Свет
Трамп: Кина треба да покрене истрага за Бајден и неговиот син
Американскиот претседател Доналд Трамп, против кого во американскиот Конгрес е покрената постапка за отповикување зошто побарал од украинскиот колега да поттикне истрага за неговиот политички ривал Џо Бајден, денеска рече дека е подготвен слично барање да упати и до кинескиот претседател.
„Кина треба да покрене истрага за Бајден“, изјави Трамп за новинарите пред Белата куќа, а пренесе агенцијата АП.
Трамп рече дека не побарал директно од кинескиот претседател Шји Џјинпинг да го испита дејствувањето на Бајден и неговиот син Хантер, но рече дека тоа е секако нешто за што би можел да почне да размислува.
Во Претставничкиот дом на американскиот Конгрес во тек е истрага што може да доведе до отповикување на Трамп, откако протекоа информации дека тој вршел притисок врз неговиот украински колега Володимир Зеленски, за да го испита работењето на Хантер Бајден, син на поранешниот потпретседател на САД, Џо Бајден, односно неговото работење во украинска компанија за гас во времето кога татко му бил потпретседател.
„Вашингтон пост“ вчера објави дека Хантер Бајден формирал приватен фонд со инвестиции од кинески фирми кога со неговиот татко бил во официјална посета на Пекинг во 2013 година.
Според АП, нема докази дека поранешниот потпретседател остварил финансиски профити преку деловните контакти на неговиот син.
Хантер Бајден бил во бордот на директори на украинска нафтена компанија истовремено додека неговиот татко, под администрацијата на Барак Обама, управувал со односите меѓу Вашингтон и Киев.
Иако тајмингот ги загрижува борците против корупција, засега нема докази дека поранешниот потпретседател на САД и демократски кандидат за претседателските избори во 2020, заедно со неговиот син дејствувале незаконски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Претседателот на Колумбија: Ги раскинуваме дипломатските односи со Израел
Колумбискиот претседател Густаво Петро изјави дека ќе ги прекине дипломатските односи со Израел поради војната во Газа.
Петро претходно силно го критикуваше израелскиот премиер Бенјамин Нетанјаху и повика Колумбија да се приклучи на тужбата за геноцид на Јужна Африка против Израел пред Меѓународниот суд на правдата.
„Овде пред вас, владата на промени, претседателот на републиката, најавува дека утре ќе ги прекине дипломатските односи со државата Израел, затоа што има влада, затоа што има претседател геноциден“, рече Петро на собир по повод Меѓународниот ден на трудот.
Светот не може да биде слеп пред настаните во Газа, додаде тој.
Во шестмесечната воена операција на Тел Авив загинаа 34.488 Палестинци, а ранети се 77.643, според здравствените власти во Газа. Војната ги расели повеќето од 2,3 милиони жители на Појасот Газа и го уништи најголемиот дел од крајбрежната енклава.
Најавата на Петро за прекин на дипломатските односи со Израел доаѓа во екот на се почестите шпекулации дека Израел наскоро ќе го нападне градот Рафах во јужниот дел на Газа, каде што се засолниле повеќе од милион Палестинци раселени од своите домови.
Регион
Tлото на Балканот се тресе: По Хрватска, земјотреси и во Албанија и Грција
Два земјотреси, во растојание од една минута – во 19.19 и 19.20 часот – вечерва се регистрирани на територијата на Албанија.
Земјотресите се со интензитет од 2,1 степен според Рихеровата скала.
Епицентарот на првиот земјотрес бил на седум километри од Елбасан, додека вториот на 62 километри од Тирана.
Според информациите на ЕМСЦ, неколку минути претходно, земјотрес од 2,5 степени имало и во јужниот дел од Грција, а уште два од 2 и 2,3 степени се регистрирани предмалку на Крит.
Претходно денес, Хрватска ја погоди силен земјотрес од 4,7 степени, а беше почувствуван и во Босна и Херцеговина. По овој потрес, следеа неколку помали.
Свет
Хамас: Одговор за предлогот за примирје и ослободување на заложниците веројатно утре
Водачите на Хамас вечерва рекоа дека го проучуваат предлогот за примирје и ослободување на заложниците што им го претставија египетските посредници и велат дека се надеваат оти ќе го испратат својот одговор до утре, се вели во соопштението на палестинската милитантна група испратена до „Асошиејтед прес“.
Тековната рунда разговори за примирје меѓу Израел и Хамас изгледаат сериозни, но страните се во несогласување за едно клучно прашање – дали војната треба да заврши како дел од договорот, објави „Тајмс оф Израел“.
„Многу веројатно утре, односно четврток, ако даде Господ, посредниците ќе добијат одговор“, соопшти Хамас.
Преговорите меѓу Хамас и Израел, преку посредници како САД, Катар и Египет, траат со недели, а по Париз се водат нови рунди разговори во Каиро.