Свет
Германските зелени на врвот на листата за отстрел на неонацистичка група поврзана со САД
Високи членови на германската Зелена партија добија смртни закани од една ултрадесничарска група која се заканува дека ќе ги погуби, шокирајќи ја локалната политичка елита, пренесува РТ.
Џем Оздемир и Клаудија Рот објавија дека добиле закани што ѝ ги припишуваат на „Атомфафе дивизион Дојчленд (Дирекција за нуклеарно оружје Германија), локален огранок на американска неонацистичка група. Оздемир, поранешен копретседател на Зелената партија и висок политичар со турско потекло, вели дека во електронска порака бил означен како цел број еден на „листата за отстрел“ на AWD.
„Во моментот планираме како и кога ќе ве егзекутираме; на следниот јавен митинг можеби? Или пред вашата куќа? “, германските весници ја цитираат пораката.
Оздемир сериозно го сфатил писмото, иако не му се туѓи заканите – на пример, турските националисти пред неколку години се закануваа дека ќе го убијат зашто го напаѓал турскиот претседател Реџеп Таип Ердоган.
Рот, во моментов потпретседателка на Бундестагот, беше на второто место на листата за отстрел. „Заканите се последните во долгиот список обиди за заплашување на локалните политичари и на граѓанското општество, на Евреите и муслиманите, на женските уметници и на мигрантите“, рече таа.
Заканите предизвикаа силни реакции од некои германски политичари. Константин Куле, спикер за внатрешни работи на Слободната демократска партија (ФДП), рече дека има драматичен пораст во бројот на закани против јавните службеници, предупредувајќи дека тие не треба да се претвораат во плен за да бидат ловени од екстремистите.
Други побараа да се забрза планираната акција против говорот на омраза и десничарскиот екстремизам преку интернет. Пратениците во моментот разгледуваат нацрт-закон според кој социјалните мрежи ќе мора да им ги предаваат ИП-адресите и другите податоци на германските власти и кој предлага изрекување големи казни за виновниците.
Веста доаѓа неколку недели откако други политичари од пониските ешалони во источната држава Тирингија беа контактирани од десничарски групи, кои се закануваа дека ќе ги нападнат со нож или со автомобил-бомба ако не ја напуштат својата партија. Едно од писмата завршувало со зборовите „Зиг Хил и Хејл Хитлер“.
Стравот од политичко насилство од екстремистите ескалираше во јуни, откако Валтер Либке, кој беше претседател на регионалниот совет во градот Касел и член на ЦДУ, беше застрелан во близина на својата куќа. Политичарот беше поддржувач на бегалската политика на Меркел, а осомничениот имал врски со екстремнодесничарска, одмаздничка група.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Русија и’ се закани на Велика Британија
Русија за прв пат официјално и се закани на Британија со напади на нејзина територија.
„Доколку Украина ги користи ракетите доставени од Велика Британија за да ја нападне Русија, тоа може да резултира со руски напади врз воени цели во Велика Британија и надвор од Украина“, соопшти руското Министерство за надворешни работи.
Британскиот амбасадор Најџел Кејси беше повикан во руското Министерство за надворешни работи на официјална протестна нота откако британскиот министер за надворешни работи Дејвид Камерон изјави дека Украина има право да користи британско оружје за напад на руска територија. Руското Министерство за надворешни работи соопшти дека изјавата на Камерон значи дека Британија практично признала дека е учесник во војната во Украина.
„Кејси беше предупреден дека како одговор на украинските напади на руска територија со британско оружје, сите британски воени инсталации и опрема на територијата на Украина и во странство би можеле да станат цели“, се вели во соопштението.
„Амбасадорот е поканет да размисли за неизбежните катастрофални последици од ваквите непријателски потези на Лондон и веднаш да ги отфрли воинствените и провокативни изјави на министерот за надворешни работи на дециден и недвосмислен начин“, пишуваат од Министерството.
