Македонија
Министерот за здравство и Здружението за мултипла склероза потпишаа меморандум за соработка
![](https://makfax.com.mk/wp-content/uploads/2019/10/DSC07482-2.jpg)
Министерот за здравство, Венко Филипче, и претседателката на Националното здружение за помош и поддршка на лица со мултипла склероза, Ана Карајанова-Димитрушева, денеска потпишаа меморандум за соработка со цел обезбедување соодветна здравствена заштита на пациентите со мултипла склероза (МС).
Соработката е во насока на вложување напори за обезбедување дијагностика и достапност на третман, кои би ја спречиле прогресијата на болеста, а кои се во согласност со водичите и протоколите, како и директни заложби и придонес во областа на здравството кој би резултирал пациентите со МС непречено да се интегрираат во општествениот живот и да се остварат како рамноправни, образовани, работоспособни и семејни граѓани.
Министерот Филипче во своето обраќање потенцира дека Министерството за здравство посветено работи на унапредување на грижата за пациентите со мултипла склероза.
„Оваа година повеќекратно го зголемивме бројот на пациенти што се на третман со иновативната терапија Ocrelizumab, и тоа од 9 пациенти, кои минатата година беа на третман со оваа терапија, сега ја примаат вкупно 43 пациенти со оваа дијагноза. Особено е важно што со примањето на иновативните лекови може да се контролира прогресијата на болеста. Исто така, од оваа година Универзитетската клиника за неврологија добива поголем условен буџет од Фондот, наменет токму за лекови за мултипла склероза. Првпат во јавното здравство обезбедена е и посебна просторија, каде што овие пациенти со соодветен медицински надзор ја примаат инфузионата терапија. Нашите заложби за подобро здравје за сите пациенти продолжуваат и во иднина“, изјави министерот Филипче.
Националното здружение за помош и поддршка на лица со мултипла склероза, денеска, премиерно го прикажа првиот краткометражен филм за мултипла склероза со наслов „Роденденски подарок“, кој претставува прв успешно реализиран проект на Националното здружение за МС и Факултетот за драмски уметности во Скопје. Во филмот вешто се отсликани реалноста и здравствените и социјалните предизвици со кои се соочуваат лицата со МС.
Министерот Филипче упати честитки за сработеното до Факултетот за драмски уметности во Скопје, како и до Националното здружение за мултипла склероза, кој е постојан партнер во грижата за оваа категорија пациенти. Мултипла склероза (МС) е една од најчестите невролошки нарушувања и причини за инвалидитет кај младите возрасни лица. Тоа е хронична, прогресивна, имунолошки посредувана, воспалителна и дегенеративна болест на централниот нервен систем.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Министерот Тошковски претседаваше со конститутивната седница на Управувачкиот комитет за координација и управување со системот за управување со кризи
![](https://makfax.com.mk/wp-content/uploads/2024/07/449630277_122162759648197509_1806381321720411464_n.jpg)
Министерот за внатрешни работи Панче Тошковски денес како претседавач на Управувачкиот комитет за координација и управување со системот за управување со кризи, присуствуваше на конститутивната седница на комитетот која се одржа во просториите на Центарот за управување со кризи.
На седницата присуствуваа и министерот за надворешни работи и надворешна трговија Тимчо Муцунски, министерот за одбрана Владо Мисајловски, министерот за здравство Арбен Таравари и министерот за земјоделство, шумарство и водостопанство Цветан Трипуновски.
На средбата, директорот на ЦУК Стојанче Ангелов информираше за мигрантската кризна состојба на јужната и северната граница, кризната состојба во КПУ „Идризово“, како и за бројот на пожари на отворен простор и ресурсите за нивно гаснење.
„Продолжуваме посветено да работиме на надминување на овие предизвици, обезбедување брза и ефикасна реакција во кризните ситуации, се со цел поголема безбедност за нашите граѓани“, потенцираше министерот Тошковски.
Македонија
Средба Муцунски –Лудва: изразен интерес за искористување на потенцијалот за натамошно развивање на економската соработка меѓу двете земји
![](https://makfax.com.mk/wp-content/uploads/2024/07/mucunski-ludva-2.jpeg)
Министерот за надворешни работи и надворешна трговија Тимчо Муцунски, денес оствари средба со амбасадорот на Чешката Република, Јарослав Лудва.
На средбата беше истакнато взаемно задоволство од одбележувањето на 30-години од воспоставувањето на дипломатските односи меѓу двете земји, кои се карактеризираат со развиена соработка во многу сфери и отворен и продлабочен дијалог по сите клучни прашања за двете земји.
Министерот Муцунски се заблагодари за силната чешка поддршка за процесот за интеграција на нашата земја во ЕУ, особено нагласена и преку Вишеградската и Групата на пријатели на проширувањето, како и преку т.н. Славков формат. Притоа, ја потенцира цврстата определба на новата влада за забрзување на евроинтеграцискиот процес и спроведување на клучните реформи.
Министерот изрази интерес за искористување на потенцијалот за натамошно развивање на економската соработка меѓу двете земји во повеќе области, меѓи кои и во енергетскиот сектор и земјоделството. Притоа, изразувајќи задоволство од порастот на трговската размена во изминатите години, Муцунски ја нагласи важноста од натамошен фокус на унапредувањето на бизнис релациите, што ќе биде меѓу приоритетите на Министерството во следниот период.
Македонија
Зголемена фреквенција на возила на „Табановце“ и „Богородица“, се чека околу 30 минути
![](https://makfax.com.mk/wp-content/uploads/2023/04/DJI_0486.00_05_25_44.Still006.jpg)
Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е зголемен. Нa ГП Табановце и Богородица има зголемена фреквенција на возила за излез од Мaкедонија, време на чекање околу 30 минути. На останатите гранични премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.