Македонија
(Видео) Пендаровски предлага вонреден Самит на земјите од Западен Балкан

Македонскиот претседател Стево Пендаровски предлага во наредниот период да се одржи вонреден Самит на земјите од Западниот Балкан на кој ќе се разговара за „проширувањето и добрососедските односи и да ги отфрлиме алтернативите на проширувањето“.Доколку има согласност,Самитот би се одржал во Македонија.
Ваквиот предлог македонскиот претседатал го изнесе по средбата со албанскиот претседател Илир Мета во Тирана. Ова е прва средба на официјално ниво меѓу двете земји по одбивањето од страна на ЕУ да одреди датум за почеток на преговорите за Македонија и за Албанија.
Во Тирана, претседателот Пендаровски беше примен со највисоки државни и воени почести од претседателот на Република Албанија, Илир Мета. Двајцата претседатели одржаа тет-а-тет средба и пленарна средба со официјалните делегации, по што се одржа заедничка прес-конференција на претседателите.
Во продолжение е интегралната изјава на претседателот Пендаровски на прес конференцијата:
„Најпрвo сакам да му се заблагодарам на мојот домаќин, на претседателот Мета за поканата да ја посетам Република Албанија и за срдечниот пречек, кој е јас мислам достоен на две соседни, пријателски и европски држави.
Односите меѓу Република Северна Македонија и Република Албанија во континуитет бележат позитивен тренд на развој. Во оваа прилика сакам да изразам задоволство од постигнатото ниво на билатералните односи, како и од соработката и на регионален и на мултилатерален план. Северна Македонија и Албанија остваруваат плодна и интензивна соработка што претставува потврда за одличните односи меѓу двете држави. Нас не поврзуваат многу работи, заедничката историја, заедничката географија, заедничката евроатлантска иднина, како и заедничките предизвици во делот на општествените реформи и трансформации.
Република Северна Македонија, како еден од највисоките приоритети го има градењето на односи на добрососедство, што особено е нагласено изминативе 2-3 години, а за што потврда е и оваа моја посета на пријателска Албанија, која ја остварувам една седмица по исходот на последниот самит на ЕУ, би рекол во време на вонредни околности во регионот.
На средбата, го информирав мојот колега, претседателот Мета, за неодамна одржаната лидерска средба кај нас, на која утврдивме државен консензус, да се продолжи по европскиот пат, но и да се организираат предвремени парламентарни избори. Со албанскиот претседател се согласивме дека наша обврска како шефови на држави е да продолжиме да ги охрабруваме сите политички фактори во нашите држави да продолжат со спроведување на обврските од европската реформска агенда во интерес, пред се, на нашите граѓани, како и да продолжиме да ги убедуваме европските лидери дека преговорите со земјите во регионот се влог во стабилноста и просперитетот.
Во тој контекст мислам дека е добро, земјите од западниот Балкан во наредниов период да одржат еден вонреден самит, на кој ќе дискутираме за проширувањето, за добрососедските односи и притоа да ги отфрлиме идеите за алтернативи на проширувањето. Доколку постои согласност околу овие работи, мојот предлог би бил Република Северна Македонија да биде домаќин на овој самит.Со претседателот Мета се согласивме дека од големо значење за нас е досегашната поддршка од Албанија за македонското членство во НАТО, додека ние, од своја страна, го ставаме на располагање нашето досегашно искуство на планот на евроинтеграциите и сметам дека од особено значење е оваа соработка, со несмален интензитет да продолжи и во иднина. Но, исто така констатиравме дека треба да ја продолжиме и насочиме нашата енергија и внимание и во економскиот дел, затоа што економската соработка не ги одразува добрите политички односи и фактот дека сме соседни и пријателски држави.
Денес предложив и иницијатива за формирање на, да ја наречам, неформална група на македонско-албанско пријателство во која би биле поканети да учествуваат, членуваат, истакнати интелектуалци, стопанственици, претставници од културата, од невладиниот сектор, но пред се, младите, кои би се состанувале наизменично во двете земји и би давале предлози за унапредување на соработката, билатералните односи и пријателството меѓу двете земји.
Претседателот Мета зборуваше за неопходниот услов за развој на нашите две држави и на целиот регион, зборуваше за физичката инфраструктура и тука потполно се согласувам и го поддржувам неговиот предлог, особено фамозниот коридор 8 за кој многу малку е направено во изминативе две до три децении. Меѓутоа, мене ми се чини дека исто така, ако не и поважно е да ја градиме, да ја надградуваме човечката инфраструктура во регионот која може да биде предуслов за подобрување и на билатералата и на мултилатералата во регионот и пошироко.
На крајот, би сакал да истакнам дека на средбата разменивме мислење и информации за положбата на македонската заедница во Албанија и на албанската во Република Северна Македонија, кои се неспорно фактори на зближување меѓу двата народа и двете држави и збогатување на соработката меѓу нашите две пријателски земји“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Арсовска го прозва Стојкоски: Аценце, ти направив 27 улици, ни фала не кажа и уште бегаш од дуел за хемиските фабрики

