Македонија
Јанчева: Новите контејнери што ги набави Град Скопје се според европските технолошки стандарди

Набавени се нови контејнери кои се највисокиот технолошки стандард применет во Европа, изјави Љубица Јанчева, претседателка на Советот на Град Скопје и претседателка на ОО СДСМ Аеродром.
Со 540 нови контејнери со капацитет од 3.200 литри, рече Јанчева, ќе бидат заменети над 1.800 од 4.500 досегашни стари контејнери.
„Новите контејнери се речиси со 3 пати поголем капацитет од досегашните, опремени со механизам за автоматско затворање на капакот и упатства за правилно користење. Истовремено, во соработка со ‘Пакомак’ набавени се и 30 контејнери со капацитет од 2.200 литри за селектирање отпад. Со оглед на тоа што станува збор за сосема нов систем, градот набави 4 нови комунални возила за третман на овие контејнери. Овие возила се опремени со технолошки најсовремен систем за странично собирање на отпадот, што значително ќе го забрза и поевтини процесот на собирање комунален отпад во нашиот град“, најави претседателката на Советот.
Град Скопје набавил и 950 нови канти за џебен отпад, што преставува зголемување од една половина од досегашните 1.750 канти. 850 од нив се направени од еластичен материјал и дополнително се заштитени од непрописно полнење со кеси полни со комунален отпад и од растурање на ѓубрето од уличните животни. Другите 100 канти се приспособени и за отпадоци од домашните миленици.
„Овие канти заедно со новите 12 електрични машини за вакуумско чистење и новите 10 електрични возила за чистење и миење јавни површини, освен што го зголемуваат техничкиот потенцијал, дополнително претставуваат можност за граѓаните заеднички да се грижиме за хигиената на јавниот простор во нашиот град. Возилата за миење и чистење се наменети за одржување на хигиената на јавните простори, пред сè, шеталиштата, тротоарите и вело-патеките. Се работи за технолошки најсовремени машини на електричен погон заради што воопшто нема да го загадуваат воздухот во Скопје“, додаде Јанчева.
Рече дека Град Скопје ќе продолжи со инвестирање во техничките и човечките ресурси за одржување на хигиената, ќе продолжи и со кампањите за правилно постапување со отпадот и ќе го засили инспекцискиот надзор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.