Македонија
Јанушев: Да се објават деталите за договорот со „Сархемс“

„Поминаа точно 12 дена откако Владата донесе одлука бизнисот тежок 72 милиона евра да ѝ го додели на фирма формирана 24 дена пред да биде распишан тендерот. Остануваат уште 18 дена од рокот од еден месец за склучување на договорот, а Владата сè уште крие што планира да потпише“, изјави генералниот секретар на ВМРО-ДПМНЕ, Игор Јанушев, на прес-конференција.
Тој рече дека фирмата ќе наплаќа 72 милиона евра од патарини, авионски карти или зелени картони, пари што, наместо во буџетот на државата, ќе се слеат на сметката на „Сархемс“, единствената фирма што доставила понуда на огласот.
Доколку договорот е толку добар, зошто власта го крие, праша Јанушев.
„Зошто не се објават деталите? Зошто не знаеме што плаќаме, колку ќе плаќаме и како ќе плаќаме? Дали власта има согласност да наметнува дополнителни давачки за патник? Како тоа ќе влијае врз цените на аеродромските услуги?
Дали и во која мера ќе биде оштетен Фондот за здравство бидејќи не сите граѓани имаат приватно осигурување и како тоа ќе влијае на здравствениот систем? Власта мора да одговори на овие прашања. Граѓаните се тие што ќе платат 72 милиона евра и мора да знаат како и на кој начин се трошат нивните пари“, порачуваат од опозицијата.
Никој не верува во приказните на Драги Рашковски, рече Јанушев, дека приватна фирма би работела без профит.
„Тогаш зошто би почнувала бизнис или зошто некој би го почнувал бизнисот како јавно-приватно партнерство доколку нема никаква корист од државата? Граѓаните мора да знаат кај ќе заврши секој цент од овие 72 милиона евра.
СДСМ не смее да заборави дека иако е во заминување, мора да работи во согласност со законот. Секоја недоследност и криминал во работењето ќе бидат санкционирани. Нема да дозволиме злоупотреба на народни пари за лично богатење на поединци“, додаде Јанушев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.