Британскиот министер за надворешни работи Дејвид Камерон минатата недела изјави дека Украина треба да одлучи како да користи британско оружје и нагласи дека Киев има право да гаѓа цели на руска територија.
За време на посетата на Киев, тој рече дека Британија ќе и дава на Украина 3 милијарди фунти (околу 3,5 милијарди евра) годишно, колку што е потребно. „Исто како што Русија напаѓа внатре во Украина, можете да разберете зошто Украина чувствува потреба да ја обезбеди својата одбрана“, рече Камерон.
Шефот на британската дипломатија, кој се сретна со претседателот Володимир Зеленски во Киев, рече дека Русија започна напад врз Украина и Украина има „апсолутно право да возврати на Русија“.
Портпаролката на руското Министерство за надворешни работи Марија Захарова во петокот изјави дека изјавите на британскиот министер за надворешни работи се признание дека Западот води војна против Русија користејќи „украински раце“.
„Зборовите на Камерон се уште еден доказ за хибридната војна што Западот ја води против нашата земја“, рече Захарова.
Портпаролот на Кремљ, Дмитриј Песков, истакна дека ова е директна ескалација на тензиите околу украинскиот конфликт, што потенцијално претставува закана за европската безбедност.
Свет
Италија: Лани лично го предупредивме Зеленски, контраофанзивата беше грешка
Италијанскиот министер за одбрана изјави денеска дека економските санкции наметнати на Русија не успеале и го повика Западот да направи повеќе за да преговара за дипломатско решение со претседателот Владимир Путин за да се стави крај на војната во Украина.
Гвидо Крозето за дневниот весник Ил Месаџеро изјави дека Западот погрешно верувал дека санкциите може да ја запрат руската агресија.
„Наместо тоа, единствениот начин да се реши таа криза е сите да бидат вклучени, прво да се воспостави примирје, а потоа мир“, рече Крозето.
На забелешката на новинарот дека Путин не покажал волја за преговори, Крозето одговори дека „тоа е добра можност да се обидеме повеќе“.
„Не смееме да пропуштиме ниту еден дипломатски пат, колку и да е тесен“, нагласи тој.
Крозето, сепак, ја бранеше одлуката на Италија да продолжи да испраќа оружје во Украина со цел „да се обезбеди време и услови за постигнување прекин на огнот и мир“.
Тој исто така предупреди дека во случај Русија да го окупира Киев, „тоа неизбежно ќе доведе до конфликт со други земји кои нема да прифатат руски тенкови да се наоѓаат на нивните граници“.
Тој ја нарече минатогодишната украинска контраофанзива грешка со оглед на воената супериорност на Русија и рече дека лично го предупредил украинскиот претседател Володимир Зеленски дека таа е осудена на неуспех, но тој не го слушал.
Италија во моментов претседава со групата Г7.
Регион
Србите објавија детали за дочекот на кинескиот претседател во Белград: „Вучиќ ќе му служи српски вина“
Претседателот на Кина, утре пристигнува во дводневна посета на Белград, а во тек се последните подготовки за неговото пристигнување.
Тој ќе биде придружуван од делегација од 400 луѓе, а ќе го обезбедуваат 3.400 полицајци.
„Блиц“ го објави планот за неговиот пречек.
Кси на аеродромот ќе биде пречекан со свечена церемонија и фолклор. Покрај патот во Белград ќе бидат поставени кинеско-српски знамиња, а на надвозниците ќе бидат испишани пораки.
Свечен дочек ќе биде организиран и пред Палатата Србија. Српскиот и кинескиот претседател ќе потпишат триесетина договори.
За време на ручекот ќе се служат српски јадења и вина, а претседателот Вучиќ лично ќе служи Џинпинг со српски вина, од пенливи до десертни вина, од кои повеќето се автохтони српски сорти.
Девојка од Србија ќе ја отпее песната „Татковино и јас“ на кинески, додека хорот „Чаролије“ ќе ја изведе песната „Прекрасен јасмин цвет“, исто така на кинески. .
Програмата ќе заврши со песната „Ова е Србија“, објави српскиот портал.