Градоначалничката на Скопје, Данела Арсовска, преку објава на својот профил на Фејсбук му се обрати на градоначалникот на општина Ѓорче Петров, Александар Стојкоски, со серија критики за неговото однесување и, како што тврди, неспособност да го признае придонесот на Град Скопје во реализацијата на инфраструктурни проекти.
„Ова е објава за читање за сите интелигентни и слободоумни граѓани, другите не читајте!“ – започнува Арсовска во својот пост, порачувајќи му директно на Стојкоски:
„Аценце, ти се обраќам да се потсетиш, како неспособната што спиела 3 години ти направи 27 улици во 5 населени места во Ѓорче Петров“.
Таа додава дека улиците биле изградени преку Јавното претпријатие „Улици и патишта Скопје“, без учество на општински средства, а Стојкоски само се појавил за да се слика, без притоа, како што вели, ни да се заблагодари.
„Ти ги направивме со скопското јавно претпријатие ‘Улици и патишта Скопје’, ти освен што се сликаше, не потроши ни денар, а не се ни заблагодари“, напиша Арсовска.
Во објавата, Арсовска повторно го повикува Стојкоски на ТВ дуел во врска со деталниот урбанистички план кој, според неа, овозможува изградба на хемиски фабрики и 31 висококатница во централното градско подрачје на Ѓорче Петров.
„Уште чекам да прифатиш ТВ дуел за ДУП-от кој го донесе за да се изградат хемиските фабрики и 31 висококатници сред Ѓорче Петров. Тоа што плаќате медиуми и партиски ботови да ве фалат, а другите да ги понижуваат, не значи дека сте во право!“, заврши градоначалничката.
Македонија
Има предлог за средба со Бугарија, треба Софија да се изјасни, рече Мицкоски

Премиерот Христијан Мицкоски денеска информираше дека е во тек комуникација со Канцеларијата на Европската комисија во земјава околу иницијативата за средба со бугарската страна, и дека веќе постои предлог-термин, за кој сè уште се чека потврда од официјална Софија.
„Имаме комуникација со канцеларијата на Европската комисија и вчера и денес, се уште немам повратен одговор. Има предлог термин, да почекаме да се изјаснат од бугарската страна“, рече Мицкоски на новинарско прашање дали стапил во контакт со претседателот на Советот на ЕУ Антонио Кошта и дали Бугарија ќе прифати ваква средба.
Паралелно со ова, претседателката Гордана Сиљановска Давкова вчера изјави дека иако вообичаено се одржуваат средби со хомолозите, таа нема проблем да разговара и со бугарскиот премиер Росен Жељазков на претстојниот Самит на НАТО во Хаг. Таа појасни дека нејзиниот бугарски колега, претседателот Румен Радев, нема да присуствува на Самитот, што отвора можност за разговор со Жељазков во насока на деблокирање на евроинтеграциите на Македонија.
„Јас за евентуална средба разговарав со господинот Антонио Кошта, негов беше предлогот. Во меѓувреме, јас не знам, ќе бидам таму ако ми е мене редот. Инаку, се знае, ред е да се разговара со хомологот, но еве нема проблем, меѓутоа не зависи од мене туку зависи од нашите соседи“, рече Сиљановска Давкова.
Македонија
ВМРО-ДПМНЕ: СДСМ грубо ја злоупотребува трагедијата во Кочани за политички поени

ВМРО-ДПМНЕ денеска реагираше на обвинувањата од страна на СДСМ во врска со истрагата за трагичниот пожар во Кочани, при што загинаа деца, обвинувајќи ја партијата дека прави „груба злоупотреба“ на трагедијата со цел собирање политички поени.
„СДС прави груба злоупотреба на трагедијата во Кочани со цел да добие политички поен плус. Обвинувањата на СДС дека институциите постапуваат под притисок на опозицијата се безочна лага,“ велат од ВМРО-ДПМНЕ во писмената реакција.
Од партијата нагласуваат дека институциите сега постапуваат професионално и неселективно, и дека во истрагата се опфатени над 60 лица, меѓу кои актуелни и поранешни функционери, градоначалници, бизнисмени, вработени во институции и членови на Министерството за внатрешни работи, а дел од нив се веќе во притвор.
„МВР и институциите на системот ги доставија сите потребни докази и информации до Јавното обвинителство уште пред еден месец. Обемната документација, со над 60 опфатени лица, е доказ за темелна и сеопфатна постапка“, стои во соопштението.
Од ВМРО-ДПМНЕ посочуваат дека постапувањето на институциите денес е спротивно на тоа што, според нив, се случувало во минатото за време на владеењето на СДСМ и Оливер Спасовски.
„Сега има одговорност за секој, без разлика кој е и од каде е. За разлика од МВР под Спасовски, каде што никој не одговараше за модуларната болница, Беса Транс или Ласкарци – случаи каде што имаше голем број жртви“, додаваат од ВМРО-ДПМНЕ.