече дека за време на сведочењето дадено во полиција, 39-годишниот сопруг Ергис Арази се појавил многу ладен за време на испрашувањето, не покажал никакви емоции и ги отфрлил обвинувањата дека ја малтретирал сопругата или другите деца.
Тој рече дека парот бил во стабилна економска ситуација, претходно живеел во Италија и Германија, а неодамна се преселил во Скадар.
Арази, откако неговото семејство било пријавено за исчезнато, два дена подоцна бил виден во кафуле со пријателите и наводно воопшто не бил вознемирен, наведува „Voxnews.al“, повикувајќи се на изјавите на неговите пријатели.
Како што рекоа, тој бил сосема мирен.
Семејството на Ергис тврди дека тој никогаш не би им наштетил. Тие тврдат дека парот имал проблеми меѓу себе, но дека Ергис Арази не бил насилник.
„Ги обожаваше децата. Тој никогаш не би им наштетил. Работеше цел ден во сервис за мобилни телефони за да ги испрати во приватно училиште. Можеби имал проблеми со сопругата, но таа никогаш не требало да им го прави тоа на децата. Тоа нема да и го простиме“, рекле тие.
Свет
Хамас: Се согласивме на прекин на огнот
Хамас објави соопштение дека го прифаќа египетско-катарскиот предлог за прекин на огнот.
Во соопштението се наведува дека нејзиниот врховен лидер Исмаил Ханије ја пренел веста во телефонски разговор со катарскиот премиер и египетскиот министер за разузнавање.
Двете земји посредуваат во повеќемесечните разговори меѓу Израел и Хамас. Сè уште нема коментари од Израел.
Претходно денеска Израел најави офанзива насочена кон Рафах, најјужниот град Газа. Повеќе од милион жители се засолниле во градот поради судирите во другите делови на Појасот Газа.
Предлогот не е објавен во јавноста, но првата фаза, наводно, бара 33 живи заложници: жени, деца, стари лица и болни да бидат ослободени за време на 40-дневното примирје, во замена за стотици палестински затвореници.