Македонија
Француската сенаторка Елен Конве-Муре ќе ја посети земјава
Амбасадата на Франција ја најавува посетата на 4 и 5 ноември на сенаторката Елен Конве-Муре, потпретседателка на Сенатот, која учествуваше во изготвувањето на предлог-законот со кој се одобрува ратификувањето на протоколот кон Северноатлантскиот договор за пристап на Република Северна Македонија.
Во текот на посетата таа ќе оствари средби со претседателот на Собранието, Талат Џафери, со потпретседателот Горан Мисовски и со пратеничката група на Собранието за соработка со парламентот на Француската Република, како и со Хари Локвенец, претседател на Комисијата за одбрана и безбедност, Антонио Милошоски, претседател на Комисијата за надворешни работи, и со Артан Груби, претседател на собраниската Комисија за европски прашања.
Во рамките на оваа посета, која го одразува јакнењето на француско-македонските парламентарни размени во перспектива на европскиот пат на земјата, кој останува сосема актуелен, е предвидено да се одржи и конференција во Дипломатската академија на МНР во присуство на заменик-министерот за надворешни работи, Андреј Жерновски, во врска со еволуцијата на европската одбрана.
Во вторник на 5 ноември сенаторката ќе ги посети Француските воени гробишта во Скопје, како и Спомен-куќата и музеј, која беше свечено отворена во мај 2018 година, за да им оддаде почит на 3.000 војници што почиваат таму, а кои загинале за Франција.
Оваа посета, која се реализира во рамките на француската стратегија за Западен Балкан, ги реафирмира односите на доверба и пријателство помеѓу францускиот Сенат и македонското Собрание, како и кон граѓаните во целина, наведуваат од француската амбасада преку соопштение.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Уапсен врховен судија поради сомненија за примање поткуп
Врховниот судија Наке Георгиев е уапсен поради сомнеж за примање поткуп.
„Денеска 20 мај, лишен од слобода е судија од Врховниот суд поради сомневања за сторено кривично дело Примање награда за противзаконито влијание. Судијата е лишен од слобода на лице место при извршување на кривичното дело. Се чекаат натамошни насоки од надлежен јавен обвинител“, велат од МВР.
Засега не е позната локацијата каде што е приведен судијата, ниту пак, за колкава сума станува збор.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.