Воздушна бомба од Втората светска војна со тежина од приближно 227 килограми беше успешно отстранета рано утрово во Мостар, БиХ, откако беше откриена вчера за време на градежните работи на нов станбен комплекс.

Бомбата AN-M64, произведена во Америка, беше отстранета од членови на тимот за деминирање на Федералната администрација за цивилна заштита, со поддршка на полицијата на Херцегованско-неретванскиот округ и противпожарната служба на градот Мостар.

Вадењето и отстранувањето на бомбата беше извршено под строги безбедносни мерки. Целата населба беше евакуирана утрово, а пристапот до областа каде што беше пронајдена бомбата беше забранет во радиус од 300 метри.

Оваа воздушна бомба е пронајдена и отстранета од област во поранешен рударски комплекс. Тоа е една од најчестите американски бомби што ги користеле сојузничките авиони за време на Втората светска војна за таргетирање инфраструктура, индустриски објекти и воени цели.

Мостар беше честа цел на сојузничките напади кон крајот на Втората светска војна, особено поради неговиот рударско-индустриски комплекс и аеродром. Во 2021 година, во населбата Родоч беше пронајдена бомба тешка околу 230 килограми, додека во последната деценија во близина на аеродромот беа откриени повеќе од 20 бомби од различен калибар.

Романија вчера ги крена борбените авиони откако беспилотно летало влезе во нејзиниот воздушен простор за време на рускиот напад врз украинската инфраструктура во близина на границата, соопшти Министерството за одбрана.

Романија, членка на Европската Унија и НАТО, која дели граница од 650 километри со Украина, постојано наидува на остатоци од руски беспилотни летала што паднале на нејзина територија како дел од руските напади врз пристанишната инфраструктура на украинската страна од Дунав.

Министерството соопшти дека радарот прво го детектирал сигналот на беспилотното летало кога веќе влегло околу осум километри во романскиот воздушен простор, во близина на селата Периправа и Чилија Вече во округот Тулча.

Сигналот потоа исчезнал од радарот пред спорадично да се појави повторно 12 минути подоцна, во близина на село во округот Галати, додаде министерството.

Романија покрена два борбени авиони Еурофајтер кои припаѓаат на германска мисија за надзор на воздушниот простор, проследени со два романски Ф-16, и ги предупреди жителите на југоисточните окрузи Тулча и Галац да побараат засолниште.

Министерството додаде дека сè уште не добило никакви пријави за паѓање на беспилотни летала на романска територија.

Полска, исто така членка на НАТО што граничи со западна Украина, привремено ги затвори аеродромите Жешов и Лублин на југоистокот од земјата и ги покрена своите и сојузничките авиони за да го заштити воздушниот простор.

Министерот за одбрана на Италија, Гвидо Кросето, упати силен повик до Западот да одговори на зголемената фреквенција на руски хибридни напади, кои ги опиша како потенцијално катастрофални, пишува Politico.

Во сеопфатен документ од 125 страници, објавен вчера попладне под наслов „Спротивставување на хибридното војување: Активна стратегија“, Кросето остро ја осуди инерцијата на европските и НАТО сојузниците во услови на сè подрска руска агресија.

„Хибридната војна е постојана и напаѓа критична инфраструктура, центри за донесување одлуки, основни услуги и ткивото на секоја земја, со дневни и растечки ризици од катастрофална штета“, се наведува во документот. „Ние сме нападнати, а хибридните бомби продолжуваат да паѓаат: Времето да се дејствува е сега.“

Кросето го нарече апсурдно и неодржливо тоа што Западот прави толку малку за да одговори на руските напади. Тој повлече паралела: ако бевме нападнати од копнена армија, немаше само да се барикадираме дома и да се надеваме дека ќе си одат.

Тој нагласи дека Западот е вклучен во асиметричен конфликт и поседува алатки за одговор, но неговите акции постојано заостануваат зад Русите поради тоа што се попречени од сопствените демократски процеси и бавното донесување одлуки во ЕУ и НАТО, кое се базира на консензус.

Документот наведува и други земји како закани, вклучувајќи ги Кина, Иран и Северна Кореја.

Министерот предупредува дека фреквенцијата на хибридни напади се зголемува затоа што Кремљ на Владимир Путин користи „интегрирана употреба на воени и невоени алатки за дестабилизација на своите конкуренти, нарушување на нивната внатрешна кохезија и влијание врз нивната политичка волја“.

Примерите вклучуваат голем број инциденти: тврдења дека озлогласена руска воена разузнавачка група хакери ги таргетирала компаниите што ѝ помагаат на Украина, палење на магацини за опрема во Полска, користење на мигранти од страна на Белорусија за дестабилизација на Полска, мистериозни беспилотни летала околу европските аеродроми и тврдења за руско поткопување на претседателските избори во Романија.

За да се спротивстави на овие закани, Кросето изнесе конкретни предлози. Тој се залага за формирање европски центар за борба против хибридното војување и формирање на кибер сила со 1.500 членови. Покрај тоа, тој предлага вработување воен персонал специјализиран за вештачка интелигенција, заштита на синџирот на снабдување и експерти за борба против дезинформации.

Фото: ЕПА